Ijuru n’isi be n’ibiri muri vyo vyoba vyaremwe n’Imana canke vyariyadukije? Ivyavuzwe n’abo bahinga babiri be n’amajambo ya mbere dusanga muri Bibiliya bitanga inyishu zibiri zitandukanye cane. Ivyo vyiyumviro vyompi birafise ababishigikiye. Ariko rero, abantu benshi ntibazi ukuri aho kuri. Abantu baraharira kuri ivyo bibazo haba mu bitabu bikundwa cane canke mu biganiro vyo kuri televiziyo.

Abigisha bashobora kuba barakwemeje ko ijuru n’isi n’ibirimwo vyose vyabayeho ata wubishizeho, ko ata Mana yabiremye. Ariko none boba baraguhaye ibimenyamenya vyerekana ko ata Muremyi ariho? Ku rundi ruhande, ushobora kuba warumvise indongozi z’amadini zigisha ko hariho Umuremyi. Ariko boba baraguhaye ibimenyamenya vyerekana ko ivyo ari ukuri? Canke bagusavye gusa gupfa kuvyemera?

Ushobora kuba umaze kuzirikana kuri ico kibazo, ukaba ubona ko ata n’umwe yoshobora kwemeza neza ko hariho Umuremyi. Woshobora kwibaza kandi uti: ‘Kumenya inyishu y’ico kibazo hoba hari ico vyomarira?’

Iki kinyamakuru Be maso! kiza kubanza kwerekana ibimenyamenya vyatumye abantu benshi bemera ko hariho Umuremyi. Mu nyuma, kiraza kwerekana igituma bihambaye kumenya ingene ibiriho vyabayeho ng’aha kw’isi.