KU SUKELA minkameni ya khale a va-Israyele a va toloveli kuva va nyikela xa kukazri akuva va seketela wugandzreli bya xihlayelamfuzri. Kambe a mhaka ya tinemba yi sungule ku kazrata ka vayuda a masikwini ya Yesu.

Swanga ndlela ya ku seketela wugandzreli bya Xikwembu Nkulukumba a tabernakeleni, Vayuda hinkwavu lava kuliki a va fanela ku hakela hamfu ya xekele (madrakma mabidzri). A dzaneni dzra ku sungula, a tinemba a ti tizriseliwa kuva ku nyikeliwa magandzrelo ni ku va ku lungisiwa leswi a swi vileleka a tempeleni ledzri yakiwiki hi Heroda. Vayuda van’wana va vutise Petro mayelanu ni ndlela leyi Yesu a a yi vona ha yone mhaka ya tinemba, kambe Kriste a nga kanetanga ntxhumu mayelanu ni mhaka leyi. A matsrhan’wini ya leswo, Yesu a leleti Petros lomu a a ta yi kuma kone mali akuva va a hakela tinemba leto.​—Mt 17:24-27.

Vhanu va Xikwembu Nkulukumba na vone a va fanela ku hakela swa wukhume, leswi liki, a va fanela ku nyikela swa wukhume ka leswi a va bindzrula swone a masin’wini kumbe hi mali. (Lv 27:30-32; Tin 18:26-28) Vazrangeli va wukhongoti a va sindzrisa vhanu kuva va hakela swa wukhume ka mihandzru yin’wana ni yin’wana leyi a va bindzrula a masin’wini, ku patsra ni swa “wukhume bya ximbowana, bya anetha ni bya kumini”. Yesu a nga hlayanga leswaku a swi hoxile ku hakela swa wukhume, kambe a paluxe leswaku ndlela leyi a Vatsrali ni Vafarisi a va wu tizrisaka ha yone nawu wa swa wukhume a wu nga li wunene.​—Mt 23:23.

A nkameni luwani, a Varoma a va fuma Yuda nakone a va va sindzrisa leswaku va hakela tinemba tinyingi. Hi xikombiso, mhunu lweyi a a ni masimu a a fanela ku hakela tinemba hi mali kumbe hi mintxhumu yin’wana. Ka leswi vinyi va masimu a va swi bindzrula a va fanela ku nyikele 20 ku ya ka 25 pursentu ka Varoma. Handle ka leto, Muyuda mun’wana ni mun’wana a a fanela ku hakela tinemba ta ximhunu. Vafarisi va vutise Yesu mayelanu ni tinemba leto. Yene a kombise ndlela leyi hi fanelaka ku tivonisa xiswone tinemba. A te: “Nyikani Khezari leswi nga swa Khezari, kambe mi nyika Xikwembu Nkulukumba leswi nga swa Xikwembu Nkulukumba.”​—Mt 22:15-22.

Vaxavisi lava a va nghena ni ku huma a doropeni a va fanela ku hakela tinemba. Tinemba leto a ti hakelisiwa lomu a ku yima kone switimela swa mati kumbe ka mimpolwa a mabuluhweni, a makruzamentu ya switaratu, a mimbangwini ya ku nhingena a madoropeni ni le mabazara.

Tinemba a ti li tinyingi lakakuva a swi nga va nabyaleli vayuda kuva va tihakela. Mutivi wa swa matimu, Tacitus, a hlaye leswaku a nkama lowu a ku mfuma Tiberius, na Yesu a a li misaveni, a “Siriya ni le Yudeya a swi nga va nabyaleli kuva va hakela tinemba nakone a va kombela leswaku ti pumbiwa”.

Lexi yandzrisiki timhaka i ndlela leyi Varoma a va hakelisa ha yone tinemba. Akuva mhunu a kuma ntizro wa ku hakelisa tinemba a a fanela ku hakela mali ku tlula vambeni. Lava a va tholiwa akuva va hakelisa tinemba, a va kuma mali yinyingi nakone a va thola vhanu vambeni akuva va hakelisa tinemba. Leswi a swi yentxa leswaku na vone va kuma mali yinyingi. Swi tikomba na Zakewu a a li muzrangeli wa vahakelisi volavu va tinemba. (Lk 19:1, 2) Swa twisiseka leswaku ha yini vhanu a va khunguvanyeka hi leswo, nakone a va nga va zrandzri lava a va hakelisa tinemba.