URAZI igituma uyo muntu ariko arasaba Yehova? Ni kuki ashanje ayo makete imbere y’uruhimbi rwa Yehova? Ni Hezekiya, umwami wa ya miryango ibiri y’Abisirayeli. Ari mu kaga kanini. Kuki?

Kubera ko Abasiriya bari bamaze kwica ya miryango 10 yo mu burarūko, bayihora ububi bwayo. Abo Basiriya bari baje gutera iyo miryango ibiri na yo.

Umwami w’Abasiriya atuma amakete kwa Hezekiya. Ngaho ayashize imbere y’Imana. Ni ayo gutuka Yehova, no kubwira Hezekiya ngo yemere ko atsinzwe. Ni co gituma ariko arasaba ati: ‘Ewe Yehova, dukize uwo mwami w’Abasiriya, ni ho ibihugu vyose bizomenya ko ari wewe Mana wenyene.’ Yehova araza kumwumvira?

Hezekiya yari umwami mwiza, ntiyari ameze nka ba bami babi ba ya miryango 10, canke nka se Ahazi. We yarubaha rwose amategeko ya Yehova yose. Ahejeje gusenga, umumenyesha kazoza Yesaya amurungikira agakuru kavuye kwa Yehova ati: ‘Umwami w’Abasiriya n’abasoda biwe ntibazokwinjira i Yeruzalemu, mbere ntibazoruha banahegera. Nta mwampi n’umwe bazorasayo.’

Rāba ngaha kuri iki gishushanyo. Abo basoda bapfuye urazi abo ari bo? Ni abasiriya. Yehova yatumye umumarayika, yica abasoda 185 000 mw ijoro rimwe, umwami wabo aca ariruka.

Iyo miryango ibiri irarokoka, imara imisi iri mu mahoro. Hezekiya arapfa, umuhungu wiwe Manase aba umwami. Manase n’umuhungu wiwe Amoni baba babi, inkozi z’ibibi zisubira kugwira mu gihugu. Amoni yicwa n’umusuku wiwe, Yosiya umuhungu wiwe aca aba umwami w’iyo miryango ibiri.