Kronika Wakutoma 19:1-19
19 Mukupita kwa ndzidzi, Naasi mambo wa Aamoni afa, pontho mwanace apita pa mbuto ya babace mbakhala mambo.+
2 Natenepa Dhavidhi alonga: “Ine ndinapangiza ufuni ukulu+ kuna Anuni mwana wa Naasi thangwi babace apangiza ufuni ukulu kuna ine.” Penepo Dhavidhi atuma anthu ace toera aende kabalangaza Anuni thangwi yakufa kwa babace. Mbwenye atumiki a Dhavidhi pidafika iwo mu dziko ya Aamoni+ toera abalangaze Anuni,
3 atsogoleri a Aamoni abvundza Anuni: “Kodi imwe musanyerezera kuti Dhavidhi akulemedza babanu pidatuma iye anthu toera kudzakubalangazani? Kodi iye nee atuma atumiki ace toera adzaone kuti dziko yonsene iri tani, aidziwe mwadidi toera angamala akukundeni?”
4 Natenepa Anuni aphata atumiki a Dhavidhi, aacinga ndebvu,+ mbaapandulira nguwo zidabvala iwo mpaka m’matako, buluka penepo aasiya toera aende.
5 Dhavidhi pidapangwa iye pyenepi, atuma anthu mwakucimbiza toera akaonane na atumiki ace, thangwi iwo acitirwa pinthu pyakupasa manyadzo kakamwe. Natenepa, mambo aapanga: “Khalani ku Yeriko+ mpaka ndebvu zanu zikule, buluka penepo bwerani.”
6 Mukupita kwa ndzidzi, Aamoni adzindikira kuti akhadasosa Dhavidhi, natenepa Anuni na Aamoni atumiza anthu ku Mezopotamya, ku Aramu-Maaka na ku Zobha+ mbapasa matalento* 1.000 a parata toera abwereke ngolo za nkhondo na anyamakavalo.
7 Natenepa, iwo abwereka ngolo 32.000 za nkhondo, mambo wa ku Maaka na anyankhondo ace aendambo. Buluka penepo iwo abwera, mbalimira kutsogolo kwa Medhebha+ toera kumenya nkhondo. Aamoni abuluka m’mizinda yawo, mbagumanyikana toera kumenya nkhondo.
8 Dhavidhi pidabva iye pyenepi, atuma Yoabhe+ na nsoka onsene wa anyankhondo, kuphatanizambo anyankhondo ace amphambvu kakamwe.+
9 Aamoni apakana pansuwo ukulu wa nzinda toera kumenya nkhondo, mu ndzidzi wakuti amambo adabwera akhali kukhundu yawo okhene ntsanga.
10 Yoabhe pidaona iye kuti anyamalwa akubwera kutsogolo kwace na nduli mwace toera kumenyana na iye, asankhula anyankhondo angasi adidi kakamwe a Izraeli mbaapaka toera amenyane na anthu a ku Sirya.+
11 Anyankhondo anango onsene iye aapereka kuna m’bale wace akhacemerwa Abhisai+ toera aapake kuti amenyane na Aamoni.
12 Buluka penepo iye alonga: “Anyankhondo a ku Sirya+ angafuna kundikunda, bwera udzandiphedze; mbwenye Aamoni angafuna kukukunda, ine ndinabwera kudzakuphedza.
13 Ife tisafunika kukhala amphambvu na acipapo+ toera kutsidzikiza mbumba yathu na mizinda ya Mulungu wathu, pontho Yahova anadzacita pinaona iye kuti ndi pyadidi.”
14 Natenepa Yoabhe na amuna akhali na iye aenda kamenyana na anyankhondo a Sirya, iwo mbathawa pamaso pace.+
15 Aamoni pidaona iwo kuti anyankhondo a ku Sirya athawa, iwo athawambo Abhisai m’bale wace Yoabhe, mbapita mu nzinda. Buluka penepo, Yoabhe abwerera ku Yerusalemu.
16 Anyankhondo a ku Sirya pidaona iwo kuti akundwa na Aizraeli, atumiza mphangwa toera kucemera anthu a ku Sirya akhali kucisa ca ku Nkulo wa Eufrate,+ akuti akhatsogolerwa na Sofaki nkulu wa anyankhondo a Adhadhezeri.+
17 Dhavidhi pidapangwa iye mphangwa zenezi, mwakukhonda dembuka agumanya anyankhondo onsene a Aizraeli, awambuka nkulo wa Yordani, aenda kuna iwo, mbandandalisa anyankhondo ace toera kumenyana nawo. Dhavidhi pidapaka iye anyankhondo ace, anyankhondo a ku Sirya amenyana naye.+
18 Mbwenye anyankhondo a ku Sirya athawa Aizraeli; Dhavidhi apha anyakufambisa ngolo za nkhondo 7.000 na anyamakavalo a a ku Sirya 40.000 akuti akhafamba na miyendo, pontho iye apha Sofaki nkulu wa anyankhondo awo.
19 Atumiki a Adhadhezeri pidaona iwo kuti akundwa na Izraeli,+ mwakukhonda dembuka iwo akhazikisa ntendere na Dhavidhi mbatongwa na iye;+ buluka penepo anyankhondo a ku Sirya nee akhafunabve kuphedza pontho Aamoni.
Pidzindikiro Pyapantsi
^ Talento ibodzi ikhalemera makilu 34,2. Onani Apendise B14.
