1. I yini leswi Yehovha a swi yimeliki kwezru?

 A HI mintxhumu yinyingi leyi yentxaka vatekani va nyonxa ku tlula ku va ni n’wana lweyi a nga ni lihanyu ledzrinene. Kambe, nambiloko vapswali va zrandzra n’wana lweyi a ha ka ku pswaliwa, a va djuli leswaku n’wana lweyi a tama a va xin’wanana. Ku hlaya ntiyiso, a va ta kazrateka ngopfu loko n’wana lweyi a nga kuli. Hi ndlela leyi fanaka, Yehovha a nyonxa ngopfu loko a hi vona hi teka masungulo ya kuva hi va valandzreli va Yesu, kambe a nga djuli leswaku hi tama hi va vatsrongwana hi tlhelo dzra moya. (1 Kor. 3:1) A matsrhan’wini ya leswo, a hi kombela leswaku hi ‘kula hi ku helela ka ndlela leyi hi yi twisisaka ha yone mintxhumu’. —1 Kor. 14:20.

2. Hi ta kambisisa yini ka xidondzro lexi?

² Xana swi tlhamuxela yini ku va mukriste lweyi a wupfiki? Hi nga yentxa yini akuva hi va vakriste lava wupfiki? Ha yini swakuda swa moya leswi tiyiki swi li swa lisima ngopfu akuva hi va lava wupfiki? Ha yini hi fanela ku tivonela ka ku tidumba ku tlula mpimu? Ka xidondzro lexi, hi ta kuma tinhlamulo ta swivutiso leswi.

SWI TLHAMUXELA YINI KU VA MUKRISTE LWEYI A WUPFIKI?

3. Xana swi tlhamuxela yini ku va mukriste lweyi a wupfiki?

³ A Bibeleni, zritu ledzri ndzruluteliwiki dzri va “mhunu lweyi a kuliki” dzri nga tlhela dzri tlhamuxela “mhunu lweyi a wupfiki”, wa ku “hetiseka” kumbe lweyi a “heleliki”.  a (1 Kor. 2:6) Swanga hi leswi xin’wanana xi tamaka xi kula, na hine hi fanela ku kulisa wuxaka byezru na Yehovha. Hi ndlela leyo, hi va vakriste lava wupfiki, kambe nambiloko hi li vakriste lava wupfiki hi fanela ku yampswisa. (1 Tim. 4:15) Mun’wana ni mun’wana wezru, ku patsra ni lava ha liki vampshwa, hi nga va lava wupfiki hi tlhelo dzra moya.  Kambe i yini lexi kombisaka leswaku mukriste wa kukazri a wupfile?

4. I yini lexi kombisaka leswaku mukriste a wupfile?

⁴ Mukriste lweyi a wupfiki hi tlhelo dzra moya hi lweyi a hanyaka hi milawu ya Xikwembu Nkulukumba, a nga hlawuli ku yentxa leswi a swi djulaka kumbe ku swi landzra. I ntiyiso leswaku leswi hi nga vhanu va ku kala ku hetiseka, hi ta yentxa swihoxo. Nambitanu, mukriste lweyi a wupfiki a kombisa siku dzrin’wana ni dzrin’wana leswaku a yanakanya hi ku fambisana ni ku zrandzra ka Xikwembu Nkulukumba nakone a hanya ha swone. A yambala wumhunu lebyimpshwa nakone a tikazratela ku yanakanya ku fana na Yehovha. (Efe. 4:22-24) A tidondzrise ku teka swiboho leswinene hikusa minkama hinkwayu a tizrisa minsinya ya milawu ya Yehovha, xileswo a nga vileli swinawanawana ka mintxhumu hinkwayu akuva a tiva leswi a nga swi yentxaka. Loko a teka xiboho a tikazratela ku hanya hi ku fambisana ni xiboho xake.—1 Kor. 9:26, 27.

5. He dzrini khombo ledzri mukriste lweyi a kalaka a nga wupfanga a lavisanaka na dzrone? (Vaefesa 4:14, 15)

⁵ Hi tlhelo dzrin’wana, mukriste lweyi a kalaka a nga wupfanga a nga wa hi ku nabyala ka “wukanganyisi” ni “maqhinga” ya lava hangalasaka madzrimi nakone a nga ha kanganyisiwa hi madukwa. b (Dondzra Vaefesa 4:14, 15.) Mukriste lweyi a kalaka a nga wupfanga a nga ha tsrhohoka vambeni, a pfuxa timholova a bandleni, a hantla a khunguvanyeka hi leswi van’wana va swi yentxaka kumbe a wela ndzringweni wa ku yentxa xidoho lexikulu.—1 Kor. 3:3.

6. Ha yini hi nga fanisaka ku kula ka n’wana ni ku wupfa hi tlhelo dzra moya? (Vona ni mufoto.)

⁶ Hi lani hi swi voniki ha kone, Bibele dzri fanisa ku kula he mizrini ni ku kula hi tlhelo dzra moya. Xin’wanana xi vilela mpfunu ni nkongomiso wa mhunu lweyi a kuliki hikusa a xi tivi swinyingi a wuton’wini bya xone. Hi xikombiso, yanakanya hi mamana wa kukazri lweyi a kombelaka n’wanake leswaku a mu khoma voko akuva va tlulela xitaratu. Hi ku famba ka nkama, n’wana lweyi awa kula, kutani mamana wake awa mu pfumelela kuva a tlulela xitaratu na a li wuswake, kambe nambileswi a mu pfumelelaka, minkama hinkwayu a ta mu byela leswaku a fanela ku lavisa matlhelo hinkwawu na a nga si tlulela a va a tivonela ka mimovha. Kutani loko a ya a kula a ta swi  tiva leswi a fanelaka ku swi yentxa loko a tlulela xitaratu. Ku fana ni leswi n’wana a vilelaka mpfunu wa lava kuliki akuva a fambela kule ni makhombo, ni mukriste lweyi a kalaka a nga wupfanga a vilela mpfunu wa vakriste lava wupfiki akuva a fambela kule ni mintxhumu leyi nga ha bekaka wuxaka byake na Yehovha a nghozini, nakone a kota ku teka swiboho leswinene. Kambe loko a li mukriste lweyi a wupfiki a ta swi kota ku teka swiboho leswi fambisanaka ni ku zrandzra ka Yehovha, hi ndlela leyo a ta va na a hanya hi ku fambisana ni leswi a swi dondzriki.

7. Xana vakriste lava wupfiki va vilela mpfunu wa van’wana?

⁷ Xana leswi swi tlhamuxela leswaku mukriste lweyi a wupfiki a nga vileli mpfunu wa mhunu? Minkama yin’wana vamakwezru lava wupfiki va wu vilela mpfunu. Kambe mhunu lweyi a kalaka a nga wupfanga minkama yin’wana a nga ha djula ku byeliwa leswi a fanelaka ku swi yentxa ni xiboho lexi a fanelaka ku xi teka. Kambe hi hala tlhelo, mukriste lweyi a wupfiki a nga ha kombela mpfunu ka vamakwezru lava nga ni mfambu, kambe awa swi tiva leswaku Yehovha a yimela leswaku yene hi ku kongoma a ‘zrwala ntsrhwalu wake’.—Gal. 6:5.

8. Xana vhanu lava wupfiki va hambana hi ndlela yini?

⁸ Swanga hi leswi vhanu lava kuliki va nga ni matsrhamela lama hambaniki, na vone vakriste lava wupfiki va ni matsrhamela ya moya lama hambaniki ya ku fana ni wutlhazri, xixixi, ku hanana ni ntwelawusiwana. Xileswo, vakulu vabidzri va nga ha tlhasela wugamu lebyi hambaniki ka mhaka ya kukazri leyi fanaka kambe na hinkwavu va fambisana ni minsinya ya milawu ya Bibele. Leswo hakanyingi swi yentxeka hikusa swi ya hi lipfalu dzra mhunu, a ku na xivangelo xa kuva va phikisana hi leswi va tlhaseliki wugamu lebyi hambaniki, a matsrhan’wini ya leswo va ta tikazratela ku va ni wumun’we.—Rom. 14:10; 1 Kor. 1:10.

XANA HI FANELA KU YENTXA YINI AKUVA HI VA VAKRISTE LAVA WUPFIKI?

9. Xana hi kula hi tlhelo dzra moya swa kola ni kola? Tlhamuxela.

⁹ Swivanana hinkwaswu hi ku famba ka nkama swa kula, kambe ku kula hi tlhelo dzra moya a swi yentxeki swa kola ni kola. Hi xikombiso, vamakwezru va le Korinte va yamukele ntiyiso, va babatisiwile, va yamukela moya wa ku xwenga nakone va dondzrisiwe hi mupostola Pawulo hi ku kongoma. (Mint. 18:8-11) Kambe ntsrhakunyana ka malembe na va babatisiwile, vanyingi a va nga si wupfa hi tlhelo dzra moya. (1 Kor. 3:2) Hi nga yentxa yini akuva hi nga yentxekeliwi hi swa ku fana ni leswo?

10. Xana hi fanela ku yentxa yini akuva hi va vakriste lava wupfiki? (Yuda 20)

¹⁰ Swi ta hi kazratela ku va vakriste lava wupfiki loko hi nga li na kone ku navela loko. Lava va ‘zrandzraka wusinge’, nakone va kalaka va nga yentxi nhluvuku hi tlhelo dzra moya va nge ti za va va vakriste lava wupfiki. (Amapr. 1:22) Hine a hi djuli ku fana ni vhanu lava nga vakulu kambe va djulaka ku tekeliwa swiboho hi vapswali vavu. A matsrhan’wini ya leswo, hi ni wutiyanguleli bya ku kula hi tlhelo dzra moya nakone minkama hinkwayu hi tiyisa wuxaka byezru na Yehovha. (Dondzra Yuda 20.) Loko wa ha tikazratela ku va mukriste lweyi a wupfiki, khongota ka Yehovha akuva a ku nyika a “ku navela ni ntamu wa ku swi yentxa”.—Filp. 2:13.

11. Xana he wini mpfunu lowu Yehovha a hi nyikaka wone akuva hi va vakriste lava wupfiki? (Vaefesa 4:11-13)

¹¹ Yehovha a nga yimelanga leswaku hi va lava wupfiki na hi nga na mpfunu. Lava tizraka swanga vabyisi ni vadondzrisi a bandleni dzra wukriste va tiyimisele ku hi pfuna akuva hi va vhanu lava “wupfiki” hi tlhelo dzra moya, “hi wupfa hi ku helela ku fana na Kriste”. (Dondzra Vaefesa 4:11-13.) Yehovha a tlhela a hi nyika moya wake wa ku xwenga akuva a hi pfuna kuva hi va ni “miyanakanyu ya Kriste”. (1 Kor. 2:14-16) Handle ka leswo, Xikwembu Nkulukumba a huhutele mune  wa Tievhangeli leti kombisaka ndlela leyi Yesu a a yanakanya ha yone, a a vulavula ha yone ni ndlela leyi a a yangula ha yone nkama lowu a a hetisisa ntizro wake. Loko hi yetisela ndlela leyi Yesu a a vulavula ni ku yangula ha yone, hi nga swi kota ku va vakriste lava wupfiki.

LISIMA DZRA SWAKUDA SWA MOYA LESWI TIYIKI

12. He tini “tidondzro ta masungulo mayelanu na Kriste”?

¹² Akuva hi va vakriste lava wupfiki hi fanela ku ‘khaluta ka tidondzro ta masungulo mayelanu na Kriste’, kumbe mintxhumu ya ku sungula leyi hi yi dondzriki mayelanu na Yesu. Hi xikombiso, tin’we ta tidondzro leto ta masungulo ti patsra ku tisola, lipfumelo, ku babatisiwa ni ku pfuxiwa ka lava fiki. (Heb. 6:1, 2) Leti i tin’we ta tidondzro ta masungulo leti vakriste va fanelaka ku ti tiva va tlhela va kholwa ka tone. Xileswo, Petro a khanele hi tone loko a zrezrela xitsrhungu hi Pentekoxta. (Mint. 2:32-35, 38) Akuva hi va valandzreli va Yesu hi fanela ku pfumela ka tidondzro ta masungulo. Hi xikombiso, mupostola Pawulo a swi beke livaleni leswaku akuva mhunu a va mulandzreli wa Yesu Kriste a fanela ku kombisa lipfumelo ka ku pfuxiwa ka vafi. (1 Kor. 15:12-14) Kambe, akuva hi va vakriste lava wupfiki a hi fanelanga ku tiva ntsena tidondzro ta masungulo ta Bibele.

13. Hi nga yentxa yini akuva hi susa londzrovoto ka swakuda swa moya leswi tiyiki leswi tsraliwiki ka Vaheberu 5:14? (Tlhela u vona mufoto.)

¹³ Ku hambana loku nga kone ka tidondzro ta masungulo ni swakuda swa moya leswi tiyiki, hi leswaku swakuda swa moya leswi tiyiki a swi patsri ntsena milawu ya Yehovha, swi patsra ni minsinya ya milawu leyi hi pfunaka ku tiva ndlela leyi a pimisaka ha yone. Akuva hi kota ku susa londzrovoto ka swakuda swa moya hi fanela ku dondzra, hi yanakanyisisa ni ku hanya hi leswi hi swi dondzraka a Bibeleni. Loko hi yentxa leswo, hi va na hi dondzra ku teka swiboho leswi nyonxisaka Yehovha. c—Dondzra Vaheberu 5:14.

14. Xana Pawulo a pfune Vakorinte ku wupfa hi tlhelo dzra moya hi ndlela yini?

¹⁴ Vakriste lava kalaka va nga wupfanga swa va kazratela ku yanakanyisisa hi minsinya ya milawu ya Bibele ni ku yi tizrisa loko va djula ku teka xiboho. Van’wana va yanakanya leswaku leswi ku kalaka ku nga na nawu lowu kongomiki va nga tiyentxela leswi va swi djulaka, van’wana va djula  ku tizrisa a swinawanawana ka swiyimu swa ku a swi vileleki. Hi xikombiso, vakriste va le Korinte va kombele Pawulo leswaku a humesa nawu mayelanu ni leswaku a va fanela ku da swakuda leswi phahleliwiki swifaniso kumbe im-him. A matsrhan’wini ya ku va byela leswi a va fanela ku swi yentxa, Pawulo a va tlhamuxele lisima dzra kuva va tizrisa lipfalu dzravu, ni leswaku mun’wana ni mun’wana a ni ‘ntsrhunxeko wa ku tihlawulela’. A yanakanyisise na vone hi minsinya ya milawu ya Bibele, hi ndlela leyo mun’wana ni mun’wana a a ta titekela xiboho na a nga kingindzriwi hi lipfalu nakone a nga vi xikhunguvanyiso ka van’wana. (1 Kor. 8:4, 7-9) Hi ku yentxa leswo, Pawulo a a pfuna Vakorinte leswaku va kula hi tlhelo dzra moya. Kutani a va ta swi kota ku tizrisa wuswikoti byavu bya ku yanakanya va nga yimeli ku tekeliwa swiboho hi mhunu kumbe ku djuletela swinawanawana.

15. Xana Pawulo a va pfunise kuyini vakriste va Vaheberu ku hluvuka hi tlhelo dzra moya?

¹⁵ Hi kuma dondzro ya lisima ka leswi Pawulo a swi tsraleliki vakriste va le Heberu. Van’wana a va zanga va tikazratela ku va vakriste lava wupfiki, vone va ‘djule mafi ku nga li swakuda [swa moya] leswi tiyiki’. (Heb. 5:12) Vone a va dondzranga ku yamukela mintxhumu leyimpshwa leyi Yehovha a a yi dondzrisa. (Amapr. 4:18) Hi xikombiso, ntsrhaku ka lifu dzra Yesu, Nawu wa Moxe wu sungule kuva wu nga ha tizrisiwi, kambe vakriste va kukazri va Vayuda a va sindzrisa kuva ku tama ku tizrisiwa Nawu lowu nambileswi a ku khalute 30 wa malembe na Nawu lowu wu nga ha tizrisiwi. (Rom. 10:4; Tit. 1:10) Xana 30 wa malembe a ma nga yanelanga akuva Vayuda va txintxa ndlela leyi a va pimisa ha yone? Mun’wana ni mun’wana lweyi a a dondzra papela ledzri yaka ka Vaheberu a a pfumela leswaku buku ledzri a dzri tamele swakuda swa moya leswi tiyiki. Papela ledzri dzri va pfune ku vona ndlela leyimpshwa ya ku gandzrela Yehovha leyi a yi li ya ku yampswa nakone a dzri ta va nyika xixixi xa ku tama va zrezra nambileswi a va kumana ni nkaneto wa Vayuda.—Heb. 10:19-23.

U NGA TIDUMBI KU TLULA MPIMU

16. Handle ka ku tikazratela ku va lava wupfiki hi tlhelo dzra moya, i yini swin’wana leswi hi fanelaka ku swi yentxa?

¹⁶ A hi fanelanga ku tikazratela ku va lava wupfiki ntsena, hi fanela ku tama hi va lava wupfiki. Leswo swi tlhamuxela leswaku hi fanela ku tivonela ka ku tidumba ku tlula mpimu. (1 Kor. 10:12) Hi fanela ku ‘tama hi tikambela’ akuva hi tiyiseka leswaku hi tama hi yentxa nhluvuku.—2 Kor. 13:5.

17. Xana a papela ledzri Pawulo a dzri tsraleliki Vakolosa dzri kombisa hi ndlela yini lisima dzra ku tama hi va vakriste lava wupfiki?

 ¹⁷ Ka papela ledzri a dzri tsraleliki Vakolosa, a tlhele a kombisa lisima dzra ku tama hi va lava wupfiki. Vakolosa a va li vakriste lava wupfiki, kambe Pawulo a va be ndleve hi khombo dzra ku pimisa ku fana ni misava. (Kol. 2:6-10) Epafrasi, lweyi a a va tiva ha hombe vamakwezru va bandla ledzriyani, minkama hinkwayu a a khongota akuva ‘va va lava wupfiki ni ku tiya ka mintxhumu hinkwayu’. (Kol. 4:12) Hi dondzra yini ka leswo? Pawulo kun’we na Epafrasi a va swi tiva leswaku akuva va va lava wupfiki a swi djula va tikazrata ni leswaku a va fanela ku kuma mpfunu wa Xikwembu Nkulukumba. A va djula leswaku Vakolosa va tama va va vakriste lava wupfiki, kumbe lava kuliki, swi nge na mhaka swikazratu leswi a va ta txhuka va lavisana na swone.

18. I yini leswi nga ha humelelaka hi mukriste lweyi a wupfiki hi tlhelo dzra moya? (Tlhela u vona mufoto.)

¹⁸ Pawulo a byele Vaheberu leswaku nambi vakriste lava wupfiki va nga ha lahlekeliwa hi wuxaka byavu na Xikwembu Nkulukumba. A mbilu ya mukriste yi nga ha tlanyala lakakuva a nga tisoli nakone a nga ha dzrivaleliwi hi Xikwembu Nkulukumba. Ndjombo ya kone hi leswaku vakriste va le Heberu a va zanga va tlhasa ka xiyimu lexo. (Heb. 6:4-9) Swi li yini hi vakriste lava holiki kumbe va susiwiki bandleni, kambe va tisolaka va va va tlhelela ka Yehovha? Vone va titsrongahata nakone va tisola, va kombisa leswaku va hambanile ni lava Pawulo a hlayiki leswaku a va ta lahlekeliwa hi wuxaka byavu na Yehovha. I ntiyiso leswaku ntsrhaku ka loko va tlhelele ka Yehovha va djula ku pfuniwa. (Ezek. 34:15, 16) Handle ka ku ganaganeka, vakulu va bandla va ta kombela makwezru wa kukazri akuva a va nyika mpfunu leswaku va tlhela va va lava tiyiki hi tlhelo dzra moya.

19. He wini nkongometo lowu hi fanelaka ku va na wone?

¹⁹ Loko u lwela ku va mukriste lweyi a wupfiki, handle ka ku ganaganeka u ta swi kota ku tlhaselela nkongomento waku! Nkama u dondzraka hi mintiyiso leyi yentiki ya Bibele, lwela ku tama u pimisa ku fana na Yehovha. Loko kutani u wupfile hi tlhelo dzra moya, tikazrateli ku tama u tsrhamisisa xiswoswo.