Tsamba Yakutoma ya Pedhru 2:1-25
2 Natenepa, siyani uipi onsene,+ kunyengeza, umpfakafaka, bibvu na ntundu onsene wakuserusana.
2 Ninga akhombwani,*+ funani kakamwe nkaka wa mafala a Mulungu wakukhonda kubvungazwa na pinango,* toera kubulukira mwa iwo, imwe mukule toera mupulumuke,+
3 thangwi imwe mwaona kuti Mbuya ndi wakukoma ntima.
4 Mu ndzidzi unafendedzera imwe kuna iye, mwala wakuti uli na umaso, udakhondwa na anthu,+ mbwenye Mulungu ausankhula,+ pontho ndi wakufunika kakamwe kuna iye,
5 imwe ninga miyala yakuti iri na umaso, muli kumangwa ninga nyumba yauzimu+ toera mukhale nsoka wa anyantsembe akucena, kuti mupereke kuna Mulungu ntsembe zauzimu+ zakutawirika kubulukira mwa Yezu Kristu.+
6 Thangwi khundu inango ya Malemba isalonga: “Onani! Ine ndiri kuikha mu Sioni mwala wakusankhulwa, mwala wakufunika kakamwe wapankhomo,* nee mʼbodzi anakhulupira mwala unoyu anadzatsumbikika.”*+
7 Natenepa, kuna imwe iye ndi wakufunika kakamwe, thangwi ndimwe anyakukhulupira; mbwenye kuna anyakukhonda khulupira “Mwala udakhondwa na anyakumanga nyumba,+ wadzakhala mwala wakufunika kakamwe wapankhomo”*+
8 pontho iwo ndi “mwala wakugwegwedusa na mwala wakugwisa.”+ Iwo asagwegweduka thangwi nkhabe kubvera mafala a Mulungu. Pyenepi ndipyo pinafuna kudzaacitikira.
9 Mbwenye imwe ndimwe “dzindza yakusankhulwa, nsoka wa amambo akuti ndi anyantsembe, dzindza yakucena,+ anthu adasankhulwa toera akhale cinthu cakufunika kakamwe kuna Mulungu,+ toera mudziwise makhaliro akufunika kakamwe”+ a Ule adakucemerani kuti mubuluke ncidima toera muende mu ceza cace cadidi kakamwe.+
10 Thangwi kale imwe nee mukhali mbumba, mbwenye cincino ndimwe mbumba ya Mulungu.+ Kale imwe nee mukhabverwa ntsisi, mbwenye cincino musabverwa ntsisi.+
11 Abale akufunika, ine ndisakudembeterani ninga alendo akuti anakhala mu ndzidzi wakucepa pa dziko ino,+ kuti pitirizani kucalira pifuno pyaunyama,+ pyakuti pisamenyana na imwe.*+
12 Pitirizani kupangiza makhaliro adidi pakati pa anthu a dziko,+ toera iwo angakupambizirani kuti musacita pinthu pyakuipa, aone na maso awo mabasa anu adidi,+ natenepa iwo anadzasimba Mulungu pa ntsiku inafuna kudzadinga iye anthu.
13 Thangwi ya Mbuya, bverani ntundu onsene wa mautongi adakhazikiswa na anthu,+ khala ndi mambo,+ mbvereni thangwi iye ndi nkulu,
14 khala ndi atongi, abvereni ninga anthu adatumwa na mambo toera kutcunyusa ale anacita pinthu pyakuipa, mbasimba ale anacita pinthu pyadidi.+
15 Thangwi Mulungu asafuna kuti mucite pinthu pyadidi toera mumatamise* anthu akusowa ndzeru akuti asakulongani mwakuipa thangwi yakukhonda dziwa.+
16 Khalani anthu aufulu,+ ngakhale tenepo, lekani kuphatisira ufulu wanu toera kucita* pinthu pyakuipa,+ mbwenye toera mukhale mabitcu a Mulungu.+
17 Lemedzani anthu a mitundu yonsene,+ funani nsoka onsene wa abale anu,+ gopani Mulungu,+ lemedzani mambo.+
18 Mabitcu asafunika kubvera ambuyawo mbapangiza cilemedzo consene kuna iwo,+ tayu basi kuna ale akuti ndi adidi na akukoma ntima, mbwenye abverembo ale akuti ndi akunentsa kuakomeresa.
19 Thangwi munthu angapirira nyatwa* mbathabuka mwakusowa mulando toera kukhala na cikumbuntima cakucena pamaso pa Mulungu, pyenepi mphyadidi.+
20 Thangwi pina basa yanji khala imwe musamenywa thangwi yakucita pinthu pyakuipa, mbamupirira?+ Mbwenye khala imwe musapirira nyatwa thangwi yakucita pinthu pyadidi, pyenepi mphyadidi pamaso pa Mulungu.+
21 Mwandimomwene, imwe mwacemerwa toera kucita pyenepi, thangwi Kristu aona nyatwa thangwi ya imwe,+ mbapangiza kuna imwe kuti* munatowezera tani manyalo ace* mwakukhulupirika.*+
22 Iye nee acita madawo,+ pontho pamulomo pace nee pabuluka mafala authambi.+
23 Pikhatikanwa* iye,+ nee akhatawira mwakutikana.*+ Pikhaona iye nyatwa,+ nee akhathusa, mbwenye akhapereka pyonsene mʼmanja mwa Ule anatonga+ mwakulungama.
24 Iye akwata madawo athu+ mʼmanungo mwace pidakhomerwa iye pamuti wakusikimizira,+ toera ife tikhale akufa ku madawo, mbwenye tikhale mʼmaso toera kucita pinthu pyakulungama. Pontho “thangwi ya pironda pyace, imwe mwawangiswa.”+
25 Thangwi imwe mukhali ninga mabira akuti ali kutayika,+ mbwenye cincino mwabwerera kuna nkumbizi+ wanu na muyangʼaniri wa umaso wanu.
Pidzindikiro Pyapantsi
^ Peno: “ana adabalwa kwene cincino.”
^ Peno: “wakucena.”
^ Peno: “nee anadzaphatiswa mwala.” Fala na Fala: “nkhabe kudzapasika manyadzo.”
^ Mwala unoyu usaikhwa pankhomo ya nyumba panaphatana mapfufu mawiri.
^ Mwala unoyu usaikhwa pankhomo ya nyumba panaphatana mapfufu mawiri.
^ Peno: “umaso wanu.”
^ Peno: “mufunge milomo ya.”
^ Peno: “ninga cakuphimbira naco.”
^ Peno: “kutsukwala.”
^ Peno: “mwapadhuzi.”
^ Peno: “pidacita iye.”
^ Peno: “mbakusiyirani citsandzo cakuti.”
^ Peno: “Pikhaxolwa.”
^ Peno: “mwakuxola.”
