Tsamba Yaciwiri Kuna Akristu a ku Tesalonika 3:1-18
3 Pakumalisa, abale, pitirizani kucita phembero thangwi ya ife,+ toera mafala a Yahova* apitirize kumwazika mwakucimbiza,+ mbasimbwa ninga munasimbwa iwo pakati panu,
2 pontho toera tiombolwe mʼmanja mwa anthu akuipa na mwa anyakuipa mitima,+ thangwi cikhulupiro nee ndi cinthu cakuti anthu onsene ali naco.+
3 Mbwenye Mbuya ndi wakukhulupirika, pontho iye anadzakuwangisani, mbakutsidzikizani kuna Nyakuipa.*
4 Kusiyapo pyenepi, ife tiri na cinyindiro mwa Mbuya cakuti imwe musatowezera pitsogolero pyathu, pontho munapitiriza kupitowezera.
5 Mbuya mbapitirize kutsogolera mwadidi mitima yanu toera mufune Mulungu,+ mbamupirira+ thangwi ya Kristu.
6 Abale, cincino ife tisakupasani pitsogolero mu dzina ya Mbuyathu Yezu Kristu: Calirani abale onsene akukhonda bvera,*+ peno ale anacita pinthu mwakukhonda bverana* na pitsogolero pidatumiza ife kuna imwe.*+
7 Imwe musadziwa kuti musafunika kutitowezera tani,+ thangwi ife nee takhala anthu akukhonda bvera pakati panu,
8 ife nee tadya papezi cakudya ca munthu.*+ Mbwenye taphata basa mwakuwanga, mbatiwangisira masiku na masikati toera tikhonde kukhala ninga ntolo kuna imwe.+
9 Pyenepi nee pisabveka kuti ife nkhabe ufulu wakupaswa pinthu na imwe,+ mbwenye tikhafuna kupangiza kuti ife tathema kutowezerwa na imwe.+
10 Mwandimomwene, pikhali ife pabodzi na imwe, kazinji kene tikhakupangani ntemo uyu: “Khala munthu nkhabe funa kuphata basa, mbaleke kudya.”+
11 Thangwi ife tabva kuti anango asacita pinthu pyakukhonda* thema pakati panu;+ iwo nkhabe kuphata basa, mbwenye asadzudzumika na pinthu pyakuti nee ndi pyawo.+
12 Kuna anthu anewa, ife tisapereka ntemo, mbatiacenjeza mu dzina ya Mbuya Yezu Kristu, kuti iwo asafunika kuphata basa mwakukhurudzika, adye cakudya cidaphatira iwo basa na manja awo.+
13 Mbwenye imwe abale, lekani kusiya kucita pinthu pyadidi.
14 Munthu angakhonda kubvera pinalonga ife mu tsamba iyi, muikheni cidzindikiro, mbamuncalira,*+ toera iye akhale na manyadzo.
15 Ngakhale tenepo, lekani kumuona ninga nyamalwa, mbwenye pitirizani kumpasa uphungu+ ninga mʼbale.
16 Cincino, Mbuya wantendere akupaseni ntendere ndzidzi onsene, munjira zonsene.+ Mbuya mbakhale na imwe monsene.
17 Tambirani mwanyikiro wanga ine Paulu, udalemba ine na manja anga,+ wakuti ndi cidzindikiro mʼmatsamba anga onsene; awa ndi malembero anga.
18 Kukoma ntima kukulu kwa Mbuyathu Yezu Kristu mbakukhale na imwe monsene.
Pidzindikiro Pyapantsi
^ Onani Apendise A5.
^ Nyakuipa unoyu ndi Sathani.
^ Peno: “ale anakhonda kucita pinapangwa iwo.”
^ Peno: “nkhabe kufamba mwakubverana.”
^ Munjira inango: “iwo.”
^ Peno: “mbatikhonda kulipa.”
^ Peno: “asafamba mwakukhonda.”
^ Peno: “mbamukhonda kucita uxamwali na iye.”
