Kronika Wakutoma 28:1-21
28 Dhavidhi agumanya atsogoleri onsene a Izraeli mu Yerusalemu: Atsogoleri a madzindza, atsogoleri a misoka+ ikhatumikira mambo, atsogoleri a anthu 1.000 na atsogoleri a anthu 100,+ akulu akhaonera pinthu pya mambo,+ akhaonera pifuyo pyace na anace,+ kuphatanizambo akulu a utongi pabodzi na amuna onsene amphambvu na akunyindirika.+
2 Buluka penepo, Mambo Dhavidhi alamuka, mbalonga:
“Ndibvesereni abale anga na mbumba yanga. Pikhafuna ine muntima mwanga ndi kumanga nyumba toera Bokosi ya Cibverano ca Yahova ikhale mwenemu, pontho toera ikhale mbuto yakuti Mulungu wathu aikhepo manyalo ace,+ ine ndakhunganya* pinthu toera kumanga napyo.+
3 Mbwenye Mulungu wandimomwene andipanga: ‘Iwe nee unamanga nyumba toera kupasa mbiri dzina yanga,+ thangwi iwe wamenya nkhondo zizinji, pontho wapha anthu azinji.’+
4 Ngakhale tenepo, Yahova Mulungu wa Izraeli andisankhula pakati pa anthu a panyumba ya pai wanga toera ndikhale mambo wa mbumba yonsene ya Izraeli kwenda na kwenda.+ Thangwi iye asankhula Yuda toera akhale ntongi,+ mu dzindza ya Yuda iye asankhula nyumba ya pai wanga,+ pontho mwa ana a pai wanga, iye akomerwa na ine toera ndikhale mambo wa dzindza yonsene ya Izraeli.+
5 Mbwenye mwa ananga onsene,+ nakuti Yahova andipasa ana azinji, iye asankhula mwananga Salomoni+ toera akhale pa mpando waumambo wa Yahova toera atonge Izraeli.+
6 “Iye andipanga: ‘Mwanako Salomoni ndiye anafuna kumanga nyumba yanga na makhonde anga, thangwi ine ndansankhula toera akhale mwananga, pontho ine ndinadzakhala babace.+
7 Angasankhula kubvera mitemo yanga na matongero anga+ ninga pinacita iye lero, ine ndinadzakhazikisa mwakuwanga umambo wace kwenda na kwenda.’+
8 Natenepa, ine ndalonga pamaso pa Aizraeli onsene akuti ndi mbumba ya* Yahova, na pamaso pa Mulungu wathu: Sakani kudziwa matongero onsene a Yahova Mulungu wanu mbamuabvera na ntima onsene, toera mupitirize kukhala mu dziko ino yadidi,+ mbamuipereka kuna ananu ninga unthaka wawo.
9 “Mbwenye iwe mwananga Salomoni, dziwa Mulungu wa pai wako, untumikire na ntima wako onsene,+ pontho mwakutsandzaya,* thangwi Yahova asadinga mitima yonsene,+ pontho iye asadziwa manyerezero onsene a munthu na pifuno pyace.+ Ungansaka, iwe unan’gumana,*+ mbwenye ungansiya, iye anadzakukhonda kwenda na kwenda.+
10 Cincino kumbuka mwadidi kuti Yahova akusankhula toera umange nyumba toera ikhale mbuto yakucena. Khala wacipapo, mbutoma kuphata basa ineyi.”
11 Penepo Dhavidhi apereka kuna mwanace Salomoni tsamba+ ikhapangiza kuti khonde+ na makwartu akusiyana-siyana a nyumba akhafunika kumangwa tani, kuphatanizambo mbuto zinakoyerwa pinthu, makwartu a ndzulu, ankati na nyumba inakoyerwa mphampha* ya ntsembe yakucenesa madawo.+
12 Iye ampasa tsamba ya pinthu pyonsene pidapangizwa iye na nzimu wakucena toera kumanga makhonde+ a nyumba ya Yahova, masala onsene akudyera ali n’khundu mwa nyumba ineyi, mbuto zakukoyera mpfuma za panyumba ya Mulungu wandimomwene na zakukoyera pinthu pidaperekwa toera pikhale pinthu pyakucena.+
13 Ampasambo pitsogolero thangwi ya misoka ya anyantsembe+ na ya Alevi, pitsogolero pya mabasa onsene akhafunika kuphatwa panyumba ya Yahova, na pitsogolero thangwi ya pyombo pyonsene pinafunika kuphatisirwa m’basa ya panyumba ya Yahova.
14 Iye alonga ntsama ya ouro ikhafunika kuphatisirwa toera kusasanya pyombo pyonsene pinafuna kuphatisirwa m’mabasa akusiyana-siyana, na parata ya pyombo pyonsene pya parata pinafuna kuphatisirwa m’mabasa akusiyana-siyana;
15 iye alongambo ntsama ya ouro ikhafunika toera kusasanya pyakuikhira nyale pya ouro+ na nyale zace za ouro, parata ya pyakuikhira nyale pya parata na nyale zace za parata, ninga mukhaphatisirwa izo;
16 alonga ntsama ya ouro ikhafunika toera kusasanya meza zakuikhira mikate ya ntsembe,*+ na parata ikhafunika toera kusasanya meza za parata;
17 ouro yadidi kakamwe toera kusasanya magarfu, mbale na makhomitco makulu; alonga ouro ikhafunika toera kusasanya mbale zing’ono+ na parata toera kusasanya mbale zing’ono za parata.
18 Iye alongambo ntsama ya ouro yadidi kakamwe ikhafunika toera kusasanya guwa ya insenso+ na cipangizo ca ngolo,+ yakuti ndi akerubhi+ a ouro adafuthula maphapido awo mbaphimbira Bokosi ya Cibverano ca Yahova.
19 Dhavidhi alonga: “Yahova andipasa mphambvu,* pontho andipasa udziwisi toera kulemba tsamba+ ya pinthu pyonsene pinapangiza kuti nyumba ineyi isafunika kumangwa tani.”+
20 Dhavidhi apanga mwanace Salomoni: “Khala wacipapo na wamphambvu, pontho toma kuphata basa ineyi. Leka kugopa peno kutetemera, thangwi Yahova Mulungu, Mulungu wanga ali na iwe.+ Iye cipo anadzakusiya, nee kukuthawa,+ mbwenye anadzakhala na iwe mpaka kumalisa mabasa onsene akumanga nyumba ya Yahova.
21 Ine ndiri kukupasa misoka ya anyantsembe+ na ya Alevi+ toera kuphata mabasa onsene a panyumba ya Mulungu wandimomwene. Iwe uli na anyabasa akuti asafuna kuphata basa na ntima onsene, anthu a maluso toera kuphata mitundu yonsene ya mabasa,+ kuphatanizambo atsogoleri+ na mbumba yonsene, iwo anadzatoweza pitsogolero pyako pyonsene.”
Pidzindikiro Pyapantsi
^ Peno: “ndagumanya.”
^ Fala na Fala: “mpingo wa.”
^ Peno: “iye anakutawirisa kuti un’gumane.”
^ Peno: “na ntima wadidi.”
^ Peno: “tampa.”
^ Fala na Fala: “mikate yacipangizo.”
^ Fala na Fala: “djanja ya Yahova ikhali na ine.”
