Yeremiya 52:1-34
52 Zedekiya+ yabaye umwami afise imyaka 21, maze amara imyaka 11 aganza i Yeruzalemu. Nyina yitwa Hamutali+, akaba yari umukobwa wa Yeremiya w’i Libuna.
2 Yagumye akora ivyo Yehova abona ko ari bibi, yigana ivyo Yehoyakimu yari yarakoze vyose+.
3 Ishavu rya Yehova ni ryo ryatumye ivyo bintu biba i Yeruzalemu no mu Buyuda, gushika yomoye abahaba bakamuva imbere+. Zedekiya arahava agarariza umwami wa Babiloni+.
4 Nuko mu mwaka ugira icenda Zedekiya aganza, ku musi ugira cumi w’ukwezi kugira cumi, Nebukadinezari* umwami wa Babiloni azanana n’ingabo ziwe zose gutera Yeruzalemu. Bakambika hafi y’ico gisagara, bubaka irya n’ino yaco uruzitiro rwo kuhatera+.
5 Ico gisagara kiguma cugarijwe gushika mu mwaka ugira 11 umwami Zedekiya aganza.
6 Mu kwezi kugira kane, ku musi ugira icenda w’ukwo kwezi+, inzara yari imaze gukara mu gisagara, kandi nta bifungurwa abanyagihugu bari bafise+.
7 Amaherezo Abakaludaya bamena uruzitiro rw’ico gisagara. Mu gihe bari bakikuje ico gisagara, abasoda bose ba Zedekiya bahengera mw’ijoro, bava mu gisagara barahunga baciye mw’irembo ryari hagati y’inzitiro zibiri hafi y’umurima w’umwami. Barabandanya berekeza mu karere ka Araba+.
8 Mugabo ingabo z’Abakaludaya ziruka ku mwami Zedekiya+, zimuhambiriza mu biyaya vy’ubugaragwa vy’i Yeriko maze abasoda biwe bose barasanzara baramuta.
9 Nuko bafata umwami bamudugana i Ribula mu gihugu ca Hamati ku mwami wa Babiloni, amucira urubanza.
10 Nuko umwami wa Babiloni afata abahungu ba Zedekiya abicira mu maso yiwe, yicira n’abatware bose b’Ubuyuda aho i Ribula.
11 Maze umwami wa Babiloni afata Zedekiya amugira impumyi+. Hanyuma amubohesha amapingu y’umujumpu amujana i Babiloni, amushira mw’ibohero, agumayo gushika apfuye.
12 Mu mwaka ugira 19 Nebukadinezari* umwami wa Babiloni aganza, ku musi ugira cumi w’ukwezi kugira gatanu, Nebuzaradani ashika i Yeruzalemu. Nebuzaradani yakorera umwami wa Babiloni, akaba yari umukuru w’abamucungera+.
13 Maze aturira inzu ya Yehova+, inzu* y’umwami n’inzu zose z’i Yeruzalemu, aturira n’inzu nini zose.
14 Ingabo z’Abakaludaya zose zari kumwe n’uwo mukuru w’abacungera umwami zisiturira hasi inzitiro zikikuje Yeruzalemu+.
15 Nebuzaradani umukuru w’abacungera umwami atwara mu bunyagano bamwe mu bantu batobato n’abantu bari basigaye mu gisagara. Atwara n’abari bataye bakomokera ku mwami wa Babiloni hamwe n’abanyamyuga b’abahinga bari basigaye+.
16 Mugabo Nebuzaradani umukuru w’abacungera umwami asigazayo bamwebamwe mu bantu nyarucari ngo baze barakorera mu mirima y’imizabibu, bakore n’ibindi bikorwa vy’agahato+.
17 Maze Abakaludaya bamenagura za nkingi z’umujumpu+ zari ku nzu ya Yehova, na ya mashareti+ be na ca gitangi c’umujumpu citwa Ikiyaga+ vyari mu nzu ya Yehova, baraheza batwara umujumpu wavyo wose i Babiloni+.
18 Batwara n’utudobo, ibipawa, udukasi*, amabakure+, ibikombe+ n’ibindi bikoresho vyose vy’umujumpu vyakoreshwa mu rusengero.
19 Wa mukuru w’abacungera umwami atwara amabesani+, udupanu tujamwo umuriro, amabakure, utudobo, ivyo baterekako amatara+, ibikombe n’amabakure vyari bikozwe mu nzahabu itavanze, n’ivyari bikozwe mw’ifeza itavanze+.
20 Nayo ku bijanye na za nkingi zibiri, ca gitangi citwa Ikiyaga, za mpfizi 12 z’umujumpu+ zari munsi y’ico gitangi, na ya mashareti umwami Salomo yari yarakoreye inzu ya Yehova, nta washobora gupima umujumpu wari kuri ivyo bintu vyose.
21 Ku bijanye n’izo nkingi, imwe yose yareha n’intambwe* 18, kandi kugira uyikikuze vyasaba umugozi w’intambwe 12+. Intimbatimba yayo yangana n’ubwaguke bw’intoke* zine, kandi yari ifise umuheha hagati.
22 Igikono cari hejuru kuri yo cari gikozwe mu mujumpu kandi kimwe careha n’intambwe zitanu+. Udusharizo tumeze nk’urusenga be n’amakomamanga vyari bigikikuje, vyose vyari bikozwe mu mujumpu. Izo nkingi zompi n’ayo makomamanga vyari bikozwe kumwe.
23 Hari amakomamanga 96 ku mpande. Amakomamanga yose yari irya n’ino ku rusenga yari 100+.
24 Wa mukuru w’abacungera umwami afata na Seraya+ umukuru w’abaherezi be n’umuherezi Zefaniya+, akaba yari icegera ciwe. Afata n’abarinzi b’imiryango batatu+.
25 Afata umukozi wo ku kirimba yagaba abasoda amukuye mu gisagara, ahafatira n’abagabo indwi b’abishikira ku mwami. Afata n’umunyamabanga w’umukuru w’ingabo, ari na we yatumako abinjira mu gisoda. Afata n’abagabo 60 bo mu banyagihugu batobato bari bakiri mu gisagara.
26 Abo bose Nebuzaradani umukuru w’abacungera umwami arabafata abajana i Ribula ku mwami wa Babiloni.
27 Maze umwami wa Babiloni abicira aho i Ribula+ mu karere ka Hamati. Ukwo ni ko ababa mu Buyuda bavuye mu gihugu cabo, bajanwa mu bunyagano+.
28 Aba ni bo bantu Nebukadinezari* yatwaye mu bunyagano: mu mwaka ugira indwi aganza, yatwaye Abayuda 3.023+.
29 Mu mwaka ugira 18 Nebukadinezari* aganza+, abantu 832 ni bo bakuwe i Yeruzalemu.
30 Mu mwaka ugira 23 Nebukadinezari* aganza, Nebuzaradani umukuru w’abacungera umwami yatwaye mu bunyagano Abayuda 745+.
Abantu bose bajanywe mu bunyagano bari 4.600.
31 Mu mwaka ugira 37 Yehoyakini+ umwami w’Ubuyuda ari mu bunyagano, ku musi ugira 25 w’ukwezi kugira 12, Evili-Merodaki umwami wa Babiloni akura Yehoyakini* umwami w’Ubuyuda mw’ibohero, aramurekura. Hari mu mwaka Evili-Merodaki yatanguriyemwo kuganza+.
32 Evili-Merodaki amuyagisha neza, maze amuha ikibanza c’iteka* kuruta abandi bami bari mu bunyagano i Babiloni.
33 Nuko Yehoyakini akura impuzu zo mw’ibohero, atangura kuza arasangira n’umwami imisi yose y’ubuzima bwiwe.
34 Ku musi ku musi yama ahabwa imfungurwa zivuye ku mwami wa Babiloni. Yagumye azihabwa imisi yose y’ubuzima bwiwe gushika apfuye.
Utujambo tw'epfo
^ Mu giheburayo havuga ngo «Nebukadirezari.» Iyo ni iyindi nyandiko.
^ Mu giheburayo havuga ngo «Nebukadirezari.» Iyo ni iyindi nyandiko.
^ Canke «ikirimba.»
^ Ni utuntu bakoresha mu kuzimya urutambi.
^ Yari intambwe y’ukuboko uciriye mu nkokora. Intambwe imwe yangana na santimetero 44,5. Raba Inyongera ya B14.
^ Ubwaguke bw’urutoke bwangana na santimetero 1,85. Raba Inyongera ya B14.
^ Mu giheburayo havuga ngo «Nebukadirezari.» Iyo ni iyindi nyandiko.
^ Mu giheburayo havuga ngo «Nebukadirezari.» Iyo ni iyindi nyandiko.
^ Mu giheburayo havuga ngo «Nebukadirezari.» Iyo ni iyindi nyandiko.
^ Mu giheburayo havuga ngo «aduza umutwe wa Yehoyakini.»
^ Mu giheburayo havuga ngo «intebe y’ubwami.»
