7 GITUGUTU 2015
Austria

Ibirori vyo kwibuka Icabona wo muri Otrishe yishwe n’Abanazi

VUZA

Gabriele Votava, umukuru w’igisagara citwa Meidling c’i Vienne, ariko arashikiriza ijambo muri vya birori.

I VIENNE: Ku wa 13 Rusama 2015, abantu bashika 400 baritavye ibirori vyo gushira ahabona icibutso ceguriwe Gerhard Steinacher. Gerhard ni Icabona ca Yehova haciye imyaka 75 yishwe n’Abanazi kubera ko yanse kuja mu gisoda c’Abadagi. Umukuru w’igisagara citwa Meidling c’i Vienne ari we Gabriele Votava, ni we yashikirije ijambo mu birori vyo gushira ahabona ico cibutso camanitswe hanze ku ruhome rw’inzu umuryango wa ba Steinacher wahora ubamwo i Meidling ku murwa mukuru Vienne, kw’ibarabara ryitwa Lägenfeldgasse 68.

Iryo jambo yashikirije ryari rifise umutwe uvuga ngo “Sinshobora kurasa,” ayo akaba ari amajambo yavuzwe na Gerhard igihe yariko ariburanira. Ayo majambo make arerekana neza impanuro zo muri Bibiliya Gerhard yisunga, nk’iyo Yezu yatanze muri Matayo 19:19 igira iti: “Utegerezwa gukunda mugenzawe nk’uko wikunda.”

Gerhard yatanguye kwiga Bibiliya akiri muto. Ashikanye imyaka 17, yarafashe ingingo yo kuba Icabona ca Yehova. Ku wa 15 Nyakanga 1939, yarafashwe ahorwa ko yanse kuja mu gisirikare kubera ivyo yemera no kubera yanse kuvuga indamutso yo guhayagiza Hitler. Amaze ukwezi n’indwi zibiri mu gasho k’i Vienne, yaciye yimurirwa mw’ibohero ry’i Moabit i Berlin mu Budagi.

Ku wa 11 Munyonyo 1939, igihe yarengutswa ari bwo bwa mbere, Gerhard yagirijwe ko aca intege abari ku rugamba maze acirwa urwo gupfa. Yarasavye ko yogabanirizwa igihano kubera ko ingingo yafashe ishingiye ku vyo yemera. Ariko ku wa 2 Ntwarante 1940, Sentare ya gisirikare (Reichskriegsgericht) yaremeje ico gihano co gupfa. Haciye ukwezi, ni ukuvuga ku wa 30 Ntwarante, Gerhard yarishwe aciwe umutwe mw’ibohero ry’i Berlin ryari rizwi cane ryitwa Plötzensee. Yapfuye afise imyaka 19.

Ibirori vyo gushira ahabona ico cibutso vyabandanirije mu nzu y’ibiteramo ya Volkshochschule. Harerekanywe ibintu vyaranga umuryango wa ba Steinacher. Muri ivyo bintu harimwo agakarato katowe mu 1976 karimwo amakete 28 abavyeyi ba Gerhard ari bo Ignatz Steinacher na Luise bandikiye uwo muhungu wabo igihe yari mw’ibohero be n’amakete 25 Gerhard yandikiye abavyeyi biwe kugira abaremeshe no kugira abereke ko atadohotse ku vyo bemera.

Aka gakarato karimwo amakete, katowe mu nzu ya ba Steinacher igihe nyina wa Gerhard ari we Luise yapfa mu 1976.

Ku bijanye n’ivyo birori, ikinyamakuru kimwe gisohoka buri ndwi c’i Vienne (Wiener Bezirkszeitung), cavuze ko ari “icibutso kidasanzwe” cashize “ahabona” ikintu kiranga umutima rugabo Gerhard yakoze. Ico kiganiro caciye gishemagiza Gerhard giti: “Yaremeye gupfa azira ivyo yemera, kandi ni vyo yabaho yisunga.”

Hasigaye amasaha make gusa ngo Gerhard Steinacher yicwe, yarandikiye abavyeyi biwe iri kete ryo kubasezera (ryarashizwe mu kirundi aha hepfo). Hari imirongo itatu yakuwemwo n’Abanazi.

Bavyeyi nkunda,

Nta vyinshi mfise ndababwira. Sa moya z’umugoroba, ubu hakaba haciye amasaha abiri, bamenyesheje ko nzokwicwa ejo mu gitondo sakumi n’imwe n’iminota 50. Isango rirageze, Mukama ndagusavye umpe inkomezi, umutima urakunze ariko umubiri ni goyigoyi. Ubu ni nka saha indwi z’ijoro, nicaye mu kumba mpfungiwemwo ndi kumwe n’abandi bagabo babiri, umwanya uriruka cane, nza ndandika ibinje mu bwenge. Hanze harakanye cane kandi hariko hagwa urubura. Ese Umukama yobakomeza. Sinanka gukora kandi narasezeranye mu majambo no mu nyandiko ko nzokorana umwete n’umunezero. Ariko rero, sinshobora kurasa kandi aho ni ho hari umuzi w’ingorane. Ubu rero, ivyo Umukama agomba nibiranguke; nta wohagarika ibibwirizwa kuba. Mukomere cane, ivyo ntibibace intege ahubwo nibitume murushiriza kwunga ubumwe, ntimudendebukirwe. Ndacari umwana, Umukama ampaye inkomezi ni ho gusa nshobora gushikama kandi ico ni co ndamusaba. Nararonse ikete mwanyandikiye itariki 25 Ntwarante kandi izo ni zo ndamukanyo zanyu za nyuma. Ubu ni nka sacenda n’inusu z’ijoro. Sinigeze nibaza ko ibintu vyonyarutse gutya. [Imirongo itatu yarakuwemwo n’Abanazi] . . . biratangaje kandi ntushobora kumenya ibiza kuba mu kanya kari imbere. Ni mwe muzosigarana ibintu vyanje. Amakaramu, impapuro n’amakete, amahera, impuzu, impfunguruzo n’ibindi. Murandamukiriza cane sokuru na nyokuru, Resi, muyomba, mama wacu, na Hock be n’umugore wiwe. Mundamukirize kandi abo twakorana bose, hamwe n’abandi bose banzi be n’incuti zose. Papa nukomere cane, ntucike intege, ntiwihebure ahubwo nukomere mu kwizera no mu bindi bintu vyose. Nawe ga mama, nukomere ntunyiganyige kandi mufatane mu nda. Nimutakambire Umukama abakingire, abahe inkomezi n’icizigiro yongere abayobore muri vyose kugira mugume mu nzira nziza kandi ntihagire ikintu na kimwe kibashikira. Na jewe ndaza kubasabira. Ubu isaha iriko iregereza, ndabona neza ko umubiri ari goyigoyi cane. Gushika ubu, nari ngifise akaryo ko guhindura ingingo nafashe. Sinanka gukora, ariko sinshobora kurasa. Reka ndangirize aha. Bavyeyi nkunda, nsozereye ndabagumbira cane nongera ndabasoma. Nzokwama ndi Gerhard wanyu, uwamye yipfuza incuro zirenga 100.000 kuba kumwe namwe. Naho mu Bwami bw’Imana aho twese uko turi bane tuzosubira kubonanira. Ni agasaga.

Ndabasomye incuro igihumbi.

Uwujejwe amakuru:

Ku rwego mpuzamakungu: J. R. Brown, wo mu biro bijejwe amakuru, tél. +1 718 560 5000

Muri Otrishe: Johann Zimmermann, tél. +43 1 804 53 45

Mu Budagi: Wolfram Slupina, tél. +49 6483 41 3110

Raba kandi

Ibirori vyo kwibuka Ivyabona vya Yehova vyabereye mw’ibohero ry’i Gusen

Ku wa 13 Ndamukiza 2014, harabaye ibirori vyo gushira ahabona ikimenyetso co kwibuka Ivyabona 450 Abanazi bapfungiye mw’ibohero ry’i Mauthausen n’iry’i Gusen muri Otrishe.

AMAKURU AGEZWEHO

Ibirori vyo kwibuka Icabona ca Yehova yagandaguwe n’Abanazi

Ku wa 16 Nyakanga 2014, ikigo cashinze icibutso kiri i Brandebourg caratunganije ibirori bidasanzwe vyo kwibuka imyaka 75 iheze August Dickmann agandaguriwe mw’ibohero ry’i Sachsenhausen. Ni we muntu wa mbere yishwe ku mugaragaro n’Abanazi mu gihe c’Intambara ya kabiri y’isi yose, azira ko yanse kuja mu gisoda abitumwe n’ijwi ryiwe ryo mu mutima..

IBIBAZO BIKUNZE KUBAZWA

Kubera iki Ivyabona vya Yehova batagira uruhara mu ntambara?

Ivyabona vya Yehova barazwi kw’isi yose ko batagira uruhara mu ntambara. Raba igituma bataja mu ntambara.