A MINKAMENI ya ku tsraliwa ka Bibele, lovolo a dzri humexiwa loko mindangu ha yibidzri yi pfumelelana leswaku vana va tekana. Akuva ku lovoliwa, a ku tizrisiwa mintxhumu ya lisima, swihazri kumbe mali. Minkama yin’wana, lovolo a dzri hakeliwa hi ku tizra. Hi xikombiso, akuva Yakob a tekana na Rakeli, swi djuli a tizrela papayi wa Raqueli 7 wa malembe. (Gn 29:17, 18, 20) Kambe ha yini a ku humexiwa lovolo?

Carol Meyers lweyi a dondzreliki ta Bibele a hlaya leswi: “Ka mindangu leyi hanyaka hi wudzrimi, lovolo a dzri ta tizrela ku hakela ntizro lowu a wu yentxiwa hi n’wana wa xisati lweyi a tekiwiki.” Handle ka leswo, lovolo a dzri tizrela ku tiyisa wuxaka makazri ka mindangu yibidzri. Wuxaka lebyo a byi ta yentxa leswaku mindangu leyo yi pfunana loko yi kumana ni swiyimu swa ku bindzra. Ku tlhantekela kolanu, lovolo a dzri ta kombisa leswaku n’whanyana a nge he mavokweni ya papayi wake, kambe a le mavokweni ya nuna wake.

A lovolo a ndzri nga kombisi leswaku n’wana wa xisati o va ntxhumu lowu nga xaviwaka kumbe ku xavisiwa. Buku ledzri liki Israel Antigo—Sua Vida E Instituições, dzri li: “Ku humexa lovolo, ku nga ha va hi mali kumbe ntxhumu wun’wana, dzri nga ha voniwa ingiki mindangu ya va-Israyele a yo xavisa vana. Lovolo a dzri nga humexiwi akuva ku hakeliwa n’whanyana, kambe a xi li xitlangelo ka vapswele vake.”

Ni namunhla, a matikweni man’wana xa ha landzriwa xihena lexo. Loko vapswele lava nga vakriste va kombela lovolo, va yentxa leswaku ‘ku nabyala kwavu ku tibyiwa hi vhanu hinkwavu’, hi ku va va nga kombeli leswi tlulaka mpimu. (Flp 4:5; 1Ko 10:32, 33) Hi ndlela leyo va kombisa leswaku a hi ‘vazrandzri va mali’, nakone a va kokeli kwavu. (2Tm 3:2) Ku tlhantekela kolanu, loko vapswele lava va nga vakriste va nga kombeli leswi tlulaka mpimu, djaha dzri nge te sindzriseka ku lehisa ngopfu masiku ya mutxhatu hi ku fela ku kuma mali ya lovolo. Kumbe djaha dzri nge te sindzriseka ku tsrhika ntizro wa wuphayona akuva dzri ya tizra yi nga txhayi dzri fela ku kuma mali ya lovolo ledzri dulisiwiki ngopfu.

A mimbangwini yin’wana ya misava, mali ya lovolo yi tsrimbiwa hi mfumu. A mimbangwini leyo, vapswele lava va nga vakriste va landzra milawu leyo. Ha yini? Zritu dzra Xikwembu Nkulukumba dzri li vakriste va fanela ku yingiseta ni ku landzra milawu ya byone leyi yi nga lwisaniki ni milawu ya Xikwembu Nkulukumba.—Ro 13:1; Min 5:29.