Amambo Waciwiri 15:1-38
15 Mu caka 27 ca Mambo Yerobhoamu* wa Izraeli, Azariya*+ mwana wa Mambo Amaziya+ wa ku Yuda adzakhala mambo.+
2 Iye akhali na pyaka 16 pyakubalwa pidakhazikiswa iye ninga mambo, pontho atonga pyaka 52 mu Yerusalemu. Mai wace akhali wa ku Yerusalemu, iye akhacemerwa Yekoliya.
3 Iye akhacita pinthu pyadidi pamaso pa Yahova ninga pidacita Amaziya wakuti ndi babace.+
4 Mbwenye iye nee afudza mbuto zaulambiri,+ pontho anthu akhapitiriza basi kupereka ntsembe mbacitisa kuti utci wa ntsembe zenezi uende kuna alungu awo.+
5 Yahova acitisa kuti mambo akhale na matanya, pontho iye apitiriza na matanya+ mpaka ntsiku yakufa kwace; iye akhadaikhwa n’nyumba yace ekha,+ mu ndzidzi unoyu Yotamu+ wakuti ndi mwana wa mambo, ndiye akhayang’anira nyumba ya mambo na kutonga miseru ya anthu a dziko ineyi.+
6 Mphangwa zinango zinalonga pya umaso wa Azariya+ na pinthu pyonsene pidacita iye, pyalembwa m’bukhu inalonga pinthu pidacitika mu ndzidzi wa amambo a ku Yuda.
7 Pakumalisa, Azariya afa ninga pidacita ambuyace,+ mbaikhwa munthumbi pabodzi na ambuyace mu Nzinda wa Dhavidhi; mwanace anacemerwa Yotamu adzakhala mambo pa mbuto yace.
8 Mu caka 38 ca Mambo Azariya+ wa ku Yuda, Zakariya+ mwana wa Yerobhoamu adzakhala mambo wa Izraeli ku Samariya, pontho iye atonga miyezi mitanthatu.
9 Zakariya akhacita pinthu pyakuipa pamaso pa Yahova ninga pidacita ambuyace. Iye apitiriza kucita madawo akuti Yerobhoamu mwana wa Nebhati acitisa Aizraeli kudawa nawo.+
10 Buluka penepo Salumu mwana wa Yabhesi ansandukira mbamupha+ ku Ibheleamu.+ Pidamala iye kumupha, iye adzakhala mambo pa mbuto yace.
11 Mphangwa zinango zinalonga pya umaso wa Zakariya, zalembwa m’bukhu inalonga pinthu pidacitika mu ndzidzi wa amambo a ku Izraeli.
12 Pyenepi pyakwanirisa mafala a Yahova adalonga iye kuna Jeu: “Madzindza manai a ana ako+ anadzakhala pa mpando waumambo wa Izraeli.”+ Natenepa pyacitika ninga mudapilongera iye.
13 Salumu mwana wa Yabhesi adzakhala mambo mu caka 39 ca Mambo Uziya+ wa ku Yuda, pontho iye atonga ku Samariya mwezi ubodzi.
14 Buluka penepo, Menaemi mwana wa Gadhai abuluka ku Tirza+ mbaenda ku Samariya, pontho iye apha Salumu+ mwana wa Yabhesi ku Samariya. Pidamala iye kumupha, adzakhala mambo pa mbuto yace.
15 Mphangwa zinango zinalonga pya umaso wa Salumu na kusandukira kudacita iye, pyalembwa m’bukhu inalonga pinthu pidacitika mu ndzidzi wa amambo a ku Izraeli.
16 Mu ndzidzi udabuluka Menaemi ku Tirza, iye afudza nzinda wa Tifisa na anthu onsene akhali mwenemo, kuphatanizambo pisa pya cifupi na kweneko, thangwi iwo nee akhadanfungulira nsuwo. Iye afudza nzinda, mbapandula mimba za akazi akhali na mimba.
17 Mu caka 39 ca Mambo Azariya wa ku Yuda, Menaemi mwana wa Gadhai adzakhala mambo wa Izraeli, pontho iye atonga pyaka khumi mu Samariya.
18 Iye akhacita pinthu pyakuipa pamaso pa Yahova. Mu ntsiku zonsene za umaso wace, iye apitiriza kucita madawo onsene akuti Yerobhoamu mwana wa Nebhati acitisa Aizraeli kudawa nawo.+
19 Mambo Puli+ wa ku Asirya abwera mu dziko ineyi, pontho Menaemi apasa Puli matalento* 1.000 a parata toera am’phedze kuwangisa umambo wace.+
20 Toera kugumana kobiri ineyi ya parata idapasa iye mambo wa ku Asirya, Menaemi akakamiza amuna akubvekera na akupfuma+ a mu Izraeli toera m’bodzi na m’bodzi apereke masiklo* 50 a parata. Buluka penepo mambo wa ku Asirya abuluka mu dziko ineyi mbabwerera kwawo.
21 Mphangwa zinango zinalonga pya umaso wa Menaemi+ na pinthu pyonsene pidacita iye, pyalembwa m’bukhu inalonga pinthu pidacitika mu ndzidzi wa amambo a ku Izraeli.
22 Pakumalisa, Menaemi afa ninga pidacita ambuyace; pontho mwanace anacemerwa Pekaiya adzakhala mambo pa mbuto yace.
23 Mu caka 50 ca Mambo Azariya wa ku Yuda, Pekaiya mwana wa Menaemi adzakhala mambo wa Izraeli ku Samariya, pontho iye atonga mu pyaka piwiri.
24 Pekaiya akhacita pinthu pyakuipa pamaso pa Yahova. Iye apitiriza kucita madawo onsene akuti Yerobhoamu mwana wa Nebhati acitisa Aizraeli kudawa nawo.+
25 Natenepa ntumiki wace anacemerwa Peka+ mwana wa Remaliya ansandukira. Iye pabodzi na amuna 50 a ku Jiliyadhi apha Peka, Argobhi na Ariye ku Samariya panyumba yandzulu na yakutsidzikizika ya mambo. Pidamala iye kumupha, adzakhala mambo pa mbuto yace.
26 Mphangwa zinango zinalonga pya umaso wa Pekaiya na pinthu pyonsene pidacita iye, pyalembwa m’bukhu inalonga pinthu pidacitika mu ndzidzi wa amambo a ku Izraeli.
27 Mu caka 52 ca Mambo Azariya wa ku Yuda, Peka+ mwana wa Remaliya adzakhala mambo wa Izraeli ku Samariya, pontho iye atonga mu pyaka 20.
28 Peka akhacita pinthu pyakuipa pamaso pa Yahova, pontho iye apitiriza kucita madawo akuti Yerobhoamu mwana wa Nebhati acitisa Aizraeli kudawa nawo.+
29 Mu ntsiku za Mambo Peka wa Izraeli, Mambo Tiglati-Pilezeri+ wa ku Asirya amenya nkhondo mbakwata nzinda wa Iyoni, Abheli-Bheti-Maka,+ Yanoa, Kedhesi,+ Azori, Jiliyadhi+ na Galileya, dziko yonsene ya Nafitali,+ pontho iye akwata anthu akhali mwenemu mbaenda nawo ku Asirya toera akakhale mabitcu.+
30 Buluka penepo, Ozeya+ mwana wa Ela asandukira Peka mwana wa Remaliya, am’menya mbamupha; pontho iye adzakhala mambo pa mbuto yace mu caka 20 ca utongi wa Yotamu+ mwana wa Uziya.
31 Mphangwa zinango zinalonga pya umaso wa Peka na pinthu pyonsene pidacita iye, pyalembwa m’bukhu inalonga pinthu pidacitika mu ndzidzi wa amambo a ku Izraeli.
32 Mu caka caciwiri ca utongi wa Peka mwana wa Remaliya mambo wa Izraeli, Yotamu+ mwana wa Mambo Uziya+ wa ku Yuda adzakhala mambo.
33 Iye akhali na pyaka 25 pyakubalwa pidakhazikiswa iye ninga mambo, pontho atonga pyaka 16 mu Yerusalemu. Mai wace akhacemerwa Yerusa, pontho iye akhali mwana wa Zadhoke.+
34 Iye apitiriza kucita pinthu pyadidi pamaso pa Yahova, ninga pikhacita Uziya wakuti ndi babace.+
35 Mbwenye iye nee afudza mbuto zaulambiri, pontho anthu akhapitiriza basi kupereka ntsembe mbacitisa kuti utci wa ntsembe zenezi uende kuna alungu awo.+ Pontho ndiye adamanga nsuwo ukulu wapadzulu wa panyumba ya Yahova.+
36 Mphangwa zinango zinalonga pya umaso wa Yotamu na pinthu pidacita iye, zalembwa m’bukhu inalonga pinthu pidacitika mu ndzidzi wa amambo a ku Yuda.
37 Mu ntsiku zenezi, Yahova atuma Rezini mambo wa ku Sirya na Peka+ mwana wa Remaliya toera akamenyane na Yuda.+
38 Pakumalisa, Yotamu afa ninga pidacita ambuyace, mbaikhwa munthumbi pabodzi na ambuyace mu Nzinda wa Dhavidhi wakuti ndi mbuyace. Pontho mwanace anacemerwa Ahazi adzakhala mambo pa mbuto yace.
Pidzindikiro Pyapantsi
^ Unoyu ndi Yerobhoamu waciwiri.
^ Dzina ineyi isabveka “Yahova Aphedza.” Iye asacemerwambo Uziya pa 2 Amambo 15:13; 2 Kronika 26:1-23; Izaiya 6:1 na pa Zakariya 14:5.
^ Talento ibodzi ikhalemera makilu 34,2. Onani Apendise B14.
^ Siklo ibodzi ikhalemera magrama 11,4. Onani Apendise B14.
