Samweli wa kabiri 18:1-33
18 Nuko Dawidi aharura ingabo zari kumwe na we, maze agena abatwara imigwi y’abantu 1.000 n’abatwara imigwi y’abantu 100+.
2 Hanyuma Dawidi abashira mu migwi itatu: umwe awuha Yowabu*+, uwundi awuha Abishayi+ mwene Zeruwiya+, akaba na mwenewabo na Yowabu, uwundi awuha Itayi+ Umunyegati. Umwami aca abwira abasoda ati: «Nanje turajana ku rugamba.»
3 Ariko bamubwira bati: «Ntujane natwe+ kuko wewe ungana na 10.000 muri twebwe+. Turamutse duhunze canke ica kabiri c’ingabo zacu kigapfa, abansi bacu ntibovyitaho*. Vyoba vyiza rero ugumye mu gisagara kugira uturungikire abadutabara.»
4 Umwami abishura ati: «Ndakora ivyo mubona ko ari vyiza.» Umwami aca ahagarara iruhande y’irembo ry’igisagara, maze ingabo zose zija ku rugamba ziri mu migwi y’abantu 100 n’iy’abantu 1.000.
5 Maze umwami ategeka Yowabu na Abishayi na Itayi ati: «Ndabasavye ntimugirire nabi* umuhungu wanje Abusalomu+.» Igihe umwami yaha abo bakuru iryo tegeko ku bijanye na Abusalomu, abantu bose barumva.
6 Nuko bava mu gisagara baja gutana mu mitwe n’ingabo z’Abisirayeli, urugamba rubera mu kibira ca Efurayimu+.
7 Ingabo za Dawidi zitsinda ingabo z’Abisirayeli+, inganda ziratikira. Uwo musi hapfa abantu 20.000.
8 Urugamba rukwira muri ako karere kose. Uwo musi abahitanywe n’amasanganya mu kibira baba benshi kuruta abishwe n’inkota.
9 Amaherezo Abusalomu aja abona ahanganye n’ingabo za Dawidi. Abakubise ijisho aca arahunga, maze indogobwa* yariko agenderako ica munsi y’amashami azitanye y’igiti kinini. Umutwe wiwe uca ufatwa n’ico giti, asigara yenena mu kirere*. Ya ndogobwa yari atwaye iribandaniriza.
10 Umuntu umwe abibonye, aja kubwira Yowabu+ ati: «Urazi? Ndabonye Abusalomu yenena ku giti kinini.»
11 Yowabu aca yishura uwo muntu ati: «Kubera iki none wabibonye ntuce umwicira aho nyene? Mba ndakwihereye ifeza cumi n’umukaba.»
12 Ariko uwo muntu abwira Yowabu ati: «N’uwari kumpa* ifeza 1.000, sinari kwubahuka kugirira nabi umwana w’umwami. Erega twumva igihe umwami yagutegeka wewe na Abishayi na Itayi ati: “Murabe neza ntihagire uwugirira nabi umuhungu wanje Abusalomu+.”
13 Iyo ndabirengako nkamwica*, umwami yotevye akabimenya kandi nawe ntiwomvugiye.»
14 Yowabu aca avuga ati: «Mbisa, urabona uyu mwanya wose untesheje!» Aca afata uducumu* dutatu atuzibura Abusalomu mu mutima. Yari akiri muzima, yenena muri ca giti kinini.
15 Maze abantu cumi batwaza ibirwanisho Yowabu baraza, bahohosha Abusalomu+.
16 Yowabu aca avuza inzamba kugira urugamba ruhagarare. Ingabo ziwe zica ziragaruka zireka gukurikira iz’Abisirayeli.
17 Maze bafata Abusalomu bamuta mu kinogo kinini cari mu kibira, baca bamurundako ikirundo kinini cane c’amabuye+. Ingabo zose z’Abisirayeli zica zirahunga, umwe wese aja iwe.
18 Abusalomu akiriho, yari yarishingiye inkingi mu kiyaya c’Umwami+, kuko yibwira ati: «Nta muhungu mfise bazokwama banyibukirako+.» Iyo nkingi yayitiriye izina ryiwe, kandi gushika n’uyu musi baracayita Icibutso ca Abusalomu.
19 Ahimasi+ mwene Sadoki, abwira Yowabu ati: «Ndagusavye undeke niruke nje kumenyesha umwami iyo nkuru, kuko Yehova yamurenganuye akamukiza abansi biwe+.»
20 Ariko Yowabu amwishura ati: «Uyu musi nta nkuru uja kumenyesha, uzoba urayimenyesha ikindi gihe. Kubera ko hapfuye umwana w’umwami, ubu si we woja kumenyesha iyo nkuru+.»
21 Yowabu aca abwira umugabo umwe w’Umukushi+ ati: «Genda ubwire umwami ivyo wabonye.» Nuko nya Mukushi yunamira Yowabu, aca agenda yiruka.
22 Ahimasi mwene Sadoki yongera kubwira Yowabu ati: «Ikiba cose, ndagusavye undeke nanje niruke nkurikire urya Mukushi.» Ariko Yowabu amubwira ati: «Wirirwa urirukira iki ga mwananje? Erega nta nkuru iriho wotwara.»
23 Mugabo avuga ati: «Ntaco pfa kundeka niruke.» Yowabu amwishura ati: «Iruka.» Ahimasi aca ariruka ajana inzira ica mu karere ka Yorodani*, arateba asiga wa Mukushi.
24 Nayo Dawidi yari yicaye hagati y’amarembo abiri y’igisagara+. Maze inderetsi+ iduga ku gisenge c’irembo ryari rifatanye n’uruhome. Iyo nderetsi igize gutya, ibona umugabo ariko yiruka ari wenyene.
25 Iyo nderetsi irasemerera ibimenyesha umwami. Umwami na we ati: «Nimba ari wenyene, atuzaniye inkuru.» Akiriko aregereza,
26 nya nderetsi ibona uwundi mugabo ariko ariruka, ica irasemerera ibwira umurinzi w’irembo iti: «Ndabonye uwundi mugabo ariko yiruka ari wenyene!» Umwami aca avuga ati: «N’uwo nyene atuzaniye inkuru.»
27 Nya nderetsi yongera kuvuga iti: «Uwa mbere mbona yiruka nka Ahimasi+ mwene Sadoki.» Umwami aca avuga ati: «Ni umuntu mwiza. Aho azanye inkuru nziza.»
28 Maze Ahimasi arasemerera abwira umwami ati: «Vyose vyagenze neza.» Aca yunamira umwami, mu maso hiwe hashika hasi. Araheza avuga ati: «Yehova Imana yawe nashemezwe, we yagufashije gutsinda abari bakugararije* mwami+!»
29 Ariko umwami amubaza ati: «Wa muhungu wanje Abusalomu wewe yoba ari impore?» Ahimasi yishura ati: «Igihe Yowabu yaturungika jewe n’urya musuku wawe wundi, nabonye hari uruhagarara ariko sinamenye ivyo ari vyo+.»
30 Umwami amubwira ati: «Hagarara aho ku ruhande.» Aca ahagarara ku ruhande.
31 Wa Mukushi na we arashika+, aca avuga ati: «Ndakuzaniye inkuru mwami wanje. Uyu musi Yehova yakurenganuye agukiza abakugararije bose+.»
32 Mugabo umwami abaza uwo Mukushi ati: «Wa muhungu wanje Abusalomu wewe yoba ari impore?» Amwishura ati: «Abansi bawe bose mwami, n’abakugararije bose barondera kukugirira nabi, barakamera nka we+.»
33 Umwami bica biramwanka mu nda aduga mu cumba cari hejuru y’irembo, atangura kurira. Yagenda avuga ngo: «Mwananje Abusalomu, mwananje! Mwananje Abusalomu! Ese iyo aba ari je mpfa mu kibanza cawe mwananje Abusalomu, mwananje+!»
Utujambo tw'epfo
^ Mu giheburayo havuga ngo «awushira mu kuboko kwa Yowabu.»
^ Mu giheburayo havuga ngo «ntibobishirako umutima.»
^ Canke «mwengenge.»
^ Canke «inyumpu.» Ni igikoko kivuka ku ndogobwa n’ifarasi.
^ Mu giheburayo havuga ngo «hagati y’ijuru n’isi.»
^ Mu giheburayo havuga ngo «naho nari gupimira mu biganza vyanje.»
^ Canke «iyo mpemuka nkamwaka ubuzima.»
^ Hashobora kandi kuvugwa ngo «imyampi», «amacumu.» Mu giheburayo havuga ngo «inkoni.»
^ Mu giheburayo havuga ngo «mu ntara.»
^ Mu giheburayo havuga ngo «bakubanguriye ukuboko.»
