Ku wa 23 Rusama 2023, umuyobozi mukuru mu rwego rwitaho amagara y’abantu muri Leta Zunze Ubumwe za Amerika yaragabishije abanyagihugu ko imbuga hwaniro ziriko ziragira ingaruka mbi ku bakiri bato benshi.

•   «Naho imbuga hwaniro zishobora kugirira akamaro abana bamwebamwe n’imiyabaga, biramaze kwibonekeza ko zishobora no gutuma abana n’imiyabaga bagira ingorane zikomeye ku magara yo mu mutwe hamwe no ku mubiri.»​—Vyavuzwe na Social Media and Youth Mental Health: The U.S. Surgeon General’s Advisory, 2023.

 Ayo matohoza yakozwe aratwereka igituma bikwiye kuturaza ishinga.

•   Imiyabaga ifise imyaka iri hagati ya 12 na 15 «imara amasaha arenga 3 ku musi iriko irakoresha imbuga hwaniro, irakarirwa cane n’ingorane z’amagara yo mu mutwe harimwo n’ibimenyetso vy’akabonge no guhagarika umutima.»

•   Igihe abana bafise imyaka 14 «bakoresha cane imbuga hwaniro akenshi usanga badasinzira neza, batotezwa kuri internet, badashima uko basa, bakumva ata co bamaze kandi bakagira akabonge. Ivyo bikaba bishikira cane abakobwa kuruta uko bishikira abahungu.»

 Ni gute abavyeyi bokingira abana babo izo ngorane? Bibiliya iratanga impanuro ngirakamaro.

 Nugire ico ukoze. Kubera ko uri umuvyeyi, urakwiye kuzirikana ingaruka ziva ku gukoresha imbuga hwaniro hanyuma ugahitamwo nimba umwana wawe yozikoresha canke ko atozikoresha.

•   Ico Bibiliya ivuga: «Rera umwana wisunze inzira imubereye.»​—Imigani 22:6.

•   Kugira umenye n’ibindi, soma ikiganiro kivuga ngo «Umwana wanje yoba akwiye gukoresha imbuga hwaniro?»

 Nimba uhisemwo ko umwana wawe akoresha imbuga hwaniro, nuzirikane ingorane bishobora guteza kandi ukurikiranire hafi ingene umwana wawe akoresha internet. None wobigenza gute?

 Nukingire umwana wawe ivyomugirira nabi. Numenyereze umwana wawe kumenya ibintu bitabereye bashirako n’ingene yovyirinda.

•   Ico Bibiliya ivuga: «Ubusambanyi n’ubuhumane bw’ubwoko bwose canke umunoho, no kuvugwa ntibikavugwe muri mwebwe, . . . ntihakabe n’ingeso ziteye isoni canke ibiyago vy’ubupfu canke ibijajuro biteye isoni.»​—Abanyefeso 5:3, 4

•   Kugira uronke ibindi vyiyumviro ngirakamaro, nusome ikiganiro kivuga ngo «Niwigishe abana bawe b’imiyabaga ukuntu bokoresha neza imbuga hwaniro.»

 Numushingire uturimbi. Nk’akarorero, urashobora gushingira umwana wawe umwanya yomara akoresha imbuga hwaniro n’ukuntu yozikoresha.

•   Ico Bibiliya ivuga: «Mugume muraba neza ukuntu mugenda . . . mugende nk’abantu b’inkerebutsi, mwicungurira umwanya ubereye.»​—Abanyefeso 5:15, 16.

•   Nukoreshe akavidewo kavuga ngo Ibisigurwa bariko barabicapa Nukoreshe neza ubuhinga bwa none kugira ufashe umwana wawe kubona igituma bihambaye kwishingira uturimbi igihe akoresha imbuga hwaniro.