Kronika Wakutoma 12:1-40
-
Anthu adaphedzera umambo wa Dhavidhi (1-40)
12 Awa ndi amuna adaenda kuna Dhavidhi ku Zikilage+ mu ndzidzi wakuti iye nee akhakwanisa kufamba pakweca thangwi yakugopa Sauli+ mwana wa Kisi; iwo akhali pakati pa anyankhondo amphambvu akhaphedza Dhavidhi kunkhondo.+
2 Iwo akhali na mauta, pontho akhakwanisa kuphata basa na mikono miwiri ene+ toera kuponya miyala na funda+ peno kuponya mapswimo na uta. Iwo akhali abale ace Sauli, a dzindza ya Bhenjamini.+
3 Ntsogoleri akhali Aiyezeri pabodzi na Yowasi, uwiri wawo akhali ana a Semaa wa ku Jibheya;+ Yeziyeli na Peleti ana a Azimaveti;+ Bheraka; Jeu wa ku Anatote;
4 Ijimaya wa ku Jibheyoni,+ iye akhali m’bodzi wa anyankhondo 30 amphambvu,+ pontho akhali ntsogoleri wawo; Yeremiya, Yaaziyeli, Yowanani, Yozabhadhi wa ku Jedhera,
5 Eluzai, Yerimoti, Bhealiya, Semariya, Sefatiya wa ku Arifi,
6 Elikana, Isiya, Azareli, Yowezeri na Yasobhiamu akuti ndi a dzindza ya Kora;+
7 akhalipombo Yowela na Zebhadhiya ana a Yeroamu wa ku Jedhori.
8 Amuna anango a dzindza ya Gadhi asankhula kukhala kukhundu ya Dhavidhi mbaenda ku mbuto idabisala iye n’thando.+ Iwo akhali anyankhondo amphambvu, adapfundziswa toera kumenya nkhondo, iwo akhali na maxango makulu na madipa. Nkhope zawo zikhaoneka ninga za nkhalamu, pontho akhathamanga mwakucimbiza kakamwe ninga mbawala m’mapiri.
9 Ezeri akhali ntsogoleri wawo, waciwiri akhali Obhadhiya, wacitatu akhali Eliabhe,
10 wacinai akhali Misimana, wacixanu akhali Yeremiya,
11 wacitanthatu akhali Atai, wacinomwe akhali Eliyeli,
12 wacisere akhali Yowanani, wacipfemba akhali Elzabhadhi,
13 wacikhumi akhali Yeremiya, wacikhumi na m’bodzi akhali Makibhanai.
14 Anewa akhali atsogoleri a anyankhondo a dzindza ya Gadhi.+ Wang’ono mbadakwanisa kukunda anyankhondo 100, wankulu mbadakwanisa kukunda anyankhondo 1.000.+
15 Anewa ndi amuna adawambuka nkulo wa Yordani pa mwezi wakutoma wa caka mu ndzidzi wakuti madzi akhadadzala mbatayikira. Iwo athamangisa anthu onsene akakhala m’magowa, kumabulukiro a dzuwa na kumadokero a dzuwa.
16 Amuna anango a dzindza ya Bhenjamini na a dzindza ya Yuda aendambo kuna Dhavidhi ku mbuto idabisala iye.+
17 Dhavidhi abuluka mbaenda kaonana nawo, mbaapanga: “Khala mwabwera ninga axamwali toera kundiphedza, ine ndiri dzololo toera kukutambirani na ntima onsene. Mbwenye khala mwabwera toera kundisandukira, pontho toera mundipereke kuna anyamalwa anga, maseze nee ndacita cinthu cakuipa, Mulungu wa ambuyathu mbaone pyenepi, pontho mbatonge mwakulungama.”+
18 Penepo nzimu wa Mulungu wapita muna Amasai+ ntsogoleri wa anyankhondo 30, mbalonga:
“Dhavidhi, ife ndife anthu anu, pontho ife tiri na imwe mwana wa Yese.+
Ntendere, ntendere mbukhale na imwe; ntendere mbukhale na ale anakuphedzani,Thangwi Mulungu wanu ali kukuphedzani.”+
Natenepa, Dhavidhi aatambira mbaakhazikisa ninga atsogoleri a misoka ya anyankhondo.
19 Amuna anango a dzindza ya Manase athawambo mbaenda kuna Dhavidhi pidaenda iye pabodzi na Afilisti toera kumenyana na Sauli. Mbwenye Dhavidhi nee aphedza Afilisti,+ thangwi amambo a Afilisti pidamala iwo kubverana, asiya Dhavidhi toera aende, mbalonga: “Iye anathawa mbaenda kuna Sauli mbuyace, pyenepi pinaikha pangozwi umaso wathu.”*+
20 Pidaenda Dhavidhi ku Zikilage,+ awa ndi amuna a dzindza ya Manase adathawa mbabwera kuna iye: Adhinala, Yozabhadhi, Yedhieli, Mikaeli, Yozabhadhi, Eliyu na Ziletai. M’bodzi na m’bodzi akhali ntsogoleri wa anyankhondo 1.000 mu dzindza ya Manase.+
21 Iwo aphedza Dhavidhi toera kumenyana na nsoka wa anyankhondo adatapata pinthu pyawo, thangwi iwo akhali amuna amphambvu na acipapo,+ iwo adzakhala atsogoleri a anyankhondo.
22 Ntsiku zonsene anthu akhabwera toera kuphedza Dhavidhi+ mpaka nsoka wace mbukhala ukulu kakamwe ninga nsoka wa mbumba ya Mulungu.+
23 Awa ndi atsogoleri a anyankhondo adaenda kuna Dhavidhi ku Ebhroni,+ toera kubulusa umambo wa Sauli mbaupereka kuna iye mwakubverana na pikhadalonga Yahova.+
24 Amuna a dzindza ya Yuda adakhunganyika toera kuenda kunkhondo, akuti akhali na maxango makulu na madipa akhalipo 6.800.
25 Anyankhondo amphambvu na acipapo a dzindza ya Simeoni akhalipo 7.100.
26 A dzindza ya Levi akhalipo 4.600.
27 Yeoyadha+ akhali ntsogoleri wa ana a Aroni,+ iye akhali na amuna 3.700,
28 pabodzi na Zadhoke+ m’phale wamphambvu na wacipapo, iye akhali pabodzi na atsogoleri 22 a mbumba yace.
29 A dzindza ya Bhenjamini abale ace Sauli+ akhalipo 3.000, azinji a iwo kale akhaonera panyumba ya Sauli.
30 A dzindza ya Efraimu akhalipo amuna 20.800, iwo akhali amphambvu, acipapo na akubvekera pakati pa mbumba yawo.
31 Pa hafu ya dzindza ya Manase akhalipo amuna 18.000 adasankhulwa toera abwere kudzakhazikisa Dhavidhi ninga mambo.
32 A dzindza ya Isakari akuti akhali na maluso akudziwa pya midzidzi na pinthu pyakuti Aizraeli akhafunika kupicita, akhalipo atsogoleri 200, abale awo onsene akhatsogolerwa na iwo.
33 A dzindza ya Zebhuloni akhalipo amuna 50.000 adathema toera kuenda kunkhondo, akuti akhadakhunganyika toera kumenya mwadidi nkhondo na mitundu yonsene ya pida pya nkhondo. Onsene akhaphedzera Dhavidhi mwakukhulupirika na ntima onsene.*
34 A dzindza ya Nafitali akhalipo atsogoleri 1.000, iwo akhali na anyankhondo 37.000 akuti akhali na maxango makulu na madipa.
35 A dzindza ya Dhani akuti mbadakwanisa kuenda kunkhondo akhali 28.600.
36 A dzindza ya Azeri akuti mbadakwanisa kuenda kunkhondo akhalipo 40.000.
37 Kuntunda unango wa Yordani,+ mu dzindza ya Rubheni, ya Gadhi na hafu ya dzindza ya Manase, akhalipo anyankhondo 120.000 akuti akhali na mitundu yonsene ya pida pya nkhondo.
38 Amuna anewa onsene akhali anyankhondo adakhunganyika toera kumenya nkhondo, iwo aenda ku Ebhroni thangwi akhafuna na ntima onsene kukhazikisa Dhavidhi ninga mambo wa Aizraeli onsene. Aizraeli anango onsene akhalimbo na cifuno cibodzi cene cakukhazikisa Dhavidhi ninga mambo.+
39 Iwo apitiriza kukhala kweneko mu ntsiku zitatu pabodzi na Dhavidhi, iwo akhadya mbamwa pinthu pidakhunganyirwa iwo na abale awo.
40 Kusiyapo pyenepi, ale akakhala cifupi na iwo pabodzi na ale akakhala kutali ninga kupisa pya Isakari, Zebhuloni na Nafitali akhabweresa pyakudya pa maburu, makamelo na ng’ombe. Iwo abweresa ufa, mikate yakucitwa na masambvu na mauva akuuma, vinyu, mafuta, ng’ombe na mabira. Iwo abweresambo ng’ombe zizinji na mabira mazinji, thangwi mu dziko ya Izraeli anthu akhali akutsandzaya.
Pidzindikiro Pyapantsi
^ Fala na Fala: “anatigwanda misolo.”
^ Peno: “onsene adaenda kaphedzera Dhavidhi nee akhali anthu a mitima miwiri.”
