31 KANAMA 2022 | YAHUJWE N’IGIHE: 26 MUTARAMA 2023
U BURUSIYA

AMAKURU MASHYA—UMUVANDIMWE YAHAMIJWE ICYAHA | “Yehova yampaye incuti zitagira ubwoba zimba hafi”

FUNGURA

Ku itariki ya 24 Mutarama 2023, Urukiko rw’akarere ka Kuznetsk ruherereye Novokuznetsk, mu gace ka Kemerovo rwahamije icyaha umuvandimwe Sergey Sushilnikov kandi rumukatira imyaka itandatu y’igifungo gisubitse. Ntibizaba ngombwa ko ajyanwa muri gereza.

Uko ibintu byagiye bikurikirana

Mu Gushyingo 2019

Abashinzwe iperereza batangiye kumviriza ibiganiro Sergey agirana n’abantu kuri telefone no gufata amajwi n’amashusho y’ibibera mu rugo rwe
Ku itariki ya 3 Kamena 2021

Yatangiye gukurikiranwaho ibyaha
Ku itariki ya 8 Kamena 2021

Basatse urugo rwe. Sergey n’umugore we bajyanywe guhatwa ibibazo
Ku itariki ya 15 Nyakanga 2021

Yashyizwe ku rutonde rw’abantu bakora ibikorwa by’iterabwoba kandi na konti ze zo muri banki zarafatiriwe
Ku itariki ya 8 Gashyantare 2022

Yashinjwe gutegura no gukomeza gukora ibikorwa by’umuryango ushinjwa ibikorwa by’ubutagondwa. Kandi yanamenyeshejwe ko atemerewe kuva mu rugo.
Ku itariki ya 30 Werurwe 2022

Ni bwo urubanza rwatangiye

Icyo twamuvugaho

Sergey Sushilnikov

Igihe yavukiye: 1957 (Korkino, mu gace ka Chelyabinsk)

Ibimuranga: Yari umuyobozi aho yakoraga mu ruganda rw’amashanyarazi. Ari mu kiruhuko cy’izabukuru

Yashakanye na Tatyana mu mwaka wa 1979. Bafite abakobwa babiri

Mubyara w’umugore we ni we watumye amenyana n’Abahamya ba Yehova. We na Tatyana babatirijwe rimwe mu mwaka wa 1996

Ibyo yavuze

Ni irihe hame ryo muri Bibiliya ryagufashije cyane muri ibi bihe?

Nkunda cyane Imigani 17:17, hagira hati: “Incuti nyakuri igukunda igihe cyose, kandi ikubera umuvandimwe mu gihe cy’amakuba.” Aya magambo yarushijeho kugira imbaraga muri iki gihe cy’ibitotezo cyane cyane iyo ntashoboraga kubyihanganira ndi njyenyine. Yehova yampaye incuti zitagira ubwoba zimba hafi kandi zari ziteguye kumfasha igihe cyose ibintu byabaga bitameze neza.

Ni mu buhe buryo abavandimwe na bashiki bacu bagufashije wowe n’umugore wawe?

Nyuma yo kudusaka, njye n’umugore wanjye batujyanye ku biro bya polisi bajya kuduhata ibibazo. Umugore wanjye ni we babanje kurekura. Akigera mu rugo hari mushiki wacu w’intwari wahise aza kumureba mu rugo. Nyuma yaho hari izindi ncuti zacu zaje kudufasha gusubiza ibintu mu mwanya wabyo. Ndetse hari n’umusaza waje kureba uko tumerewe nubwo kuza iwacu icyo gihe byari biteje akaga.

Muri Yohana 13:35, Yesu yaravuze ati: “Ibyo ni byo bose bazabamenyeraho ko muri abigishwa banjye, nimukundana.” Njye na Tatyana dushimishwa no kuba dufite incuti zidukunda zityo kandi ibyo twarabyiboneye rwose.

Duhumurizwa no kumenya ko buri gihe Yehova azafasha abagaragu be b’indahemuka “mu gihe cy’amakuba.”—Zaburi 46:1.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU