Yobu 29:1-25
29 Yobu abandanya kuvuga ati:
2 «Icompa ngasubira kumera nko mu mezi yaheze,ya misi ya kera aho Imana yangumizako ijisho,
3 igihe itara ryayo ryakira hejuru yanje,ngaca mu mwiza murikiwe n’umuco wayo+,
4 igihe nari nkiritera nkarisama,urugo rwanje rugifitaniye ubucuti bwiza n’Imana+,
5 igihe Mushoboravyose yari akiri kumwe nanje,ngikikujwe n’abana* banje,
6 igihe noza ibirenge vyanje mu mata*,ibitandara na vyo bikancuncuburira imigezi y’amavuta+!
7 Iyo ngiye kw’irembo ry’igisagara+maze nkicara mu kibanza rusangi*+,
8 imisore yarambona igataramuka*,mbere n’abatama barahaguruka bakaguma bahagaze+.
9 Abaganwa baririnda kuvuga,bakifata ku munwa.
10 Abantu bahambaye baranuma,ururimi rwabo rugafatana n’amagage.
11 Uwanyumva wese yaramvuga neza,abambona bakanshingira intahe.
12 Kuko nafasha umukene ariko aratabaza+,hamwe n’impfuvyi n’uwo wese atagira gitabara+.
13 Uwuri ku mpfiro yarampezagira+,kandi naranezereza umutima w’abapfakazi+.
14 Nambara ubugororotsi nk’impuzu,ubutungane bukambera nk’ikanzu* n’igitambara bazingira mu mutwe.
15 Nabera amaso impumyi,nkabera ibirenge uwucumbagira.
16 Nari se w’aboro+.Urubanza rw’abo ntazi nararwihweza neza+.
17 Naravunagura imibangabanga y’inkozi y’ikibi+,ngashikura mu menyo yayo ico yacakiye.
18 Nahora mvuga nti: “Nzopfira mu rugo rwanje*+,kandi imisi yanje izoba myinshi nk’udutete tw’umusenyi.
19 Imizi yanje izoshorera mu mazi,kandi urume ruzoguma ku mashami yanje ijoro ryose.
20 Ubuninahazwa bwanje buzoguma bwiyubura,kandi inguvu zanje ntizizokwigera zihera*.”
21 Abantu barantega ugutwi bitonze,bakarindira impanuro yanje bacereje+.
22 Mpejeje kuvuga nta kindi bongerako.Amajambo yanje yararyohera* ugutwi kwabo.
23 Barandindira nk’uko barindira imvura.Bari bashashaye kunyumviriza nk’abarindiriye imvura y’impeshi+.
24 Iyo ndabatwengeye, babona ko ari iteka ntangere.Babonye mpimbawe mu maso vyarabahumuriza*.
25 Narabereka inzira bakwiye gucamwo nk’umukuru wabo.Nari mbayeho nk’umwami hagati y’ingabo ziwe+,nk’umuntu ahoza abagandaye+.
Utujambo tw'epfo
^ Canke «abasuku.»
^ Canke «amavuta y’inka.»
^ Raba Insiguro y’amajambo.
^ Mu giheburayo havuga ngo «ikinyegeza.»
^ Canke «ikanzu itagira amaboko.»
^ Mu giheburayo havuga ngo «mu cari canje.»
^ Canke «umuheto uri mu kuboko kwanje uzoguma urasa.»
^ Mu giheburayo havuga ngo «yaratonyangira.»
^ Hashobora kandi kuvugwa ngo «ntibazimya umuco wo mu maso hanje.»
