1. Hi ku ya hi 3 Yohan 3, 4, i yini leswi hi yentxaka hi nyonxa?

MUPOSTOLA Yohani a pfune vhanu va ku siyanasiyana akuva va dondzra ntiyiso. Yene a a vona vakriste lavo swanga vana vakwe nakone nambi leswi a va kumana ni swikazratu swa ku siyanasiyana a va zanga va tsrhika ku tizrela Yehovha. Wa ku vona ku nyonxa loku Yohani a viki na kone hi kola ka leswo? Namunhla hi ni ku nyonxa loku fanaka loko hi vona vanezru va nyama xikan’we ni va moya, na va tinyiketela ka Yehovha va tlhela va tama va mu tizrela.​—Dondzra 3 Yohan 3, 4.

2. A wu li wini nkongometo wa mapapela ya Yohani?

² Hi lembe dzra 98 a Nguveni Yezru (N.Y.), swi tikomba na Yohani a a tsrhama a Efesa kumbe kusuhi na kone. Swi nga yentxeka a ye tsrhama kone ntsrhaku ka loko a humexiwile djele a xihlaleni xa Patmos. Nkameni lowo, moya wa ku xwenga wu susumetele Yohani akuva a tsrala mapapela mazrazru. Nkongometo wa wone a a li ku kutxa vakriste va ku dumbeka akuva va nga heleliwi hi lipfumelo dzravu ka Yesu ni ku tama va famba a ntiyisweni.

3. Hi swini swivutiso leswi taka hlamuliwa ka xidondzro lexi?

³ Ka vapostola hinkwavu, Yohani a a li yene ntsena a a sali na a hanya. A a kazrateka hi nkutxetelo wa ku biha wa vadondzrisi va madzrimi lava a va li kone mabandleni. * (1Yh 2:18, 19, 26) A vaduki lavo a va hlaya leswaku va mu tiva Xikwembu Nkulukumba kambe a va nga swi yingiseti swileleto swakwe. A hi buleni hi swilayu leswi Yehovha a huhuteliki Yohani akuva a swi tsrala. Nakone nkama lowu hi bulaka ha swone, hi ta kuma tinhlamulo ta swivutiso swizrazru: Swi tlhamuxela yini ku famba xihlayelamfuzrini? Hi  swini swihinga leswi nga ha hi sivelaka ku famba xihlayelamfuzrini? Nakone hi nga pfunana ni vambeni hi ndlela yini akuva hi tama hi dumbeka?

4. Hi ku ya hi 1 Yohan 2:3-6 ni 2 Yohan 4, 6, i yini leswi hi fanelaka ku swi yentxa akuva hi famba xihlayelamfuzrini?

⁴ Loko hi djula ku famba xihlayelamfuzrini, hi fanela ku tiva ntiyiso lowu nga Zritwini dzra Xikwembu Nkulukumba, ku nga Bibele. Handle ka leswo, hi fanela ku ‘bekisa swileleto [swa Yehovha]’. (Dondzra 1 Yohan 2:3-6; 2 Yohan 4, 6.) Yesu a ve xikombiso lexi hetisekiki xa mhunu lweyi a yingisetaka Yehovha. Xileswo, ndlela ya lisima ya ku va hi yingiseta Yehovha i ku landzra mintila ya Yesu hi le kusuhi hi lani hi nga kotaka ha kone.​—Yh 8:29; 1Pe 2:21.

5. I yini leswi hi fanelaka ku tiyiseka ha swone?

⁵ Akuva hi tama hi famba xihlayelamfuzrini, hi fanela ku kholwa leswaku Yehovha hi yene Xikwembu xa xihlayelamfuzri ni leswaku hinkwaswu leswi a hi byelaka a Zritwini dzrakwe ku nga Bibele, i xihlayelamfuzri. Nakone hi fanela ku tiyiseka leswaku Yesu i Mesiya lweyi a dumbisiwiki. Vanyingi namunhla va ganaganeka leswaku Yesu hi yene lwa hlawuliwiki hi Yehovha akuva a va Hosi ya Mfumu wa Xikwembu Nkulukumba. Yohani a hlaye leswaku a ku ni ‘vakanganyisi lavanyingi’ lava a va dzringisa ku djikisa lava a va nga lulamelanga ku yimelela xihlayelamfuzri mayelanu na Yehovha na Yesu. (2Yh 7-11) Yohani a tsrale leswi: ‘I mani lweyi wa madzrimi, loko a nge lweyi a landzrulaka leswaku Yesu i Kriste?’ (1Yh 2:22) Ntxhumu wun’we ntsena lowu hi nga wu yentxaka akuva hi nga kanganyisiwi, i ku va vadondzri lavanene va Zritu dzra Xikwembu Nkulukumba. O va hi ndlela leyo ntsena hi nga kotaka ku tiva leswi Yehovha na Yesu va nga swone. (Yh 17:3) Nakone o va hi ndlela leyo hi taka kota ku tiyiseka leswaku hi le xihlayelamfuzrini.

6. Hi swini swihinga leswi vampswha va kumanaka na swone?

⁶ Vakriste hinkwavu va fanela ku tivonela akuva va nga kanganyisiwi hi filozofiya dzra vhanu. (1Yh 2:26) Ngopfungopfu vampswha va fanela ku tivonela akuva va nga wi a ntlhan’wini wolowo. Alexia, * makwezru wa xisati wa le França lweyi a nga ni 25 wa malembe, a li: “Na ne he ntsrongo, a ni pfilunganyeka miyanakanyu hi leswi misava yi swi dondzrisaka, swa ku fana ni dondzro ya ku titumbulukela ka mintxhumu ni mafilozofiya. Mine a ni patsra ni ku yi zrandzra mimpimiso yin’wana leyi va yi dondzrisaka. Kambe a ni swi vona swi nge swinene ku  pfumela hinkwaswu leswi a va ni dondzrisa xikole na ni nga zanga ni nyika Yehovha mukhandlu wa ku vulavula.” Alexia a dondzre buku ledzri liki A Vida​— Qual a Sua Origem? A Evolução ou a Criação? Hi mavhiki ma nge mangani, swivutiso hinkwaswu leswi a a li na swone swi hlamuliwile. Alexia a li: “Ni tikholwise ha wuswanga leswaku Bibele dzri ni ntiyiso, nakone ni xiye leswaku ku hanya hi leswi dzri swi dondzrisaka hi swone leswi tiselanaka ku nyonxa ni ku zrula.”

7. I yini leswi hi fanelaka ku tivonela leswaku hi nga swi yentxi nakone ha yini?

⁷ Vakriste hinkwavu, lavampswha ni lava kuliki hi ntanga, va fanela ku tivonela akuva va nga tizreli Yehovha nakula hi nkama wun’we va yentxa mintxhumu ya ku biha. Yohani a kandzrakanye leswaku a hi nge fambi xihlayelamfuzrini na hi nkama wun’we hi hanya wutomi lebyi bihiki. (1Yh 1:6) Loko hi djula ku yamukeleka ka Yehovha namunhla ni le nkameni lowu taka, hi fanela ku dzrimuka leswaku yene minkama hinkwayu a vona leswi hi swi yentxaka. Hi ntiyiso wa kone, a ku na xidoho lexi fihlekiki, hikusa mintizro yezru hinkwayu yi ‘le livaleni a mahlweni’ ka Yehovha.​—Hb 4:13.

8. I yini leswi hi fanelaka ku swi bakanya?

⁸ Hi fanela ku bakanya mavonela ya misava mayelanu ni xidoho. Mupostola Yohani a tsrale leswi: ‘Loko hi ku a hi na xihono, ha ku tikanganyisa.’ (1Yh 1:8) A masikwini ya Yohani a vaduki a va hlaya leswaku a swi koteka kuva mhunu a doha ha maxivomu a tlhela a tama a va mughanu wa Xikwembu Nkulukumba. Namunhla hi hanya a xikazri ka vhanu lava pimisaka hi ndlela yoleyo. Vanyingi va hlaya leswaku va pfumela ka Xikwembu Nkulukumba kambe a va pfumelelani ni mavonela yakwe mayelanu ni xidoho, ngopfungopfu lawa ma yelanaka ni timhaka ta tinkuku. Leswi Yehovha a liki i xidoho, ka vhanu lava swa pfumeleleka loko mhunu a djula ku swi yentxa.

9. Xana vampswha va pfuneka hi ndlela yini loko va khomelela ka leswi va swi tivaka swaku i swinene?

⁹ Ngopfungopfu vampswha va nga kutxeteliwa ku vona xidoho hi ndlela leyi vadondzrikulobye ni vatizrikulobye va xi vonaka ha yone. Hi leswi swi yentxekeliki Aleksandar. Yene a li: “Van’hwanyana  van’wana a xikole a va ni sindzrisa leswaku ni famba tinkuku na vone. A va ku leswi a ni nge na n’hwanyana a ni li gay.” Xana u kumana ni ndzringo lowu fanaka? Loko swi li tanu, dzrimuka leswaku a ku khomelela ka leswi wene u swi tivaka leswaku i swinene swa pfuna. Ku yentxa leswi Bibele dzri swi hlayaka swi sizrelela ndlela leyi u tivonaka ha yone, lihanyu dzraku, miyanakanyu yaku ni wuxaka byaku na Yehovha. Nakone loko u ya u tiyiselela ndzringo wa kukazri, u ta va ni ntamu wa ku hlula ndzringo lowu taka landzrela. Nakone u nga dzrivali leswaku mavonela lawa ma hoxekiki lawa misava yi nga na wone mayelanu ni tinkuku ma huma ka Sathana. Xileswo, nkama hinkwawu lowu u yalaka ku pimisa ku fana ni vhanu va misava u ‘hlula lwemfani’.​—1Yh 2:14.

10. Xana 1 Yohan 1:9 yi hi pfuna hi ndlela yini ku tizrela Yehovha hi lipfalu ledzri basiki?

¹⁰ Hi pfumela leswaku Yehovha hi yene a nga ni mfanelo ya ku hlaya leswi i nga xidoho ni leswi swi nga liki xidoho. Nakone hi yentxa hinkwaswu leswi hi nga swi kotaka akuva hi nga yentxi xidoho kambe loko hi txhuka hi doha hi swi byela Yehovha hi xikhongoto. (Dondzra 1 Yohan 1:9.) Nakone loko hi yentxa xidoho lexikulu hi djuletela mpfunu wa vakulu. Vone va bekiwe hi Yehovha akuva va hi hlayisa. (Yk 5:14-16) Nambitanu, hi fanela ku tivonela akuva hi nga tsrhameli ku titwa nandzru hi swidoho leswi hi swi yentxiki khale. Phela Tatana wezru wa lizrandzru a nyikeli N’wanakwe swanga xitizrulo hi nkonta ya swidoho swezru. Nakone loko Yehovha a dzrivalela mudohi lweyi a tisolaka, a mu dzrivalela hakunene. Xileswo, hi nga tizrela Yehovha hi lipfalu ledzri basiki.​—1Yh 2:1, 2, 12; 3:19, 20.

11. Hi nga yi sizrelelisa kuyini miyanakanyu yezru ka tidondzro leti tsranisaka lipfumelo?

¹¹ Hi fanela ku bakanya tidondzro ta vaduki. Ku sukela a ku sunguleni ka bandla dzra wukriste, Diyavulosi a dzringisa ku tsranisa lipfumelo dzra malandzra ya ku dumbeka ya Xikwembu Nkulukumba. Xileswo, hi fanela ku tiva ku hambanisa leswi nga ntiyiso ni leswi nga madzrimi. *  Valala vezru va nga tizrisa maredi sosiyali kumbe internet akuva va dzringisa ku tsranisa lipfumelo dzrezru ka Yehovha ni lizrandzru dzrezru hi vamakwezru. Minkama hinkwayu dzrimuka leswaku hi mani lweyi a hlohlotelaka hinkwaswu leswo nakone bakanya madzrimi lawo!​—1Yh 4:1, 6; Mpf 12:9.

12. Ha yini hi fanela ku tiyisa lipfumelo dzrezru?

¹² Loko hi djula ku tiyiselela nhlaselo wa Sathana, hi fanela ku yengesela lipfumelo dzrezru ka Yesu Kriste hi tlhela hi dumba ndlela leyi Yehovha a mu tizrisaka ha yone akuva a hetisisa ku zrandzra Kwakwe. Nakone hi fanela ku dumba lava Yehovha a va tizrisaka akuva va kongomisa nhlengeletanu yakwe. (Mt 24:45-47) Hi nga yengesela lipfumelo dzrezru hi ku dondzra Zritu dzra Xikwembu Nkulukumba siku ni siku. Xileswo, lipfumelo dzrezru dzri ta fana ni nsinya lowu mitsru ya wone yi yentiki ngopfu swinene. Pawulo a byeli leswi fanaka vakriste va le bandleni dzra le Kolosa, a te: ‘Swanga hi leswi n’wi yamukeliki Kriste Yesu, Hosi, fambani ku yene, n’wi dzimeka mitsru ku yene, n’wi va n’wi yakiwa ku yene, n’wi tiya ku pfumeleni.’ (Kl 2:6, 7) Loko mukriste a yentxa hinkwaswu leswi a swi kotaka akuva a va ni lipfumelo ledzri tiyiki, nambi ku li Sathana kumbe lava hlohloteliwaka ha yene a va nge swi koti ku mu sivela akuva a famba xihlayelamfuzrini.​—2Yh 8, 9.

13. I yini leswi hi fanelaka ku swi yimela nakone ha yini?

¹³ Hi fanela ku yimela ku vengiwa hi misava. (1Yh 3:13) Yohani a hi dzrimuxa leswaku ‘a misava hinkwayu mi tsrhami ku lwemfani’. (1Yh 5:19) Leswi wugamu bya xiyimu lexi byi yaka byi tsrhindzrekela, Sathana a ya a hlundzruka hi ku tlulisa. (Mpf 12:12) Yene a nga hi hlaseli hi tindlela ta ku tumbela ntsena, ta ku fana ni ku beka ntlhamu akuva hi wela ka wuwoswani kumbe hi ku tizrisa madzrimi ya vaduki, kambe yene a tlhela a hi hlasela hi ku kongoma hi ku tizrisa nxanisa lowukulu. Sathana awa swi tiva leswaku e saleliwa hi nkama wutsrongo akuva a dzringisa ku yimisa ntizro wezru wa ku zrezra ni ku tsranisa lipfumelo dzrezru. Xileswo a swi hi hlamalisi ku vona yin’we ya mintizro yezru yi yimisiwa kumbe yi tsimbisiwa hi ku helela a matikweni manyingi. Nambitanu, vamakwezru lava tsrhamaka a mimbangwini leyo va ya mahlweni va tiyisela. Vone va tiyisekisa mhaka ya leswaku nambi loko ‘lwemfani’ a dzringisa ku yentxa yini na yini, hi nga swi kota ku hlula!

14. Hi tini tindlela leti hi nga pfunaka vamakwezru ha tone akuva va tama va famba a ntiyisweni?

¹⁴ Akuva hi pfuna vamakwezru leswaku va tama va famba ntiyisweni hi fanela ku va kombisa ntwelawusiwana. (1Yh 3:10, 11, 16-18) Hi fanela ku kombanana lizrandzru ku nga li ntsena loko mintxhumu yi hi fambela ha hombe kambe ni loko ku humelela swikazratu. Hi xikombiso, xana u tiva makwezru wa kukazri lweyi a luzekeliwiki hi muzrandzriwa wakwe, a vilelaka ku txhaveleliwa kumbe mpfunu wa kukazri? Xana u yingeli hi ta vamakwezru va kukazri lava weliwiki hi timhangu ta ntumbuluku lava vilelaka mpfunu akuva va pfuxeta Tiyindlu ta Mfumu kumbe tiyindlu tavu? Hi kombisa leswi hi va zrandzrisaka xiswone vamakwezru ni ntwelawusiwana lowu hi nga na wone ha vone ku nga li ntsena hi leswi hi swi hlayaka, kambe ngopfungopfu hi leswi hi swi yentxaka.

15. Hi ku ya hi 1 Yohan 4:7,8, i yini leswi hi fanelaka ku swi yentxa?

¹⁵ Loko hi kombanana lizrandzru, hi yetisela Tatana wezru wa le tilweni, Yehovha. (Dondzra 1 Yohan 4:7, 8.) Ndlela yin’we ya ku kombisa lizrandzru ha yone i kuva hi dzrivalelana. Hi xikombiso, mhunu wa kukazri a nga ha hlaya ntxhumu lowu hi khunguvanyisaka ntsrhaku a kombela lidzrivalelo. Hi kombisa lizrandzru ledzri hi nga na dzrone hi mhunu lweyo hi ku mu dzrivalela hi va hi dzrivala leswi yentxekiki. (Kl 3:13) Makwezru lweyi a vitaniwaka Aldo a kumane  ni xikazratu lexo loko makwezru wa kukazri lweyi a a mu hlonipha ngopfu a khanele ku biha hi vhanu va lixaka dzrakwe. Aldo a li: “Ni khongote ngopfu ni kombela Yehovha leswaku a ni pfuna akuva ni nga pimisi ku biha hi makwezru lwiyani.” Nakone Aldo a nga yimanga lanu. A kunguhate ku zramba makwezru lwiyani akuva va huma xikan’we nsimu. Loko va li kazri va zrezra, Aldo a tlhamuxele ndlela leyi a khumbekiki ha yone hi leswi a swi yentxekile. Aldo a li: “Loko a yingele leswi ni titwisiki xiswone hi leswi a a swi yentxile a kombele lidzrivalelo. Hi makhanelelo yakwe ni kote ku vona leswaku a a tisola. Hi tlhele hi pfuxeta wunghanu hi tlhela hi tsrhika hinkwaswu leswiyani swi khaluta.”

16-17. I yini leswi hi fanelaka ku tiyimisela ku swi yentxa?

¹⁶ Mupostola Yohani a a va zrandzra vamakwavu, nakone a a zron’weka ngopfu hi wuhlayiseki byavu bya moya. Leswo swi voneka ha hombe ka swilayu leswi a swi nyikiki vamakwezru volavo ka mapapela yakwe ya mazrazru lawa ma huhuteliwiki. Swi nyonxisa ndjhani ku tiva leswaku vavanuna ni vavasati lava nga ni lizrandzru va ku fana na Yohani va totiwile akuva va ta fuma na Yesu a matilweni!​—1Yh 2:27.

¹⁷ I swa lisima ku swi tekela nhlokweni swilayu leswi hi swi yamukeliki ka xidondzro lexi. Tiyimisele ku tama u famba a xihlayelamfuzrini, u tama u yingiseta Yehovha a swiyin’wini hinkwaswu swa wutomi byaku. Dondzra Bibele u tlhela u dumba leswi dzri swi dondzrisaka. Tiyisa lipfumelo dzraku ka Yesu. Bakanya mafilozofiya ya vhanu ni tindondzro ta vaduki. U nga wi ntlhan’wini wa ku tizrela Yehovha nakula u yentxa mintxhumu leyi bihiki nakone u nga va yingiseti lava dzringisaka ku ku hlohlotela leswaku u yentxa leswi bihiki. Hanya hi ku landzra milawu ya Yehovha ya mahanyela. Nakone pfuna vamakwenu akuva va tama va tiya a ntiyisweni hi ku dzrivalela lava ku khunguvanyisaka ni ku pfuna lava va vilelaka. Hi ndlela leyo, nambi loko hi kumana ni swikazratu hi ta tama hi famba a xihlayelamfuzrini.