Kronika Wakutoma 11:1-47
11 Mukupita kwa ndzidzi, Aizraeli onsene aenda kuna Dhavidhi ku Ebhroni+ mbampanga: “Onani! Ife ndife manungo anu na magogodo anu.*+
2 Kale, Sauli pikhali iye mambo, imwe mukhatsogolera Aizraeli pakumenya nkhondo.*+ Pontho Yahova Mulungu wanu akupangani: ‘Unadzakumbiza mbumba yanga ya Izraeli, mbukhala ntsogoleri wa mbumba yanga ya Izraeli.’”+
3 Natenepa akulu onsene a Izraeli afika kuna mambo ku Ebhroni, pontho Mambo Dhavidhi acita nawo cibverano ku Ebhroni pamaso pa Yahova. Buluka penepo iwo adzodza Dhavidhi toera akhale mambo wa Izraeli,+ mwakubverana na mafala a Yahova adalonga Samweli.+
4 Mukupita kwa ndzidzi, Dhavidhi na Aizraeli onsene akhali na iye aenda ku Yerusalemu, kwakuti ndi ku Yebusi,+ mu dziko ikakhala Ayebusi.+
5 Anthu a ku Yebusi apwaza Dhavidhi, mbalonga: “Iwe cipo unapita mu nzinda uno!”+ Mbwenye Dhavidhi akunda nzinda wakutsidzikizwa wa Sioni,+ wakuti mukupita kwa ndzidzi wadzacemerwa Nzinda wa Dhavidhi.+
6 Dhavidhi alonga: “Munthu wakutoma anafuna kukunda Ayebusi, anadzakhala nkulu wa anyankhondo.” Yoabhe+ mwana wa Zeruya ndiye adatoma kuenda kunkhondo, mbakhala nkulu wa anyankhondo.
7 Buluka penepo, Dhavidhi aenda kakhala mu nzinda wakutsidzikizwa. Na thangwi ineyi, nzinda unoyu iwo aucemera Nzinda wa Dhavidhi.
8 Iye atoma kumanga nyumba mu nzinda unoyu onsene, kutomera ku Nkuku wa Mataka mpaka ku mbuto zinango. Yoabhe ndiye adamanga pontho mbuto zinango za nzinda unoyu.
9 Natenepa, Dhavidhi adzakhala wamphambvu kakamwe,+ pontho Yahova wa anyankhondo akhali na iye.
10 Awa ndi atsogoleri a anyankhondo amphambvu a Dhavidhi, akuti pabodzi na Aizraeli onsene aphedzera na ntima onsene umambo wace, mbam’phedza toera akhazikiswe ninga mambo mwakubverana na mafala adalonga Yahova kuna Aizraeli.+
11 Awa ndi madzina a anyankhondo amphambvu a Dhavidhi: Yasobhiamu+ mwana wa Akimoni, wakuti akhali ntsogoleri wa anyankhondo atatu amphambvu.+ Ntsiku inango, iye apha amuna 300 na dipa yace.+
12 Buluka iye, unango akhali Eleazare+ mwana wa Dhodho wa dzindza ya Aoite.+ Iye akhali m’bodzi wa anyankhondo atatu amphambvu.
13 Iye akhali na Dhavidhi ku Efesi-Dhamimu,+ kudagumanyikana Afilisti toera kumenya nkhondo. Kweneko kukhali munda wa sevadha, pontho anyankhondo* akhadathawa thangwi yakugopa Afilisti.
14 Mbwenye iye alimira pakati pa munda mbautsidzikiza, pontho iye apitiriza kupha Afilisti, natenepa Yahova aphedza mbumba yace toera kuwina kakamwe.+
15 Atatu mwa atsogoleri 30 aenda mpaka ku mwala toera aonane na Dhavidhi n’dzimba ya Adhulamu.+ Pa ndzidzi unoyu Afilisti akhadamanga misasa yawo ku Gowa ya Refaimu.+
16 Dhavidhi akakhala pa mbuto yakunentsa kufikapo, mbwenye anyankhondo a Afilisti akhali ku Bhetelehemu.
17 Dhavidhi alonga: “Ine mbandidakomerwa kakamwe kumwa madzi a mu ncera wakuti uli dhuzi na nsuwo ukulu wa ku Bhetelehemu.”+
18 Penepo anyankhondo atatu amphambvu awangisira mbapita pakati pa misasa ya Afilisti, atunga madzi mu ncera wakuti ukhali dhuzi na nsuwo ukulu wa ku Bhetelehemu mbaabweresa kuna Dhavidhi; mbwenye Dhavidhi akhonda kumwa madzi anewa, mbaathirira pantsi ninga muoni kuna Yahova.
19 Iye alonga: “Ine cipo ndinacita pyenepi thangwi yakulemedza Mulungu wanga! Pinacitika tani kuti ine ndimwe ciropa ca amuna awa adaikha umaso wawo pangozwi?+ Thangwi iwo aikha umaso wawo pangozwi toera kubweresa madzi anewa.” Natenepa iye akhonda kuamwa. Pyenepi ndi pinthu pidacita anyankhondo atatu amphambvu a Dhavidhi.
20 Abhisai+ m’bale wace Yoabhe+ adzakhala ntsogoleri wa anyankhondo anango atatu amphambvu; ntsiku inango, iye apha amuna 300 na dipa yace, pontho iye adzakhalambo wakubvekera ninga anyankhondo anango atatu.+
21 Mu utatu wawo, iye akhali wakubvekera kakamwe pakati pa anyankhondo awiri, pontho akhali ntsogoleri wawo; ngakhale tenepo, iye nee afika pakukhala na cidzo ninga cikhali na anyankhondo atatu akutoma.
22 Bhenaya+ mwana wa Yeoyadha akhali mamuna wacipapo wakuti acita pinthu pizinji ku Kabhizeli.+ Iye apha ana awiri a Ariyeli wa ku Moabhe, apita n’djenje pa ntsiku ya nkhungwi, mbapha nkhalamu.+
23 Kusiyapo pyenepi, iye apha mamuna wankulu kakamwe wa ku Ejitu, cimo cace cikhali metru ziwiri na masentimetru 23.+ Maseze mamuna wa ku Ejitu akhali na dipa m’manja mwace yakulemera ninga muti wa anyakuluka nguwo,+ Bhenaya aenda kamenyana naye na ndodo. Iye apokosera dipa mamuna unoyu wa ku Ejitu mbamupha nayo.+
24 Pyenepi ndi pinthu pidacita Bhenaya mwana wa Yeoyadha, pontho iye adzakhalambo wakubvekera ninga anyankhondo atatu amphambvu.
25 Maseze akhali wakubvekera kakamwe kupiringana amuna 30, iye nee afika pakukhala na cidzo ninga cikhali na anyankhondo atatu amphambvu.+ Mbwenye Dhavidhi ansankhula toera akhale nyankhondo wace wakumuonera.
26 Anyankhondo amphambvu a nsoka wa anyankhondo akhali Azaeli+ m’bale wace Yoabhe, Elanani mwana wa Dhodho wa ku Bhetelehemu,+
27 Samoti wa ku Arori, Elezi wa ku Peloni,
28 Ira+ mwana wamamuna wa Ikesi wa ku Tekoa, Abhiezeri+ wa ku Anatote,
29 Sibhekai+ wa ku Usa, Ilai wa dzindza ya Aoite,
30 Marai+ wa ku Netofa, Eledhi+ mwana wa Bhana wa ku Netofa,
31 Itai mwana wa Ribhai wa ku Jibheya wa dzindza ya Bhenjamini,+ Bhenaya wa ku Piratoni,
32 Urai wa ku gowa ya Gasi,+ Abhiyeli wa ku Arabha,
33 Azimaveti wa ku Bhaurimu, Eliabha wa ku Salbhimu,
34 ana a Asemu wa ku Jizoni, Yonatani mwana wa Sage wa ku Arari,
35 Aiyamu mwana wa Sakari wa ku Arari, Elifale mwana wa Uri,
36 Eferi wa ku Mekerati, Aiya wa ku Peloni,
37 Eziro wa ku Karmelo, Narai mwana wa Ezibhai,
38 Yoeli m’bale wace Natani, Mibhari mwana wa Agri,
39 Zeleki wa dzindza ya Amoni, Naarai wa ku Bheroti nyakuthukula pida pya nkhondo pya Yoabhe mwana wa Zeruya;
40 Ira wa m’banja ya Itiri, Garebhi wa m’banja ya Itiri,
41 Uriya+ wa dzinza ya Eti, Zabhadhi mwana wa Alai,
42 Adhina mwana wa Siza wa dzinza ya Rubheni, wakuti akhali ntsogoleri wa dzindza ya Rubheni, iye akhali na anyankhondo 30;
43 Anane mwana wa Maaka, Yosafati wa ku Mitini,
44 Uziya wa ku Astaroti, Sama na Jeiyeli akuti akhali ana a Otamu wa ku Aroeri;
45 Yedhieli mwana wa Simiri na m’bale wace akhacemerwa Yowa, iwo akhali a ku Tizi;
46 Eliyeli wa dzindza ya Aavi, Yeribhai na Yosaviya ana a Elnami, Itima wa ku Moabhe;
47 Eliyeli, Obhedhi na Yasiyeli wa ku Mizobha.
Pidzindikiro Pyapantsi
^ Peno: “ndife a ciropa cibodzi cene.”
^ Fala na Fala: “ndimwe akhabulusa mbamupitisa Izraeli.”
^ Peno: “anthu.”
