Xana Xikwembu Nkulukumba A Kone Mimbangwini Hinkwayu?
Nhlamulo ya Bibele
Xikwembu Nkulukumba awa swi kota ku vona mintxhumu hinkwayu ni ku yentxa yini na yini a mimbangwini hinkwayu leyi a yi djulaka. (Amaproverbia 15:3; Ba-Heberu 4:13) Nambitanu, Bibele a dzri dondzrisi swone leswaku Xikwembu Nkulukumba a kone ka mimbangu hinkwayu ni ka yini na yini. Matsrhan’wini ya swoswo, dzri komba leswaku i mhunu ni leswaku a tsrhama ka wuyako bya kukazri.
Xivumbeko xa Xikwembu Nkulukumba: Xikwembu Nkulukumba i mhunu wa moya. (Yohan 4:24) A nga voniwi hi vhanu. (Yohan 1:18) Swivoniso swa Xikwembu Nkulukumba leswi tsraliwiki a Bibeleni minkama hinkwayu swi mu kombisa swanga lweyi a nga ni mbangu wa ku kongoma lowu a tsrhamaka ka wone. A ngi ngi sama a kombisiwa swanga lweyi a kumekaka mimbangu hinkwayu.—Ezaya 6:1, 2; Apfuletelo 4:2, 3, 8.
Wuyako bya Xikwembu Nkulukumba: Xikwembu Nkulukumba a tsrhama a wuyakweni bya moya, lebyi hambanaka ni ntumbuluku lowu voniwaka. A ndzreni ka wuyako lebyo, Xikwembu Nkulukumba a tsrhama ‘le tilwini a wuyakwini byakwe’. (1 Tihosi 8:30) Bibele dzri khanela hi nkama wa kukazri lowu swivumbiwa swa moya swi yiki “yima mahlweni ka Yehovha”, * ku komba leswaku hi ndlela leyo, Xikwembu Nkulukumba a tsrhama ka mbangu wa ku kongoma.—Yob 1:6.
Loko Xikwembu Nkulukumba a nga li kone mimbangwini hinkwayu, xana a nga ni pfuna hi ku kongoma?
Ina. Xikwembu Nkulukumba a zron’weka swinene hi mhunu mun’wana ni mun’wana. Nambi leswi a hanyaka a wuyakwini bya moya, Xikwembu Nkulukumba awa va vona lava hakunene va djulaka ku mu nyonxisa a misaveni, nakone awa va pfuna. (1 Tihosi 8:39; 2 Makronika 16:9) Vona ndlela leyi Yehovha a kombisaka ha yone leswaku awa zron’weka hi vagandzreli vakwe va ntiyiso:
Loko u khongota: Yehovha a nga yingiseta xikhongoto xaku hi nkama lowu u xi hambaka ha wone.—2 Makronika 18:31.
Loko u li ku xukuvaleni: ‘A hosi [Yehovha] yi li kusuhi ni lava nga ni mbilu leyi tsrhovekiki; yone yi huluxa lava xanisiwaka moyeni.’—Amapsalma 34:18, Testamente Ledrimpswha Ni Mapsalma.
Loko u djula ku kombiwa ndlela: Yehovha a ‘ta ku Dondzrisa, [a] ta ku komba ndlela’ hi ku tizrisa Zritu dzrakwe, a nga Bibele.—Amapsalma 32:8.
Miyanakanyu leyi hoxekiki mayelanu ni ku va Xikwembu Nkulukumba a li mimbangwini hinkwayu
Miyanakanyu leyi hoxekiki: Xikwembu Nkulukumba a kone mimbangwini hinkwayu ka ntumbuluku.
Ntiyiso: Xikwembu Nkulukumba a nga tsrhami misaveni nambi wuyakwini byin’wana lebyi voniwaka. (1 Tihosi 8:27) I ntiyiso leswaku tinyeleti ni mintxhumu yin’wana leyi tumbuluxiwiki ‘swi hlaya ku phatima ka Xikwembu Nkulukumba’. (Amapsalma 19:1) Kambe Xikwembu Nkulukumba a nga tsrhami ka ntumbuluku wake ku fana ni leswi mupendi a kalaka a nga tsrhami ka ntxhumu lowu a wu pendiki. Kambe, ntxhumu lowu pendiwiki wu nga hi byela swa kukazri hi mupendi wa kone. Hi ku fanana, tilo ni misava leswi voniwaka swi hi byela xa kukazri hi ‘leswi nga voniwikiki swakwe’, a nga matsrhamela ya ku fana ni ntamu, wutlhazri ni lizrandzru.—Ba-le-Roma 1:20.
Miyanakanyu leyi hoxekiki: Xikwembu Nkulukumba a fanela ku va kone mimbangwini hinkwayu akuva a kota ku tiva mintxhumu hinkwayu ni kuva a ta va wa ntamu hinkwawu.
Ntiyiso: Moya wa ku xwenga wa Xikwembu Nkulukumba i ntamu wakwe lowu tizraka minkama hinkwayu. Hi moya wakwe lowa ku xwenga, Xikwembu Nkulukumba a nga vona a tlhela a yentxa xin’wana ni xin’wana, kwini na kwini, nkama wini na wini, na swi nga vilelanga kuva a va kone hi ximhunu.—Amapsalma 139:7.
Miyanakanyu leyi hoxekiki: Amapsalma 139:8 yi dondzrisa leswaku Xikwembu Nkulukumba a kone mimbangu hinkwayu loko yi ku: ‘Loko ndzra ku ntlhantukela tilwini, u kone wene; loko ndzra ku yetlela Xeyole, u kone wene.’
Ntiyiso: Ndzrimana leyi a yi khaneli hi mbangu lowu Xikwembu Nkulukumba a nga ka wone. I xithokozelo lexi dondzrisaka leswaku a ku na mbangu ni wun’we lowu nga kule swinene lakakuva Xikwembu Nkulukumba a nga tsrandzreka ku hi pfuna.
^ par. 3 Yehovha i vito dzra Xikwembu Nkulukumba hi lani swi paluxiwiki ha kone a Bibeleni.
You May Also Like
SWIVUTISO LESWI HLAMULIWAKA HI BIBELE
Xana I Yini Moya Lowa Ku Xwenga?
Hi xivangelo lexi twalaka, Bibele dzri hlaya leswaku moya lowa ku xwenga i “mandla” ya Xikwembu Nkulukumba.
MAYELANU NI TIMBONI TA YEHOVHA
Kombela ku Yendzreliwa Hi Timboni Ta Yehovha
Bula hi timhaka ta Bibele ni Timboni Ta Yehovha, kumbe u dzringisa ku yamukela xidondzro xa Bibele mahala.