1-2. a) Hi nga ha titwisa kuyini loko hi yanakanya hi wutomi ni wutizreli bya Yesu? b) Hi ta vona yini ka xidondzro lexi?

 LOKO mhunu lweyi hi mu zrandzraka a fa, hi sungula ku mu xuva! A ku sunguleni, hi nga ha xukuvala hi ku dzrimuka leswi mu humeleliki na a nge si fa ngopfungopfu loko a xaniseke ngopfu na a li kusuhi ni ku fa. Kambe hi ku famba ka nkama hi sungula ku nyonxa loko hi yanakanya hi mintxhumu leyi a hi dondzrisiki, kumbe ntxhumu wa kukazri lowu a wu yentxiki kumbe ku wu hlaya lowu hi nyonxisiki kumbe ku hi tiyisa.

² Hi ndlela leyi fanaka, ha vaviseka loko hi dzrimuka leswi humeleliki Yesu loko a li kusuhi ni ku fa ngopfungopfu hi nguva ya xidzrimuxo. Hi tinyika nkama wa ku yanakanyisisa hi lisima dzra xitizrulo. (1Ko 11:24, 25) Nambitasu, ha nyonxa loko hi yanakanyisisa hi mintxhumu leyi Yesu a yi yentxiki ni ku yi hlaya loko a ha li lani misaveni. Nakone ha tiya loko hi yanakanya hi leswi Yesu a hi yentxelaka swone swoswi ni leswi a taka hi yentxela a nkameni lowu taka. Hi lani hi taka swi vona ha kone ka xidondzro lexi, ku yanakanyisisa hi mintxhumu leyo ni hi ndlela leyi Yesu a hi zrandzraka ha yone swi ta hi kutxa ku yentxa xa kukazri akuva hi kombisa leswaku ha tlangela.

3. He swini swivangelo leswi hi nga na swone swaku tlangela xitizrulo?

³ Loko hi yanakanyisisa hi wutomi ni lifu dzra Yesu, hi susumeteleka ku tlangela. Loko a ha li lani misaveni Yesu a dondzrisi leswaku Mfumu wa Xikwembu Nkulukumba wu ta tisa matovoko manyingi. Hi swi nyika lisima ngopfu leswi Bibele dzri swi dondzrisaka hi xitizrulo. Nakone hi xi tlangela ngopfu xitizrulo hikusa xi hi pfuleli ndlela ya ku va ni wuxaka bya le kusuhi na Yehovha kun’we na Yesu. Lava kombisaka lipfumelo ka Yesu va ni dumbo dzra ku hanya hi lani ku nga helikiki ni dzra ku yamukela  vazrandzriwa vavu lava fiki. (Yh 5:28, 29; Ro 6:23) A matovoko lawa hinkwawu a ma hi faneli, nakone a hi nge swi koti ku hakela leswi Yehovha na Yesu va hi yentxeliki swone. (Ro 5:8, 20, 21) Kambe hi nga swi kombisa leswaku ha va tlangela. Hi ndlela yini?

4. Xana Maria Madalena a ku kombise hi ndlela yini ku tlangela kwake? (Vona xifaniso.)

⁴ Vona xikombiso xa wansati wa muyuda lweyi a vitaniwaka Maria Madalena. Yene a a ni 7 wa mademona nakone a ma mu xanisa ngopfu. Swi nga yentxeka a a vona swi nga ta koteka kuva a ntsrhunxeka ka wone. Xileswo, yanakanya ndlela leyi a nga ha vaka a tlangeli ha yone loko Yesu a mu hlongoleli mademona wolawo! Hi ku susumetiwa hi ku tlangela, a tizrise nkama, ntamu ni leswi a a li na swone akuva a seketela wutizreli bya Yesu a tlhela a va mulandzreli wake. (Lk 8:1-3) Maria a a swi nyika lisima ngopfu leswi a yentxeliwiki swone, kambe swi nga yentxeka a a nga swi tivi hinkwaswu leswi Yesu a a ta swi yentxa a nkameni lowu taka. Yesu a a ta nyikela wutomi byake hi nkonta yezru, ‘a kuva mani na mani lweyi a pfumelaka ku yene a nga lahleki, kambe a kuma vutomi lebyi nga gamikiki’. (Yh 3:16) Nambitasu, Maria a kombise leswaku a a pfumela ka Yesu hikuva a dumbeka kwake. Hi xikombiso, a nkama lowu Yesu a a xaniseka a mhandzrini ya nxanisa, Maria a a li kusuhi akuva a seketela Yesu ni lava a va li kolahaya. (Yh 19:25) Ntsrhaku ka ku fa ka Yesu, Maria ni vavasati van’wana va xave mintxhumu leyi a yi vileleka akuva ku lulamiseliwa ntsrumbu wa Yesu. (Mr 16:1, 2) Maria a tovokisiwile hi kola ka ku dumbeka kwake. A ve ni tovoko dzra ku kumana na Yesu ntsrhaku ka loko a pfuxiwile a va a vulavula naye, ku nga tovoko ledzri ku ngeke vadondzrisiwa hinkwavu lava viki na dzrone.—Yh 20:11-18.

5. Hi nga swi kombisa hi ndlela yini leswaku ha swi tlangela hinkwaswo leswi Yehovha na Yesu va hi yentxeliki swone?

⁵ Na hine hi nga kombisa leswaku ha swi tlangela hinkwaswo leswi Yehovha na Yesu va hi yentxeliki swone hiku tizrisa nkama, ntamu ni  leswi hi nga na swone akuva hi seketela ntizro wa mfumu. Hi xikombiso, hi nga tinyikela a ku yakeni ni le ku bekiseni ka tiyindlu ta hlengeletanu ya Yehovha.

6. Ha yini xitizrulo xi li xihananu xa lisima kwaku?

⁶ Loko hi yimanyana hi yanakanyisisa hi ndlela leyi Yehovha na Yesu va hi zrandzraka ha yone, na hine hi susumeteleka ku va zrandzra. (1Yh 4:10, 19) Nakone loko hi twisisa leswaku Yesu a fele mun’wana ni mun’wana wezru, lizrandzru dzrezru ha Yehovha kun’we na Yesu dzri ya dzri tiya. Mupostola Pawulo a kombise ndlela leyi a a tlangela ha yone xitizrulo xa Yesu loko a tsrala leswi: ‘N’wana wa Xikwembu Nkulukumba . . . lweyi a nga ndzri zrandzra a va a tinyiketa ha mine.’ (Ga 2:20) Hi ku tizrisa xitizrulo, Yehovha a ku kokeli kwake akuva u va mughanu wake. (Yh 6:44) Xana ku tiva leswaku Yehovha a vone ntxhumu wa wunene kwaku a va a hakela ku dula akuva u va mughanu wake, a swi ku yentxi u mu tlangela hi mbilu hinkwayu? Xana a swi yentxi leswaku lizrandzru dzraku ha Yehovha na Yesu dzriya dzri tiya? Hi fanela ku tivutisa leswi: ‘Xana a lizrandzru ledzri dzri fanela ku ni kutxa ku yentxa yini?’

7. Xana hi nga dzri kombisa hi ndlela yini lizrandzru dzrezru ha Yehovha na Yesu? (2 Ba-le-Korinte 5:14, 15; 6:1, 2)

⁷ Lizrandzru lendzri hi nga na dzrone ha Yehovha na Yesu dzri hi kutxa ku zrandzra van’wana. (Dondzra 2 Ba-le-Korinte 5:14, 15; 6:1, 2.) Ndlela yin’wana ya ku kombisa lizrandzru ledzro i ku tizra hi khinkhi a ntizrweni wa ku zrezra. Hi bula ni vhanu hinkwavu lava hi va kumaka, leswi liki, a hi hlawuli nhlonge, lixaka, xiyimo xa timali nambi leswaku va dondzrekile kumbe a va dondzrekanga. Hi ndlela leyo, hi fambisana ni ku zrandzra ka Yehovha, ‘lweyi a zrandzraka leswaku vhanu hinkwavu va huluxiwa, va tlhasa ku tiveni ka xihlayelamfuzri’. — 1Tm 2:4.

8. Hi nga swi kombisa hi ndlela yini leswaku ha va zrandzra vamakwezru?

 ⁸ Hi tlhela hi kombisa leswaku ha mu zrandzra Yehovha kun’we na Yesu hi ku zrandzra vamakwezru. (1Yh 4:21) Ha zron’weka ha vone nakone hi va seketela hi leswi va swi vilelaka loko va kumana ni swikazratu. Loko makwezru a feliwa ha mu txhavelela, loko a vabya ha mu pfuxela nakone loko a hela ntamu hi yentxa hinkwaswo akuva hi mu tiyisa. (2Ko 1:3-7; 1Te 5:11, 14) Minkama hinkwayu hi khongotelela vamakwezru hikusa ‘a nkhongoto wa mululami wu kota ngopfu a ku tizreni ka wone’. — Yk 5:16.

9. Xana he yini ndlela yin’wana ya ku kombisa leswaku ha va zrandzra vamakwezru?

⁹ Ndlela yin’wana ya ku kombisa leswaku ha va zrandzra vamakwezru i ku tikazratela ku bekisa ku zrula. Nakone hi nga yetisela xikombiso xa Yehovha lweyi a dzrivalelaka hi ndlela leyikulu. Loko Yehovha a nyikeli N’wanake hi ku ntsrhunxeka leswaku a fela swidoho swezru, xana leswo a swi hi kutxi ku va na hine hi dzrivalela vamakwezru? A hi swi djuli ku fana ni xikazrawa lexiya xa ku biha lexi Yesu a vulavuliki ha xone ka xifananiso xake. Nambi ntsrhaku ka loko n’winyi wa xone a xi dzrivalele xikweneti lexikulu, xikazrawa lexi xi hlulekile ku dzivalela xikweneti lexi tsrongo xa xikazrawa-kulobye. (Mt 18:23-35) Loko ku ni makwezru wa kukazri lweyi mi khunguvanyisananiki a bandleni, swi ngo yini u mu yela leswaku miya kondletela ku zrula na siku dzra xidzrimuxo dzri nga si tlhasa? (Mt 5:23, 24) Phela ku yentxa leswo, swi ta kombisa leswaku hakunene wa mu zrandzra Yehovha kun’we na Yesu.

10-11. Xana vakulu va nga swi kombisa hi ndlela yini leswaku va mu zrandzra Yehovha kun’we na Yesu? (1 Petros 5:1, 2)

¹⁰ Xana vakulu va nga swi kombisa hi ndlela yini leswaku va zrandzra Yehovha na Yesu? Yin’we ya tindlela ta lisima ngopfu i ku zron’wekela tihamba ta Yesu Kriste. (Dondzra 1 Petros 5:1, 2.) Mhaka leyi Yesu a yi basise ha hombe ka mupostola Petro. Ntsrhaku ka loko a yale Yesu makhambi mazraru, swi nga yentxeka Petro a pimise leswaku a ke he na ndlela ya ku kombisa leswaku awa mu zrandzra Yesu. Ntsrhaku ka loko a pfuxiwile, Yesu a vutise Petro a ku: ‘Simon, n’wana Yohane, xana wa ndzri zrandzra xana?’ Handle ka ku ganaganeka, Petro a a ta yentxa hinkwaswu akuva a kombisa leswaku awa mu zrandzra mudondzrisi wake. Yesu a byele Petro a ku: ‘Byisa tihamba tanga.’ (Yh 21:15-17) Wutomi byake hinkwabyu, Petro a swi kombisile leswaku awa mu zrandzra Yesu hi ku bekisa tihamba take.

¹¹ Xana n’wine vakulu, mi nga swi kombisa hi ndlela yini leswaku mi swi nyika lisima leswi Yesu a swi byeliki Petro na ka ha kiyela mavhiki leswaku mi va ni xidzrimuxo ni loko xi khalutile? Mi nga kombisa ndlela leyi mi mu zrandzraka ha yone Yehovha na Yesu hi kuva minkama hinkwayu mi tinyika nkama wa ku kutxa vamakwezru ni ku pfuna lava holiki. (Ezk 34:11, 12) Mi nga tlhela mi kutxa swidondzro swa Bibele ni lava nyonxelaka nkama lowu va tlhasaka xidzrimuxweni, hi ku va yentxa va titwa va ntsrhunxekile hikusa siku dzrin’wana va nga ha va vadondzrisiwa va Kriste.

12. Ha yini mazritu lawa Yesu a ma hlayiki ka wusiku lebyi a fiki ha byone ma hi nyika xixixi (Yohan 16:32, 33)

¹² Ka wusiku lebyi Yesu a fiki ha byone, a byele vadondzrisiwa vake a ku: ‘A misaveni n’wi ta va ni nhlomulo; kambe tiyani ntamu; mine ndzri hlule misava.’ (Dondzra Yohan 16:32, 33.) I yini lexi pfuniki Yesu ku va ni xixixi a mahlweni ka valala vake ni ku tama a  dumbeka ku ya tlhasela ku feni? A a dumba Yehovha hi ku helela. Nakone Yesu a a swi tiva leswaku valandzreli vake a va ta kumana ni mindzringo leyi fanaka, xileswo a kombele Yehovha leswaku a va sizrelela. (Yh 17:11) Ha yini leswo swi hi nyika xixixi? Hikusa Yehovha a ni ntamu lowukulu ku tlula valala vezru. (1Yh 4:4) Yehovha a vona hinkwaswu leswi humelelaka. Xileswo hi nga dumba leswaku a ta hi pfuna ku hlula ntxhavu wezru ni ku va ni xixixi.

13. Xana Yosefa wa le Arimateya a kombisi xixixi hi ndlela yini?

¹³ Vona xikombiso xa Yosefa wa le Arimateya. Yene a a li wanuna lweyi a a hloniphiwa ngopfu hi vayuda. A a li xizro xa Sanedri, ku nga huvu leyikulu ya wuyavanyisi ya Xiyuda. Kambe hi nkama wa wutizreli bya Yesu la misaveni Yosefa a nga kombisanga xixixi. Loko Yohane a vulavula hi Yosefa a te hi lweyi wa ‘mudondzrisiwa wa Yesu, kambe faka a tifihla hi ku txhava vayuda’. (Yh 19:38) Yosefa a a ni lipfumelo ledzrikulu ka Yesu, kambe a a swi fihla. Swi nga yentxeka a a tiva leswaku vhanu a va nga ta mu hlonipha loko va tiva leswaku i mudondzrisiwa wa Yesu. Kambe Bibele dzri hlaya leswaku ntshaku ka lifu dzra Yesu, Yosefa a ve lweyi ‘a tiyisiki mbilu, a ta ku Pilato, a kombela mizri wa Yesu’. (Mr 15:42, 43) Swoswi vhanu hinkwavu kutani a va swi tiva leswaku Yosefa i mudondzrisiwa wa Yesu nakone yene a a nga ha txhavi.

14. U nga wu hlulisa kuyini ndzringo wa ku txhava vhanu?

¹⁴ Xana u ke u txhava vhanu ku fana na Yosefa wa le Arimateya? Xana u ke u dana ku tiviwa swanga Mboni ya Yehovha a xikole kumbe a ntizweni? Xana u ganaganeka kuva muzrezri kumbe ku babatisiwa hi ku txhava leswi van’wana va taka swi hlaya ha wene? U nga pfumeleli leswaku ku txhava loko ku ku sivela ku yentxa leswi u tivaka leswaku i swinene. Byela Yehovha leswi u titwisaka xiswone, u va u mu kombela leswaku u hetisisa ku zrandzra kwake. A nkama u swi xiyaka leswaku Yehovha awa swi hlamula swikhongoto swaku, u ta ya u tiya ni ku va ni xixixi. — Eza 41:10, 13.

15. Xana ku nyonxa ku va susumetele ku yentxa yini vadondzrisiwa ntsrhaku ka loko Yesu a humelele kwavu? (Luka 24:52, 53)

¹⁵ Vadondzrisiwa va Yesu va xukuvale ngopfu loko a fa. Phela a va nga lahlekeliwanga hi munghanu lwe a zrandzrekaka ntsena, kambe a va lahlekeliwe ni hi dumbo. (Lk 24:17-21) Kambe swe va swa nkamanyana hikusa Yesu a tlhele a humelela kwavu. A tinyike nkama wa ku va tlhamuxela leswaku a a fanela ku fa akuva  ku hetiseka wuprofeta bya Bibele. Nakone a va nyike ntizro wa lisima leswaku va sala va wu yentxa. (Lk 24:26, 27, 45-48) Ntsrhaku ka 40 wa masiku na Yesu a tlhantukele matilweni, a ku xukuvala ka vadondzrisiwa ku ndzruluke ku nyonxa lokukulu ngopfu. A va nyonxe ngopfu hi ku tiva leswaku Yesu kutani a a hanya ni leswaku a a lulamele ku va pfuna kuva va hetisisa wutiyanguleli byavu. Ku nyonxa loku a va li na kone ku va kutxe ku tama va tizrela Yehovha.—Dondzra Luka 24:52, 53; Amintiṛo 5:42.

16. Xana hi nga va yetisela hi ndlela yini vadondzrisiwa va Yesu?

¹⁶ Xana hi nga va yetisela hi ndlela yini vadondzrisiwa va Yesu? U nga va ni ku nyonxa hi ku tizrela Yehovha ku nga li ntsena hi nguva ya Xidzrimuxo, kambe lembe hinkwadzru. Akuva leswo swi koteka, u fanela ku zrangisa Mfumu wa Xikwembu Nkulukumba a wuton’wini byaku. Vamakwezru vanyingi va yentxa leswo. Van’wana va pimela nkama lowu va wu hetaka a ntizrweni wa ku tihanyisa akuva va yengesela ntizro wavu wa ku zrezra, ku hlalela mintlhanganu ni ku va ni wugandzreli bya ndangu nkama ni nkama. Van’wana va tsrhike nambi mintxhumu leyi vonekaka yi li ya lisima akuva va ta kota ku yentxa leswi yengetelekiki a bandleni ni ku ya pfunisa lomu ku nga ni xivileleko lexikulu. I ntiyiso leswaku swi djula ku tiyisela ni ku titsrona swa kukazri akuva hi tizrela Yehovha, kambe yene a dumbisa leswaku loko hi zrangisa mfumu a wuton’wini byezru a ta hi tovokisa.—Pr 10:22; Mt 6:32, 33.

17. Xana u tiyimiseli ku yentxa yini hi nguva ya Xidzrimuxo?

¹⁷ Hi dzri yimele hi manyawu siku dzra wawubidzri, 4 ka Abrili, lani hi taka tlhangana akuva hi hlalela xidzrimuxo xa lembe ledzri. Kambe a swi zi swi djula hi yimela siku ledzro akuva hi yanakanyisisa hi wutomi ni lifu dzra Yesu ni hi ndlela leyi Yehovha a kombisaka ha yone leswaku a wa hi zrandzra. Yanakanyisisa hi hinkwaswu leswi hi nguva ya xidzrimuxo. Hi xikombiso, tinyike nkama wa ku yanakanyisisa hi swiyentxakalu leswi kumekaka ka bokisi ledzri liki “Vhiki Ro Hetelela Ra Yesu eMisaveni” ka Xiyengetela B12 xa Bibele-Matsalwa yo Kwetsima Ya Misava Leyintshwa. Loko u dondzra wudzrunguli lebyo, djuletela u va u dondzra tindzrimana ta Bibele leti taka tiyisa ku tlangela, lizrandzru, xixixi ni ku nyonxa kwaku. Ntsrhaku ka leswo, zama ku vona tindlela leti u nga kombisaka ku tlangela kwaku ha tone. A swi ganaganekisi leswaku Yesu a ta swi nyika lisima hinkwawu leswi u taka swi yentxa akuva u mu dzrimuka hi nguva ya xidzrimuxo.—Mpf 2:19.