FAMÖR miliön ma‘oi pạu ‘e rȧnte‘ ‘atakoa ‘inea a‘lelei ro‘ạitut ne ‘ea ‘Otomis Ö‘fa, ne Ro‘ạit ‘on Gagaja. Ma ‘on kạinag ‘ea‘ea he ruạ se ro‘ạit rogot ne Jisu Karisto na la ta‘ag mạl het ne ‘is la rakoa ‘e ‘os roro‘ạitu. Ro‘ạit te‘is ‘es fuạg pạu, ‘Ou sạkiroag se te mumuạ fol ne täe ‘e ro‘ạit te‘ täla hạiasoagan ‘äe la rakoa te ma‘oi hoi‘ȧk ‘e reko te ne Puk Ha‘a rak‘ȧk aire.

² ‘E kamatag ne ro‘ạit te‘is, Jisu fas‘ȧk se iris ne ‘oaf la a‘fại se iạ: “Ma ta‘ag, ‘au la ro‘ạit tape‘: ‘Otomis Ö‘fāat täe ‘e lạgi! ‘Ou asa la ȧf‘ȧk la ma‘ma‘, ‘ou pure‘aga la leum, ‘ou rere la sok-fak ma ‘e lạgi, la tape‘ma ‘e rȧn te‘.” (Mataio 6:9-13) Tes tä ‘on ‘es‘ao ne tē fol ne ‘eam?

³ ‘Is rak vạhia te ma‘oi pạu hün se as ‘on ‘Ạitu, Jihova. Ma ‘is hạifäegag tape‘ma ‘e reko ‘amnȧk ‘on ‘Ạitu—te ne iạ re vạhia, ma te ne iạ tälạ rē se ‘is famori ‘e ‘on fakmuri. Tes tä Jisu ‘ạligen ‘e avat ne iạ ‘ea e ‘ạus la ro‘ạit tape‘: “Ou pure‘aga la leum”? Tes tä Pure‘ag ‘on ‘Ạitu? ‘On la leugame iạ la a‘ma‘ma‘ȧk tapen as ‘on ‘Ạitu? Ma Pure‘ag ta ‘on la leugame, iạ la hạigarueag tapen, ma ‘on la reag ne ‘amnȧk ‘on ‘Ạitu?

TES TÄ PURE‘AG ‘ON ‘ẠITU

⁴ Pure‘ag ‘on ‘Ạitu iạ tä matantūut ne Jihova ‘Ạitu fu‘ȧk vạhia ma ‘on Sạut ne iạ hil vahiạ la puer. Sei täla Sạu ne Pure‘ag ‘on ‘Ạitu? Jisu Karisto. Jisu iạ Sạut ne lamlam se‘ ‘e sạu tutu ‘atakoa ne puer ‘e te‘ ne famör puer ‘atakoa ma he‘ iạ la “Sau ‘on te‘ ne sau, ka Gagaj ‘on te‘ ne gagaja.” (1 Timoti 6:15) Iạ ‘es ne‘ne‘ la re‘ia tēet ne lelei a‘ti se‘ ‘e ta puer fakfamorit.

⁵ Pure‘ag ‘on ‘Ạitu la purem ‘e tei? Ka, tei Jisu? ‘Äe la pola a‘häe‘ȧk ne iạ al ‘e ‘ại ne mamạua, ma täe iạ fu‘ȧk hoi‘ȧk se‘. Ma kat roa ra, ka iạ leu se‘ se hevạni. (Garue 2:33) Ta‘ag, utut ne Pure‘ag ‘on ‘Ạitu täe—‘e hevạni. Tä ‘on‘on Puk Ha‘ a ‘ea e “pure‘ag faklạgi.” (2 Timoti 4:18) Ma aier Pure‘ag ‘on ‘Ạitu täe ‘e lạgi, ka iạ la purem se rȧnte‘.—Kel‘ȧk Tē 11:15.

⁶ Hün se teset tä Jisu iạ Sạu pumuet? ‘On tā ne te, iạ kal al ra ‘e ta av. La a‘tatạu‘ạkia Jisu se sạu fakfamori, Puk Ha‘a ‘ea ne “ia ‘esea tä ‘on‘on mȧür se ‘es a‘ofiga; ka ia noh ‘e tafat ne noanoa la le‘et la ‘ut‘utuag sin.” (1 Timoti 6:16) ‘On fuạga te‘ ne te ‘es‘ao ne Jisu la rē e la fumou.

⁷ Re a‘häe se fäeag parofesại ne täe ‘e Puk Ha‘a hün se Jisu: “Ma ‘At ‘on Jihova la nōnō ma ‘e ia, ‘at ne poto ma huạg ‘atmại, ‘at ne puer‘ȧk tē ma vahia tē. ‘At ne ‘inea tē ma fea se Jihova. Fea se Jihova la tä‘mä tē a‘värväret se ia; Ma ‘on puer a‘lelega kal tuk ra se tē ne ‘on mafa kel sin; ma puret ne ia la rē kal tuk ra se tē ne ‘on faliga aja‘ sin ka ‘e rer ne ‘on ag nonojo ia la puer a‘lelea tē ne mou se iris ne keia, ma ‘e puer a‘tatau ia la re puer se iris ne huạg vạivại ‘e rȧn te‘.” (Aisea 11:2-4) Fäeag ‘o kel‘ȧk ne Jisu täla Sạu ne ag nonojo ma mäeav hanisi se famör ne täe ‘e rȧnte‘. Tei ka ‘äe la ‘oaf la ‘es ‘e kạinag gagaj puer tape‘ ta?

⁸ Te‘is te aier hoi‘ạkit hün se Pure‘ag ‘on ‘Ạitu: Jisu kal puer ra ‘e iạ ‘esea het. Ma ‘on famör hoi‘ȧk la puer ag‘esea ma iạ. La fakse te ne, ‘apostol ta Paula ‘ea se Timoti: “Kepoi ka ‘is röt‘ȧk tē, ma ‘is täla sauag ‘esea ma ia.” (2 Timoti 2:12) ‘I, Paula, Timote, ma iris lelea‘ huạg aier ‘e ‘on rerege tä ‘Ạitu hil la puer ag‘esea ma Jisu ‘e ‘on Pure‘ag fakhevȧn ta. Tapen ‘on la ma‘oi ne iris ne täla po‘ia ạlạlum‘ạkiag ta‘ag?

⁹ La fakma ne kel‘ạkimea ‘e Väe 7 ne puk hete‘is, te räe‘ạkit ne na vạhia se ‘apostol ta Jone ne iạ ‘io ka “Läm ta [Jisu Karisto] fūfūen ‘e Saioni, sol ta [‘on fūạg faksạu te hevạni], ia ma ta le‘ äf tarau ma häkeaghul ma häk, ma fȧ‘ vạhia ‘e ‘oris motara as ‘on Läm ta ma as ‘on Ö‘fā ta.” Sei ta iris 144,000 ta? Jone iạ ‘ea tape‘ se ‘isa: “Te‘is iris ne taupir ma kikia se Läm ta, ka ‘inea ne ia la‘ se tei. ‘Äna iris tög ma sại‘ȧk vȧh ‘e gasav ‘on famori, ma iris maf moea se ‘Ạitu ma se Läm ta.” (Kel‘ȧk Tē 14:1, 4) ‘I, iris ‘i ta huạg aier ka tạupir se Jisu Karisto ne hil vạhia la puer ag‘esea ma iạ. Avat ne iris ala e ma täla fu‘ȧk hoi‘ȧk se‘ iris se mạurit te hevạni, “ma iris puer faksạu se rȧn te‘” ma Jisu. (Kel‘ȧk Tē 5:10, NW) Kamatama ‘e av ‘on apostolo, ‘Ạitu hilia lelea‘ rot fakKaristo huạg aire la pola ‘atakoa‘ạkia maf ne fiạk ta 144,000 ta.

¹⁰ Fu‘ȧk te hanisit te‘is la hilia Jisu ma 144,000 ta la purea ‘is famori. ‘E reko Jisu noh fakfamör vạhia ma iạ ‘inea pạu te a‘ru ne famori agagtạu mar. Paula ‘ea ‘e reko Jisu “Ne ‘eake ‘is ma ‘ape‘ạit ti‘ut ne kat pō ra la rūag ‘esea ma ‘is ‘e ‘os ‘af‘af tūtū: ‘is pō aier ‘ape‘ạitut ne tȧr faksar vạhia ‘e te‘ ne tē tūtū ‘atakoa la fak ma ne ‘is, mane ia kat sar ra ‘e ta av.” (Hiperiu 4:15; 5:8) Iris tape‘ma ne la puer ag‘esea ma Jisu agtạu ma te a‘ru ka fūmou ‘e avat ne iris noh fakfamori. Te hoi‘ạkit, iris famör agraksa‘ ka iris na ‘oris vahia ma po tape‘ma la tạria te‘ ne kạinag ‘af‘afa. Te aier pạu, iris pola ‘inea pefä‘ ne agtạu se mȧür ‘on famori!

TĒ NE PURE‘AG ‘ON ‘ẠITU LA A‘SOKO

¹¹ ‘E avat ne Jisu ‘ea e la ‘on tisaipeli la ro‘ạit ma far‘ȧk la Pure‘ag ‘on ‘Ạitu la leum, iạ ‘ea tape‘ma la iris la far‘ȧk la ‘amnȧk ‘on ‘Ạitu la sok “la fak ma ‘e lagi, la tape‘ma ‘e rȧn te‘.” Ạitu täe ‘e hevạni, ma ‘on ager ne huạg aire a‘sok hạisokoag ‘on ‘amnạki ‘e täe. ‘E Väe 3 ne puk hete‘is, ‘is rak vạhia ne ‘ager raksa‘at toak ‘e re ne ‘amn‘ȧk ‘on ‘Ạitu ma iạ re‘ia ‘Atama ma ‘Ive la agraksa‘. ‘E Vae 10 ta, ‘is täla rak te ma‘oi hoi‘ȧk ne Puk Ha‘ a ‘ea aier hün se ‘ager raksa‘ ta‘, ne ‘is ‘inea ne iạ ta Satan ta ka Tiapol ta. Satan ta ma ‘on kạu ‘agero, iris tē fak‘at fup‘ạkit ne hil la tạupir se iag—iris ‘i ne he‘ timonio—ne aier‘ȧk la noh ‘e lạgi ‘e ta av luket. ‘Eake iris ‘atakoa ne täe ‘e lạgi re‘ia ‘amnȧk ‘on ‘Ạitu ‘e av heta‘ag. Te ‘o la jen ‘e avat ne Pure‘ag ‘on ‘Ạitu la kamatan ‘on pure. Sạut ne kotä ma fu‘ȧk se‘ ma la pure, Jisu Karisto, iạ täla pelua Satan ta.—Kel‘ȧk Tē 12:7-9.

¹² Fäeag parofesại ‘i fäeag‘ạkia te ne täla soko: “Ma tä gou aja‘ se ta lio ti‘ ‘e lạgi, ne ‘eag, “Kotä hele‘umea ‘e ‘on ‘i‘i a‘mȧür‘ạkiag ta, ma ne‘ne‘ ta, ma pure‘ag ne ‘os ‘Ạitu, ma puer ne ‘on Karisto: ne ko‘ạkiag ne ‘os sạsigi [Satana] kir‘ȧk sio, ia ne koko‘ȧk iris ‘e mua ne ‘os ‘Ạitu ‘e rȧn ma pög!” (Kel‘ȧk Tē 12:10) Tei ka ‘äe räe se te ‘es‘ao he ruạ ne kel‘ȧk ‘e ut ne puk hete‘? ‘On tā, Pure‘ag ‘on ‘Ạitu ‘e fȧn puer ‘on Jisu Karisto, kamatana ‘on pure. ‘On rue, Satan ta kir‘ạkimea ‘e lạgi se rȧnte‘.

¹³ Tes tä ‘is räe ‘e reko te ruạ ne soko? ‘E reko te ne sok ‘e hevạni, ‘is hat tape‘: “Ma te‘is ‘au la ‘oaf ko lạgi, ma ‘aus ne noho e!” (Kel‘ȧk Tē 12:12) ‘I, ‘ager huạg aier ne täe ‘e hevạni ‘oaf‘oaf po ‘e, Satan ta ma ‘on timonio ‘ut‘ȧk vạhiạ, ma te‘ ne iris ne täe ‘e hevạni huạg aier se Jihova ‘Ạitu. ‘E täe fürmaria ma hạia‘leleiga ‘atakoa. ‘Amnȧk ‘on ‘Ạitu sokoana ‘e hevạni.

¹⁴ Ka tapen se rȧnte‘? Puk Ha‘a ‘ea: “Uoi rȧn ta ma sȧs ta! Ko tiapol ta puofua se ‘aura, ka ia ma fek ti‘u, ne ia ‘inea ‘on ava luạk ma.” (Kel‘ȧk Tē 12:12) Satan ta fek pạu ‘e reko iạ kir‘ạkimea ‘e lagi ma ‘on ava luạk. ‘E ‘on feke iạ ho‘im te a‘ru “uoi” ne täe ‘e rȧnte‘. ‘Is täla rakoa te ma‘oi hün se te a‘rū “uoi” ‘e väet ne tohim sin. Ma ‘e ‘os a‘häe‘ạkiag ne te a‘ru ‘i, ‘is la pola saio‘, Pure‘ag ta la po tapen la a‘sokoa ‘amn‘ȧk ‘on ‘Ạitu ‘e rȧnte‘?

¹⁵ Ma ‘äe la a‘häe‘ȧk ne tes tä ‘amn‘ȧk ‘on ‘Ạitu se rȧn te‘ ne ‘äe rak vạhiạ ‘e Väe 3 ta. ‘Ạitu kel‘ȧk vạhia ‘e ‘Iteni ne ta‘ag ‘on ‘amnạki se rȧnte‘ la parataisi ka la huȧ‘ ‘e famör ag nonoj ne kal al ra. Satan ta re ‘Atama ma ‘Ive la agraksa‘, ma a‘fep‘ạkia ‘amnȧk ‘on ‘Ạitu la se sok ‘e rȧn te‘, ka ‘on ‘amnạki kat jen ra. Jihova ‘on ‘amnạki la “famör ag nonojo, iris täla a‘moua hanue ta, ma noho e se av se ‘es tohiget ne tore.” (Salamo 37:29) Ma Pure‘ag ‘on ‘Ạitu täla a‘sokoa te ta‘ag. ‘E sal teset?

¹⁶ Re a‘häe se fäeag parofesại ne täe ‘e Taniela 2:44. Ne hat tape: “Ma ‘e av ne sau ‘og ‘Ạit ne lạgi täla fū‘ȧk ta pure‘agat ne kal pō ra la a‘raksa‘ȧk ‘e ta av, ma ‘on pure kal rou ra se ta kạinag famör tū; ka pure‘ag ta täla kaokaoa ma a‘ofia te‘ ne pureag ‘atakoa ‘og, ma la fūmou se av se ‘es gata‘agat ne tore.” Tes tä ‘ea ‘e reko Pure‘ag ‘on ‘Ạitu?

¹⁷ Te mumue ta, iạ rak‘ȧk se ‘isa ne Pure‘ag ‘on ‘Ạitu fuena “e av ‘on sau ‘og,” ne ‘e avat ne pure‘ag tutu puer la‘ mo. ‘On rue, iạ rak‘ȧk se ‘isa ne Pure‘ag ta täla fumou se av se ‘es a‘ofiget. Pure‘ag ta kal po ra la fakrava‘ȧk ‘e ta matantu hoi‘ạkit. ‘On fol ne te, ‘is räe ne Pure‘ag ‘on ‘Ạitu täla pelua pure‘ag ‘atakoa ne rȧnte‘ ma iạ täla maro. Ma ‘e ‘on fakmuri, matantu ‘esea te‘is la puer se famör ‘atakoa. Kotä famori la ‘oaf ‘e ta fȧn puer lelei pạut ne iris kat ‘inea ra ‘e ta av.

¹⁸ Puk Ha‘a ma ‘on te ma‘oi la rak‘ȧk se ‘isa hün se pel fakmür ne Pure‘ag ‘on ‘Ạitu ma matantu ne rȧnte‘. Ia rak‘ȧk ne avat ne a‘ofiạg ta la hele‘ue, ‘at se ma‘ma‘a la forȧs‘ạkia rog sioksiko la hoa‘ sesean “sau ne te‘ ne hanuạ ‘atakoa.” Ka fuạg se tese? “La tauna‘iag ‘esea iris [sạu] se pel ne terȧn ti‘ ‘on ‘Ạitu, Ia ne ‘atakoa se ma ‘on ne‘ne‘i.” Sạu ne rȧn te‘ ‘atakoa täla tạuna‘iạg ‘esea se “utut ne he‘ ‘e fäeag Hiperiu Har Maketo.” (Kel‘ȧk Tē 16:14, 16) ‘E reko te ne ‘ea ‘e ut ne puk he ruạ ‘i, pel fakmür ne matantu fakfamori ma Pure‘ag ‘on ‘Ạitu iạ he‘ Har Maketo ne ‘Amaketoni.

¹⁹ Tes tä Pure‘ag ‘on ‘Ạitu pola re ‘e reko ‘Amaketoni? Re a‘häe hö‘ ne tes tä ‘amnȧk ‘on ‘Ạitu se rȧnte‘. ‘Amn‘ȧk ‘on Jihova ‘Ạitu la rȧnte‘ la huȧ‘ ‘e famör ne ‘atakoa, ag nonoj ma titi‘ak se iag ‘e Paratiạs ta. Ka hün se teset te ‘i kat sok ra ‘e ‘on ‘i‘i? ‘On tā, ‘is agraksa‘, ‘is kop la mafuạ ma al. Is rak vạhia ‘e Väe 5 ta, ne Jisu al ‘e reko ‘is la ‘is la po mȧür se ‘es gata‘aga. ‘Äe la pola a‘häe‘ȧk fäeag ne fȧ‘ ‘e Kospel ‘on Jone: “Ne ‘e fuạmamạu ne hanis ‘on ‘Ạitu se rȧn te‘, ia na ‘on Le‘ ‘eseat ma ne ia ‘ese, la le‘et ma ne pilif se ia la se mao, la ia la pō ma mȧür se ‘es gata‘aga.”—Jone 3:16.

²⁰ Ma ‘on pefä‘ hoi’ȧk sok se famör ma‘oi ne a‘mou rere te mam‘as. Iris sioksiok, ag rösrös, ma väe häk. Iris pa kat re‘ia ra ‘amnȧk ‘on ‘Ạitu. Famör ne rere te mam‘asa täla a‘raksa‘ȧk ‘e pel ‘on ‘Ạitu ‘e Har Maketo. (Salamo 37:10) Hün hoi‘ȧk het ne ‘amnȧk ‘on ‘Ạitu kat sok ra ‘e rȧnte‘ po ‘e matantū kat a‘ne‘ne‘ạkia ra famori la re te ‘i. Matantu ma‘oi kat ‘es ne‘ne‘ ra, re te mam‘as, ma re ag se nonojo. Puk Ha‘a ‘ea a‘taf pạu ne: “Famör ma‘oi ‘es puer, ma lelea‘ ma‘oi hoi‘ȧk tȧr tē a‘rū ‘e ‘oris noh a‘fạit se irisag.”—Le‘ Marag ta 8:9.

²¹ ‘E vạhiag ne Har Maketo, famori la noh ‘e fȧn puer ne matantu ‘eseat, Pure‘ag ‘on ‘Ạitu. Pure‘ag ‘on ‘Ạitu täla a‘sokoa ‘on ‘amnạki ma ho‘am ạlạlum‘ạkiạg helavat. Pure‘ag ta täla ‘ut‘ȧk pạua Satan ta ma ‘on timonio. (Kel‘ȧk Te 20:1-3) Ma ne‘ne‘ ne rạu‘if ‘on Jisu täla garue‘ȧk la pola famör huạg aire la toak pạu ‘e ‘af‘af ne al. Ka, ‘e fȧn puer ne Pure‘ag ta iris ‘i la po mȧür se av se ‘es a‘ofiget. (Kel‘ȧk Tē 22:1-3) Rȧnte‘ la hele‘ la parataisit. Pure‘ag ta täla a‘sokoa a‘mnȧk ‘on ‘Ạitu ‘e rȧnte‘ ma täla a‘ma‘ma‘ạkia as ‘on ‘Ạitu. Tes tä ‘on fuạga? ‘On fuạga avat ne Pure‘ag ‘on ‘Ạitu la pure, famör ‘atakoa ne mạuri täla a‘kölör‘ạkia as ‘on Jihova.

‘E AV HES TÄ PURE‘AG ‘ON ‘ẠITU LA KAMAT LA PURE?

²² ‘E avat ne Jisu ‘ea se ‘on lelea‘ rak te la ro‘ạit, “Ou Pure‘aga la leum,” iạ kel‘ȧk a‘taf ne Pure‘ag ta kat seminte fu ra ‘e av heta‘ag. Tei ka iạ fu ‘e avat ne Jisu leu se‘ se hevạni? ‘Igke‘, ‘e reko Pita ma Paula ‘ea ag‘esea ne ‘e vạhiạg ne fu hoi‘ạkiạg ‘on Jisu, ma kotä fäeag parofesạit ne täe ‘e Salamo 110:1 ta sok hün se iag: “Jihova ‘eag se ‘otou Gagaja, ‘Äe la päe sio ‘e ‘otou si‘ hap ‘atmại ta. La hele‘ se ‘otou la rēag ne ‘ou firi la ‘ou fūag lā.” (Garue 2:32-35; Hiperiu 10:12, 13) Ma kop la tȧr‘ȧk ta avat.

²³ Ka tapen ‘on roa? ‘E laloag ne ‘on 19 ma 20 ne senjuri, lelea‘ rak Puk Ha‘ ne huạg aire kamat la räe ne av heta‘ la vȧh ‘e 1914. ‘E reko terȧn ta‘ag, ‘io se ‘Onasoa. Tē ne soksok ‘e rȧnte‘ ne kamatam ‘e fạu 1914 ta ‘aier‘ȧk ne tē ne iris lelea‘ rak Puk Ha‘ huạg aire räe noj. ‘On a‘sokoag ne fäeag parofesại kel‘ȧk ne ‘e fạu 1914, Karisto ta fu la Sạu ma Pure‘ag fakhevȧn ‘on ‘Ạitu kamatan ‘on pure. Ta ‘on‘on ‘is noh ‘e ‘av luak‘ het ne tör se‘ se Satan ta. (Kel‘ȧk Tē 12:12; Salamo 110:2) ‘Is pola ‘ea ‘e reko ‘is aier‘ȧk ne ‘elemea avat ne Pure‘ag ‘on ‘Ạitu la re‘ia ‘on pure la a‘hele‘ua ‘amnȧk ‘on ‘Ạitu la sok se rȧnte‘. Tei ka ‘äe räe ne rog te‘is iạ te a‘helavat? Tei ka ‘äe mā ne iạ te airet? Väet ne tohim la hạisoagan ‘äe la ‘inea‘ia tē ne Puk Ha‘a ‘ea aire.