‘ONASOA
Tei ka Nonoj la ‘is la A‘sok Kato‘aga?
KATO‘AG fakrot ma fakrȧn ne famori ‘oaf la a‘a‘sok ‘e ut ma‘oi ‘e terạnit ‘e ‘i, kat kamatam ra ‘e Puk Ha‘a. Ma, tes tä, ‘on kamatag ne kato‘ag ‘i? Kepoi ka ‘äe pola la‘ se ut hatag puku, ma kop ma ‘äe la ferehit ‘e tē ne puku fȧ‘ hün se kato‘ag ne a‘a‘sok ‘e utut ne ‘äe noho e. Re a‘häe se mạl he his ‘i.
A‘rū ta. Puk heta The Encyclopædia Britannica fạ‘im ne “Puk Ha‘ Fo‘ou kat ‘ea ra la a‘sok ta kato‘ag ‘e A‘rū Ta.” A‘rū Ta kamat tapen? Iạ kamatam, ‘e titi‘ạki‘ạg ‘on famör ne kat ‘inea‘iara Karisto ta. Kop ma kato‘ag te‘ ‘ea a‘sok la a‘häe‘ạkia fū hoi‘ạkiag se‘ ‘on Jisu, ka ag ne rere ‘e av ne A‘rū Ta kat Fakkaristo ra. La fakse “rapej ne A‘rū Ta,” ne famori ‘oaf pạu sin. Te‘is tēet ne puk heta The Catholic Encyclopedia fạ‘im ‘e ag hete‘ ne: “Rapej heta iạ faki‘oag het ne famör maksulu a‘es‘ao‘ạkia ma kamatama ‘e ‘on mumua iạ kel‘ạkia po fuạmamạu ne koroa.”
Kato‘ag ne Fạu Fo‘ou ta. Terȧn ta ma ag ne rere ‘e kato‘ag ne Fạu Fo‘ou Ta kat tatạu ra ‘e hanuet se hanuet. ‘E reko kamkamatag ne kato‘ag te‘, puk heta The World Book Encyclopedia ‘ea: “Gagaj puer Roam ta Julius Caesar fu‘ȧk se‘ Janueri 1 ta, la iạ täla Terȧn Mumuạ ne Fạu Fo‘ou Ta ‘e 46 M.K. Famör Roma ha‘ terȧn te‘ la mou se Janus, ‘ạit ne pā, nu‘sura, ma kamkamatag ne tē. Huạl ne Janueri he‘ se Janus, ne ma ‘on maf he ruạ—maf het ‘io se muạ ka ‘on rue ‘io se fạ‘. Ma täe ‘on‘on kato‘ag ne Fạu Fo‘ou Ta hün‘ȧk kikia se ag ‘on famör maksulu.
Halloween. Puk heta The Encyclopedia Americana ‘ea: “Ag ne rere ‘e a‘sokoag ne Halloween la pola a‘ạu hö‘ se kato‘ag ‘on fa ha‘ ne rot ne Scotland, Wales ma Ireland mumuạ ne Av ‘on Karisto ta. Famör ne hanuạ fol ‘i iris rere kato‘ag se ‘ạit ti‘ ruạ—‘ạit ne as ta ma ‘ạit ‘on lelea‘ ala…, ne a‘sok ‘e Novempa 1 ta, terȧn mumuạ ne Fạu Fo‘ou ‘on famör ne Scotland, Wales ma Ireland. Ka kato‘ag ‘on lelea‘ ala hoa‘hoa‘ a‘riri‘ ma ma tạunạ‘ia kikia se rere ma ag ‘on rot fakKaristo.”
Kato‘ag ‘e ‘on Rerege. ‘Is kal pora la hạifäegag se te‘ ne kato‘ag ne a‘a‘sok ‘e rȧnte‘ ‘atakoa. Ka tä‘ma tēet, Jihova kat kạu‘ȧk ra kato‘ag ne a‘pumuạ‘ạkia famori ne kautạunạ‘iạg ‘on famori. (Jeremaia 17:5-7; Garue 10:25, 26) Ka ‘äe se mao‘ạkia, tape‘ma, ne kamkamatag ne kato‘ag fakrot ‘i la pola kel‘ȧk se ‘äe ne iris a‘värvär se ‘Ạitu ne ‘igke‘. (Aisea 52:11; Kel‘ȧk Tē 18:4) Te ne fȧ‘ hun‘ȧk se foh ne Puk Ha‘a ne ‘ea vạhiaa ‘e Väe 16 ne puk hete‘ la pola hạiasoag ‘äe la ‘inea‘ia räe ‘on ‘Ạitu hün se a‘sokoag ne kato‘ag fakrạni.
