Rē a‘häe se fūfū te‘ ne Geoff, le‘ fā fạu 17 agtạu ma. Iạ rē ma vȧh‘ia garuet ne väe se iạ, ma täe iạ pō se av het la a‘u‘uen! Iạ säe se tivi ta ma täe päe sio se ‘on päegat ne iạ ‘oaf‘oaf sin.

Ma täe ‘on Ö‘fā ta no‘om, ka kat keleag ‘oaf‘oaf ra.

Kepoi ka ‘äe ta Geoff, tes tä ‘äe la rē la tē te‘is la se sok?

‘Ou la hạifäegag ma ‘ou ö‘rua iạ la fak se hoa‘ motokā. Kepoi ka sal ta la pā ‘äe la ao ta sal hoi‘ạkit.

 KEL‘ẠKIẠG HET:

Leah ‘ea, “Iạ a‘noa pạu la gou la hạifäegag ma ‘otou ö‘fā ta. Gou la fäefäeag ma iạ, av mea‘mea‘ ma ka iạ la ‘ea, ka tes tä ‘äe ‘ea?’”

A‘HÄE HE FOL NE LEAH LA PŌ LA RĒ.

1. A. ‘Ohō se ‘on ö‘fā ta.

   Leah ‘ohō‘ȧk, “‘Äe la a‘fạim se gou!”

2. E. Se fäeag se ‘on ö‘fā ta.

   Leah tokana ‘e pa fäeag‘ȧk ne ‘on pefä‘e se ‘on ö‘fā ta.

3. I. Tȧr se ta av lelei het la fäeag hoi‘ȧk.

   Leah la fäeag ma ‘on ö‘fā ta ‘e ta av hoi‘ạkit, ne iạ la fȧ‘ ta pukut ‘e rēko ‘on pefä‘e.

Ka te hes tä ‘äe la ‘ea se Leah la hili?

SẠKIOR SE: Ö‘fā ‘on Leah ‘es tē iạ a‘häe‘ạkia ma iạ kat pō rog ra se tē ne Leah pa ‘ese. Kepoi ka Leah la hil A‘häe 1, kop ma ‘on ö‘fā ta kal ‘inea ra hün het ne iạ ‘ohō. ‘On la ‘ohō kop ma ö‘fā ta kal a‘fại ra se ia, ma tape‘ma kel‘ȧk ne iạ kat ‘ē‘ȧk ra ma faktē‘ȧk ra ‘on ö‘fā ta. (Efeso 6:2) A‘sokoag ne a‘häe te‘is kal ‘es‘ao ra se ta le‘et.

Ka A‘häe 2 kop ma ta sal vavhiạn pạu ta, ka iạ ‘eake tē huạg ‘atmạit. Hün heta? ‘E rēko ‘on la a‘leleia ‘on pefä‘ heta, Leah kop la hạifäegag ma ‘on ö‘fā ta—ma iạ kop la ‘inea tē ne soksok se ‘on mạuri la pō la iạ la hạiasoag se ia. ‘On ‘ep‘ȧk ne ‘on nuju kal pōag tē ra.

Ka A‘häe 3, Leah kat fue‘ ra noanoa te‘ la fu‘ạkia iạ la hạifäegag ma ‘on ö‘fā ta. Ka iạ tȧr se ta av lelei het la fäeag hoi‘ȧk. Ka kepoi ka iạ la fȧ‘ ta puk het se ‘on ö‘fā ta ‘e av heta‘ag ‘on huga la fürmariạ pạu.

‘On la fȧ‘ ne puk ta kop ma täla hạiasoag tape‘ma se iạ la fūfū‘ȧk tē ne iạ pa ‘es la ‘ea. Ma ‘e avat ne ‘on ö‘fā ta la hat se puk heta iạ täla ‘inea‘ia tē ne Leah pa ‘es la ‘ea se iạ, ma te‘is täla hạiasoagan iạ la ‘inea a‘lelei tē ne Leah agagtạu mar. A‘häe 3 la ‘es‘ao ti‘ pạu se le Leah ma ‘on ö‘fā ta. ‘E ‘on la hạifäegag ma ‘on ö‘fā ta ne ‘on la fȧ‘ ta puk het, a‘häe te‘is tạupir se fas‘ȧk tē te‘is la “tạupir ma kikia se tē ne hạia‘leleiga.”—Roma 14:19.

Ka tes hoi‘ȧk tē Leah la pō la rē?

Fȧ‘ sio se lopo kepoi ka ‘äe la pō la a‘häe‘ạkia ta tēet. Ma täe fȧ‘ sio ne tes tä ‘on ‘es‘ao heta.

A‘häe‘ȧk ne, tē ne ‘äe ‘ea ma tē ne ‘ou ö‘rua a‘häe ne ‘äe ‘ea kop ma kal tatạu ra.

KEL‘ẠKIẠG HET:

‘Ou ö‘rua sạio‘ se ‘äe hün se tese ta ‘äe keleag fekfeke. ‘Äe ‘ea, “Sei ta pa or se.”

Tē ne ‘ou ö‘rua a‘fại: “Gou kat tua‘nȧk ra la fäeag‘ȧk se ‘ạuạr. Gou la fäeag‘ȧk ke se ‘otou kạumane‘aga ka ‘eake se ‘ạuạr.”

Rē a‘häe se ne ‘äe agtạu ma ta pefä‘ noanoat ma ‘ou ö‘ruạ pa hạiasoagan ‘äe. Ka ‘äe ‘ea: “Se kokon ka gou la pō la ao potoa.”

• ‘Ou ö‘rua kop ma la a‘fại:

• Ta tög lelei het ne ‘äe la pō la ‘ea: