Ivyakozwe n’intumwa 22:1-30
22 «Bagabo benewacu, namwe ba data, nimwumve rero ukwiregura kwanje+.»
2 Erega bumvise ariko ababwira mu giheburayo, barushiriza gucereza rwose. Maze avuga ati:
3 «Ndi Umuyuda+ yavukiye i Taruso mu karere ka Silisiya+, mugabo nize muri iki gisagara. Nigishijwe na Gamaliyeli+ ubwiwe*, nigishwa kwubahiriza amategeko ya ba sogokuruza+ ata guca ku ruhande. Kandi nakorera Imana mfise umwete nk’uwo namwe mufise uyu musi+.
4 Abagendera muri iyi nzira y’Umukama narabahama nkanabicisha. Baba abagabo canke abagore, narababoha nkongera nkabapfungisha+.
5 Mbere n’umuherezi mukuru n’abagize inama y’abashingantahe bose bovyemeza. Barampaye n’amakete nshira benewacu i Damasiko, kandi nari ngiyeyo gutora abariyo ngo ndabazane i Yeruzalemu baboshe kugira bahanwe.
6 Mugabo nko mu masasita ndi ku rugendo ngira nshike i Damasiko, bukwi na bukwi umuco mwinshi uvuye mw’ijuru urabiriza irya n’ino yanje+.
7 Nca ngwa hasi, numva ijwi rimbwira riti: “Sawuli, Sawuli, umpamira iki?”
8 Nishura nti: “Uri nde ga Mukama?” Na we ambwira ati: “Ndi Yezu Umunyanazareti, uriko urahama.”
9 Ico gihe abantu bari kumwe nanje barabona uwo muco, mugabo ntibumva ijwi ry’uwariko aramvugisha.
10 Maze mvuga nti: “Nkore iki ga Mukama?” Umukama ambwira ati: “Haguruka uje i Damasiko. Niwashikayo uramenyeshwa ivyo nashinze ko uzokora vyose+.”
11 Mugabo kubera ntashobora kubona ikintu na kimwe bitumwe n’ugukayangana kw’uwo muco, nashitse i Damasiko mfashwe ukuboko n’abo twari kumwe.
12 Maze umugabo yitwa Ananiya yubaha Imana nk’uko amategeko abisaba, akaba yavugwa neza n’Abayuda bose babayo,
13 aza aho ndi. Ahagarara iruhande yanje, ambwira ati: “Muvukanyi Sawuli, humuka wongere ubone!” Uwo mwanya nyene nca ndakanura ndamubona+.
14 Ambwira ati: “Imana ya ba sogokuruza bacu yagutoye ngo umenye ivyo igomba, ngo ubone wa mugororotsi+, wumve n’ijwi ryiwe
15 kubera ko utegerezwa kumushingira intahe imbere y’abantu bose, ukababwira ibintu wabonye kandi wumvise+.
16 None utebejwe n’iki? Haguruka ubatizwe, wiyoze ibicumuro+ mu kwambaza izina ryiwe+.”
17 Mugabo aho mariye gusubira i Yeruzalemu+, ndiko ndasenga mu rusengero, mera nk’uwurota
18 maze mbona Umukama ambwira ati: “Nyarutsa uve i Yeruzalemu ningoga, kuko batazokwemera intahe uzonshingira+.”
19 Nanje mvuga nti: “Erega Mukama, bo ubwabo barazi neza yuko nahora nja mw’isinagogi no mu yindi, ngata mw’ibohero abakwizera kandi nkabatonagura+.
20 N’igihe icabona cawe Sitefano yicwa, ni ho nari mpagaze, ndabishigikiye. Kandi ni je nari ncunze impuzu* z’abariko baramwica+.”
21 Yamara ambwira ati: “Genda, kuko nzogutuma ku mahanga ya kure cane+.”»
22 Baguma bamwumviriza, mugabo ageze kuri iryo jambo bashira amajwi hejuru, bavuga bati: «Kura umuntu mwene uyo kw’isi, nakare ntakwiriye kubaho!»
23 Kubera ko bariko basemerera bongera batagaguza impuzu zabo zo hejuru bagasurira n’umukungugu mu kirere+,
24 wa mukomanda ategeka ko Pawulo ajanwa ku cicaro c’abasoda, bakamusambisha banamukubita ikimoko, kugira amenye neza igituma bariko bavuza urwamo bamwiyamiriza gutyo.
25 Mugabo bamaze kuboha Pawulo* kugira bamukubite, aca abwira intwazangabo yari ihagaze ng’aho ati: «Mbega amategeko arabarekurira gukubita ikimoko Umuroma* ata rubanza aciriwe*+?»
26 Iyo ntwazangabo ngo ivyumve, ica ija kubimenyesha wa mukomanda, imubwira iti: «Ugira ukore iki none? Erega wa muntu ni Umuroma.»
27 Nuko wa mukomanda araza amubaza ati: «Nankana uri Umuroma?» Na we ati: «Egome.»
28 Nya mukomanda asubizayo ati: «Ubwo bwenegihugu jewe nabuguze amahera menshi.» Pawulo avuga ati: «Jeho narabuvukanye+.»
29 Ba bagabo rero bagira bamusambishe banamusinzikariza ubuzima, ubwo nyene baramureka baragenda. Nya mukomanda aca agira ubwoba aho amenyeye yuko ari Umuroma kandi yari yamubohesheje iminyororo+.
30 Bukeye rero, aramubohora, ategeka abakuru b’abaherezi n’Inama nkuru yose gukorana kubera ko yipfuza kumenya neza ivyo Abayuda bariko baramwagiriza. Hanyuma amanukana Pawulo, amuhagarika hagati yabo+.
Utujambo tw'epfo
^ Mu kigiriki havuga ngo «nigishirijwe ku birenge vya Gamaliyeli.»
^ Canke «impuzu zo hejuru.»
^ Canke «kuboha Pawulo agoroye.»
^ Canke «umwenegihugu w’Umuroma.»
^ Canke «ata caha kimwagira.»
