Yesu a dondzre matsrhamela lamanene lama mu pfuniki akuva a va mutizrikulobye lwenene ka lava a tizrisaniki na vone loko a li lani misaveni. Xana hi nga pfunekisa kuyini hi xikombiso xa Yesu? Hi ku kambisisa he kusuhi xikombiso xake, hi nga kota ku xiya minsinya yizrazru ya milawu leyi nga hi pfunaka ku va hi va vatizrikulobye lavanene. Minsinya ya milawu yoleyo yi ta hi pfuna kuva vhanu lava nga ni wumun’we ni lava tizrisanaka.

Mutizrikulobye lwenene awa titsrongahata, a nga titeki na a li wa lisima ku tlula vambeni nakone a nga djuli ku dzrumisiwa hi leswi a swi yentxaka. Yesu a dondzre ku titsrongahata ka Papayi wake. Nambi leswi o ko va Yehovha ntsena lwa fanelaka ku vitaniwa mutumbuluxi, a khanele hi ndlela leyi Yesu a viki mutizri lwenene ha yone. Hi vona leswo ka mazritu lawa Xikwembu Nkulukumba a ma hlayiki, a te: ‘A hi hambeni mhunu a xifanisweni xezru.’ (Gn 1:26) Loko Yehovha a hlaye mazritu lawo, Yesu a vhele a swi vona leswaku Yehovha a a titsrongahata.​—Ps 18:35.

Na a li la misaveni Yesu a kombise ku titsrongahata loku fanaka. Loko a kulungeliwa hi leswi a a swi yentxa, a a yisa lidzrumu ka lweyi dzri mu fanelaka. (Mr 10:17, 18; Yh 7:15, 16) Yesu a bekise ku zrula ni vadondzrisiwa vake nakone a a va khoma swanga vanghanu ku nga li swikazrawa. (Yh 15:15) A patsre ni ku va hlampswa milenge akuva  a va dondzrisa ku titsrongahata. (Yh 13:5, 12-14) Na hine hi yentxa swone loko hi teka vatizrikulobye va li va lisima ni ku va hi beka swivileleko swavu a mahlweni ka swezru. Loko hi kombisanana xihluwa ni ku va hi nga kazrateki hi leswaku hi mani lwa taka kulungeliwa, hi ta kota ku yentxa mintxhumu yinyingi.​—Ro 12:10.

Mhunu lwa titsrongahataka awa pfumela leswaku a makungu ‘ma tiyisiwa hi ku tala ka vatlhavukanyisi’. (Pr 15:22) Nambi loko hi ni wutlhazri kumbe wutivi bya kukazri hi fanela ku dzrimuka leswaku a ku na mhunu lwa tivaka hinkwaswu. Nambi Yesu a a pfumela leswaku ku ni leswi a a nga swi tivi. (Mt 24:36) Kambe, nambi leswi a va nga hetisekanga, Yesu a a zron’weka hi leswi vadondzrisiwa vake a va swi tiva ni leswi a va swi pimisa. (Mt 16:13-16) A swi hlamalisi leswi lava a va tizra na yene a va titwa na va ntsrhunxekile loko va li na yene! Hi ndlela leyi fanaka loko na hine hi titsrongahata hi tlhela hi pfumela leswaku a hi koti ku yentxa hinkwaswu, hi ta pfumela leswaku vambeni va hi pfuna nakone hi ta hanyisana hi ku zrula na vone. Hi ndlela leyo, hi ta kota ku hetisisa makungu yezru.

Hi fanela ku yetisela Yesu a mhakeni ya ku tizrisana. Ngopfungopfu vakulu va fanela ku yetisela Yesu a mhakeni ya ku tizrisana. Va fanela ku dzrimuka leswaku moya wa ku xwenga wu pfuna nkulu mun’wana ni mun’wana akuva a hlaya xa kukazri ka ntlhanganu wa vakulu. Loko va li ka ntlhanganu wa vakulu, vakulu va yentxa hinkwaswu leswi va nga swi kotaka leswaku hinkwavu va titwa na va ntsrhunxekile akuva va hlaya xa kukazri. Leswo swi va pfuna kuva va teka swiboho leswi taka pfuna bandla.

Mutizrikulobye lwenene awa dzringanisela loko a tizrisana ni vambeni. A nabyalile nakone a ni lizrandzru. Handle ka ku ganaganeka Yesu a swi vone hi ku khanya leswaku Papayi wake i mhunu lwa dzringaniselaka. Hi xikombiso, Yehovha a mu zrumele misaveni akuva a huluxa vhanu ka xikhatiso xavu xa lifu.​—Yh 3:16.

Yesu a a kombisa lizrandzru loko swi fanelaka ni loko swi vileleka. Dzrimuka ndlela leyi a pfuniki ha yone wansati wa Mufenikiya nambi leswi a a zrumiwe ku pfuna va yindlu ya Israyele. (Mt 15:22-28) Nakone a a dzringanisela ka leswi a a swi yimela ka vadondzrisiwa vake. Ntsrhaku ka loko Petro a mu yalile mahlweni ka vhanu, Yesu a a tiyimisele ku mu dzrivalela. Ntsrhaku, Yesu a nyike Petro wutiyanguleli byinyingi. (Lk 22:32; Yh 21:17; Min 2:14; 8:14-17; 10:44, 45) Xikombiso xa Yesu xi swi beka livaleni leswi Bibele dzri swi hlayaka, loko  dzri ku: ‘A ku nabyala kwenu a ku tibyiwe hi vhanu hinkwavu.’ Hi ndlela leyo, hi ta swi kota ku kombisa lizrandzru.​—Flp 4:5.

Loko hi dzringanisela swi ta hi nabyalela kuva hi tizrisana ni vhanu va ku siyanasiyana. Yesu a a va khoma ha hombe vhanu hinkwavu lakakuva valala vake va mu hehlile va ku “i munghanu wa vahakelisi va tinemba ni vadohi”. (Mt 11:19) Ku fana na Yesu, xana na hine hi nga swi kota ku tizrisana ha hombe ni vambeni? Louis, a hete nkama wunyingi na a tizra swanga mulaviseli lwa fambafambaka nakone a tizre Betele ni vhanu va ku siyanasiyana a li: “Ni dzringise ku fananisa ntlawa wun’wana ni wun’wana ni khumbi ledzri yakiwiki hi mabiloko ya ku kala ma nga dzringani. Loko u lulamisela mabiloko lawo ha hombe u nga ha hetelela hi ku yaka khumbi ledzri lulamiki. Ni yampswise swa kukazri ka wumhunu byanga akuva ni tizrisana ha hombe ni vamakwezru hi va hi hetisisa ntizro lowu hi nyikiwiki wone.” Awee mapimisela ya ku xonga!

Xana he wini mukhandlu lowunene wa ku kombisa moya wa ku tizrisana a bandleni? Hi nga kombisa mapimisela lawo loko hi li ka ntlhanganu wezru wa nsimu. Hi nga kombisa ku dzringanisela loko, hi ku va hi tizra ni vazrezri lava nga ni wutiyanguleli lebyi hambaniki ni byezru a mindangwini yavu kumbe va tintanga leti hambaniki. Hi nga kombisa ku dzringanisela hi ku yampswisa mazrezrela yezru hi tizrisa mazrezrela lawa ma ta ka nabyalela vambeni akuva va nyonxa a ntizrweni wa nsimu.

Mutizrikulobye lwenene a tiyimisela ku “hanana”. (1Tm 6:18) Nkama na a tizra tlhelweni ka Papayi wake, Yesu a xiye leswaku Yehovha a a nga tlhoti mintxhumu. Loko Yehovha a ‘longisa matilu’ Yesu ‘afa a li kone’ nakone a dondzre swinyingi kwake. (Pr 8:27) Ntsrhaku, Yesu a yavelane ni vadondzrisiwa vake leswi a swi dondzriki ka Papayi wake. (Yh 15:15) Na hi ni xikombiso lexo miyanakanywini, na hine hi fanela ku tiyimisela ku yavelana ni vambeni leswi hi swi tivaka. Handle ka ku ganaganeka, mutizri lwenene a nge tlhoti leswi a swi tivaka akuva a fuma vambeni. A nyonxa swinene hi ku yavelana ni vambeni mintxhumu leyinene leyi a yi tivaka.

Hi nga tlhela hi yavelana ni vatizrikulobye mazritu lamanene akuva hi va kutxa. Xana a swi hi nyonxisi ku va mhunu a vona ku tikazrata kwezru a va a hi tlangela? Yesu a tinyike nkama wa ku tlangela vatizrikulobye hi mintxhumu leyinene leyi a yi voniki kwavu. (Dzringanisa na Matewu 25:19-23; Luka 10:17-20.) A tlhele a hlaya leswaku a va ta tizra ‘mintizru leyi tlulaka’ ni yake. (Yh 14:12) Ka wusiku lebyi a a ta dlayiwa ha byone, Yesu a kulungeli vapostola vake va ku dumbeka hi ku va byela leswi: ‘N’wine, n’wi lava tiyiseliki na mine a swidzringweni swanga.’ (Lk 22:28) Yanakanya ndlela leyi mazritu lawo ma va khumbiki timbilu ha yone ma tlhela ma va tiyisa! Loko hi tinyika nkama wa ku tiyisa vatizrikulozri, a swi ganaganekisi leswaku va ta nyonxa va tlhela va kuma ntamu wa ku ya mahlweni va tizra.

Makwezru lwa vitaniwaka Kayode a te: “A swi vileli ku va mhunu a va lwa hetisekiki a kuva a va mutizrikulobye lwenene”. Kambe a yentxa leswaku vambeni va nyonxa ni ku yentxa leswaku swi nabyala ku tizra na yene.” Wene ke, xana u mutizrikulobye lwenene? Ha yini u nga zrambi vakriste va kukazri lava u tizraka na vone akuva va ku byela ndlela leyi va ku vonaka ha yone? Loko va swi zrandzra ku tizra na wene ku fana ni leswi vadondzrisiwa va Kriste a va swi zrandzra ku tizrisana na yene, u nga hlaya mazritu lawa mupostola Pawulo a ma hlayiki a te: ‘Ha ku tizrisana na n’wine ku nha n’wi kuma ku tsrhava.’​—2Ko 1:24.