Amambo Waciwiri 4:1-44
4 Nkazi wa m’bodzi wa ana a aprofeta+ apanga Elizeu mwakugaluza: “Mamunanga wakuti ndi ntumiki wanu afa, pontho imwe musadziwa mwadidi kuti iye ndzidzi onsene akhagopa Yahova.+ Cincino abwera nyamangawa kudzakwata ananga awiri toera akhale mabitcu ace.”
2 Natenepa Elizeu ambvundza: “Usafuna ndikucitirenji? Ndipange, uli nanji n’nyumba mwako?” Nkazi atawira: “Ine ntumiki wanu nee ndiri na cinthu cinango n’nyumba mwanga kusiyapo nkhali ing’ono* ya mafuta.”+
3 Buluka penepo Elizeu ampanga: “Ndoko ukabwereke pyombo pyakusowa pinthu kuna anthu onsene a pacisa cako. Bwereka pizinji kakamwe.
4 Ungamala, pita n’nyumba iwe na anako mbufunga nsuwo. Dzadza pyombo pyonsene na mafuta, pontho ikha pakhundu pire pidadzala.”
5 Natenepa nkazi unoyu aenda.
Iye na anace apita n’nyumba mbafunga nsuwo, pontho anace akhampasira pyombo, iye mbapidzadza na mafuta.+
6 Pidamala iye kudzadza pyombo pyonsene, apanga m’bodzi mwa anace: “Bweresa combo cinango.”+ Mbwenye mwanace alonga: “Nkhabebve combo cinango.” Penepo mafuta nee abulukabve.+
7 Natenepa nkazi unoyu aenda kalonga pyenepi kuna ntumiki wa Mulungu wandimomwene, pontho iye ampanga: “Ndoko kagulise mafuta anewa toera ulipe mangawa ako, kobiri inafuna kusala inaphedza iwe na anako.”
8 Ntsiku inango Elizeu aenda ku Sunemu,+ kweneko kukhali na nkazi wakubvekera kakamwe. Nkazi unoyu adembetera Elizeu toera adye.+ Ndzidzi onsene ukhapita Elizeu na kweneko akhalimira toera kudya.
9 Natenepa nkazi unoyu apanga mamunace: “Ndisadziwa kuti mamuna anapita na pano ndzidzi onsene ndi mprofeta wa Mulungu.
10 Ndaphata miyendo, tendeni ticite kwartu ing’ono padzulu panyumba,+ mbatiikhamo talimba, meza, mpando na cakuikhira nyale toera ndzidzi onsene unapita iye na pano akhale mwenemo.”+
11 Ntsiku inango, iye afika penepo mbaenda kagona nkwartu yandzulu.
12 Iye apanga ntumiki wace Djehazi:+ “Cemera nkazi wa ku Sunemu.”+ Natenepa iye ancemera mbabwera kuna iye.
13 Buluka penepo Elizeu apanga Djehazi: “Ndaphata miyendo, mpange kuti: ‘Mwawangisira kakamwe toera kutitsalakana.+ Mphapo musafuna kuti ndicitenji kuna imwe?+ Ndiende kalonge na mambo+ peno na nkulu wa anyankhondo thangwi ya imwe? Mbwenye iye atawira: “Ine ndiri wakutsidzikizika pakati pa mbumba yanga.”
14 Natenepa iye abvundza: “Mphapo ndicitenji kuna iye?” Djehazi alonga: “Iye nkhabe mwana wamamuna,+ pontho mamunace akalamba.”
15 Penepo pene iye apanga Djehazi: “Ncemere.” Natenepa iye ancemera, pontho nkazi abwera mbalimira pansuwo.
16 Buluka penepo Elizeu apanga nkazi: “Caka cinafuna kudza pa ndzidzi ninga uno, imwe munadzakhala na mwana wamamuna.”+ Mbwenye iye alonga: “Mbuyanga, imwe ndimwe ntumiki wa Mulungu wandimomwene, lekani kulonga uthambi kuna ine ntumiki wanu.”
17 Mbwenye nkazi adzakhala na mimba mbabala mwana wamamuna caka cidatowera pa ndzidzi ubodzi ene ninga udapangwa iye na Elizeu.
18 Mwana akula, pontho ntsiku inango iye aenda kuna babace, wakuti akhali pabodzi na anyakubvuna.
19 Iye akhapanga babace: “Nsolo wanga ukundipha, nsolo wanga ukundipha!” Buluka penepo babace apanga ntumiki wace: “Nkwate, ndoko naye kuna mai wace.”
20 Natenepa iye ankwata mbaenda naye kuna mai wace, pontho mai wace amuikha pa miyendo mpaka namasikati, buluka penepo mwana afa.+
21 Nkazi unoyu akwata mwana mbaenda kan’gonesa patalimba ya ntumiki wa Mulungu wandimomwene,+ pidamala iye afunga nsuwo mbabuluka.
22 Iye acemera mamunace mbampanga: “Ndaphata miyendo, tumani ntumiki m’bodzi toera abwere na buru, pontho nditawiriseni ndiende mwakucimbiza kuna ntumiki wa Mulungu wandimomwene mbandibwerera.”
23 Mbwenye mamunace ampanga: “Thangwi yanji usafuna kuenda kaonana naye lero? Lero nee ndi ntsiku yakubalwa kwa mwezi,+ pontho nee ndi Sabudu.” Mbwenye nkazi alonga: “Lekani kudzudzumika, pinthu pyonsene piri mwadidi.”
24 Natenepa iye akhunganya buru mbapanga ntumiki wace: “Tende mwakucimbiza, leka kuifambisa pang’ono-pang’ono thangwi ya ine, mbandidzati kukupanga.”
25 Natenepa nkazi unoyu aenda Kuphiri ya Karmelo kuna ntumiki wa Mulungu wandimomwene. Ntumiki wa Mulungu wandimomwene pidamuona iye nakutali, apanga ntumiki wace Djehazi: “Ona, nkazi ule wa ku Sunemu.
26 Ndaphata miyendo thamanga, ndoko kuna iye mbumbvundza: ‘Muli mwadidi? Mamunanu ali mwadidi? Mwananu ali mwadidi?’” Penepo nkazi atawira: “Onsene ali mwadidi.”
27 Nkazi pidafika iye kuna ntumiki wa Mulungu wandimomwene wakuti akhali paphiri, iye aphata miyendo+ ya ntumiki wa Mulungu wandimomwene. Natenepa Djehazi aenda kuna iye toera kum’bulusa, mbwenye ntumiki wa Mulungu wandimomwene ampanga: “Nsiye pyace, thangwi ali wakutsukwala kakamwe, pontho ine nkhabe dziwa cidantsukwalisa thangwi Yahova nee andipanga.”
28 Buluka penepo nkazi abvundza: “Mbuyanga, kodi ine ndakuphembani mwana wamamuna? Ine nee ndakupangani kuti: ‘Lekani kundipasa cidikhiro capezi’?”+
29 Penepo pene Elizeu apanga Djehazi: “Manga nguwo yako ncunu mwako,+ kwata ndodo yanga, pontho ndoko. Ungagumanikana na munthu leka kum’mwanyika; pontho munthu angakumwanyika leka kuntawira. Ndoko kaikhe ndodo yanga pa nkhope ya mwana.”
30 Natenepa mai wace mwana alonga: “Ndiri kudumbira mu dzina ya Yahova Mulungu wa m’maso na mu dzina yanu kuti nee ndinakusiyani.”+ Penepo Elizeu alamuka mbaenda pabodzi na nkazi unoyu.
31 Djehazi atsogola, mbaikha ndodo pa nkhope ya mwana, mbwenye nkhabepo cinthu cidacitika kuna mwana.+ Iye abwerera kuna Elizeu mbampanga: “Mwana nee alamuka.”
32 Elizeu pidapita iye n’nyumba, mwana wakufa akhali lamba patalimba pace.+
33 Iye apita nkwartu, afunga nsuwo mbakhala iye na mwana basi, buluka penepo atoma kuphembera kuna Yahova.+
34 Pidamala iye akwira patalimba, mbagona padzulu pa mwana, mulomo wace ukhali padzulu pamulomo wa mwana, maso ace akhali padzulu pamaso a mwana, pontho manja ace akhali padzulu pa manja a mwana, mbapitiriza lamba padzulu pace. Penepo manungo a mwana atoma kupisa.+
35 Iye afamba-famba n’nyumba, buluka penepo akwira patalimba mbagona pontho padzulu pa mwana. Mwana aotsira kanomwe, pidamala iye afungula maso ace.+
36 Elizeu acemera Djehazi mbampanga: “Cemera nkazi wa ku Sunemu.” Natenepa iye ancemera mbabwera. Elizeu apanga nkazi: “Kwata mwanako.”+
37 Iye apita, agodama dhuzi na miyendo ya Elizeu mbakotamisa nsolo wace mpaka pantsi, buluka penepo akwata mwanace mbabuluka.
38 Elizeu pidabwerera iye ku Jiligale, mu dziko ineyi mukhali na njala.+ Ana a aprofeta+ akhali nawa pamaso pace, natenepa iye apanga ntumiki wace:+ “Ikha panela ikulu pa moto toera uphikire cakudya ana a aprofeta.”
39 Natenepa m’bodzi wa iwo aenda ntsanga kasaka masamba, iye agumana cimuti ca ntsanga cakutawatawa, atcoda misapo ya cimuti ceneci mbadzadza khandzwa yace. Buluka penepo iye abwerera, mbaigwanda-gwanda mpanela ikhaphikira iye cakudya, mbwenye misapo ineyi nee akhaidziwa.
40 Buluka penepo apasa ana a aprofeta toera adye, mbwenye pidatoma iwo kwene kudya akhuwa: “Imwe ntumiki wa Mulungu wandimomwene, mpanela muna venenu.” Natenepa iwo asiya kudya.
41 Penepo iye alonga: “Bweresa ufa pang’ono.” Pidauikha iye mpanela alonga: “Pasa ana a aprofeta toera adye.” Natenepa mpanela nee mukhalibve na venenu.+
42 Mamuna unango abuluka ku Bhaale-Salisa+ mbabweresera ntumiki wa Mulungu wandimomwene mikate+ 20 ya sevadha idacitwa na misapo idatoma kutokota, kuphatanizambo sakha ya sevadha yakumala kwene kubvunwa.+ Buluka penepo Elizeu alonga: “Pasani anthu toera adye.”
43 Mbwenye ntumiki wace alonga: “Cakudya ceneci nee cinakwana kuna amuna 100.”+ Penepo Elizeu alonga: “Pasa anthu toera adye, thangwi Yahova alonga kuti: ‘Iwo anadzadya, pontho cakudya cinasala.’”+
44 Natenepa iye aapasa cakudya, iwo adya, cakudya mbacisala+ mwakubverana na mafala a Yahova.
Pidzindikiro Pyapantsi
^ Peno: “nkhali ing’ono ya mulomo wakusongoka.”
