Kronika Waciwiri 16:1-14
16 Pa caka 36 ca utongi wa Aza, Mambo Bhaasa+ wa Izraeli aenda kamenyana na Yuda, pontho iye atoma kumanga* mpanda wa nzinda wa Rama+ toera anthu akhonde kubuluka peno kupita mu dziko ya Aza Mambo wa Yuda.+
2 Penepo Aza akwata parata na ouro ikhali mu mbuto yakukoyera mpfuma n’nyumba ya Yahova+ na n’nyumba ya mambo, mbaitumiza kuna Mambo Bheni-Adhadhi wa ku Sirya,+ wakuti akakhala ku Dhamasku, mbalonga:
3 “Pana cibverano pakati pa ine na iwe, pontho pakati pa babako na babanga. Ndiri kukutumizira parata na ouro. Fudza cibverano cidacita iwe na Mambo Bhaasa wa ku Izraeli toera iye abuluke mu dziko yanga.”
4 Bheni-Adhadhi abvesera pidalonga Mambo Aza mbatuma atsogoleri a anyankhondo ace toera aende kamenyana na anthu a m’mizinda ya Izraeli. Iwo akunda nzinda wa Iyoni,+ Dhani,+ Abheli-Maimi na mizinda yonsene yakukoyera pinthu ya dzindza ya Nafitali.+
5 Bhaasa pidabva iye pyenepi, mwakucimbiza asiya kumanga* nzinda wa Rama, pontho iye asiya basa yace.
6 Penepo Mambo Aza acemeresa anthu onsene a ku Yuda, iwo akwata miyala na matabwa a ku Rama+ akhaphatisira Bhaasa toera kumanga nawo,+ pontho iye aphatisira miyala na matabwa anewa toera kumanga* nzinda wa Jebha+ ku Bhenjamini na ku Mispa.+
7 Pa ndzidzi unoyu, mprofeta Anani+ aenda kuna Aza Mambo wa ku Yuda mbampanga: “Nakuti wanyindira mambo wa ku Sirya mbukhonda kunyindira Yahova Mulungu wako, anyankhondo a mambo wa ku Sirya apulumuka m’manja mwako.+
8 Kodi anyankhondo a ku Etiopya na a ku Libhiya nee akhali nsoka ukulu, pontho nee akhali na ngolo zizinji za nkhondo na anyamakavalo? Mbwenye nakuti iwe wanyindira Yahova, iye aapereka m’manja mwako.+
9 Thangwi maso a Yahova asayang’ana pa dziko yonsene yapantsi+ toera kupangiza mphambvu zace kuna anthu akukhulupirika kuna iye.+ Mbwenye imwe mwacita pinthu pyaudzemwa; natenepa kutomera lero kuenda kutsogolo, anyamalwa anadzamenya nkhondo na imwe.”+
10 Natenepa, Aza nee akomerwa na pidalonga mprofeta mbamuikhisa nkaidi, thangwi iye akhadaipirwa na pidalonga iye. Kutomera pa ndzidzi unoyu, Aza atoma kutsalakana mwakuipa anthu anango pakati pa mbumba.
11 Mphangwa zinalonga pya Aza kutomera pakutoma mpaka pakumalisa zalembwa m’Bukhu ya Amambo a ku Yuda na a ku Izraeli.+
12 Pa caka 39 ca utongi wace, Aza aphatwa na utenda wa miyendo, mbaduwala maningi; ngakhale pikhabva iye kupha, nee asaka ciphedzo ca Yahova, mbwenye asaka ciphedzo ca madotoro.
13 Pakumalisa, Aza afa ninga pidacita ambuyace;+ iye afa pa caka 41 ca utongi wace.
14 Iwo amuikha munthumbi ikulu ikhadakumbisa iye mu Nzinda wa Dhavidhi.+ Iwo amuikha m’baulu* yakuti ikhadadzazwa na mafuta a bhalsamu na perfume wadidi kakamwe wakucitwa na pinthu pyakusiyana-siyana.+ Kusiyapo pyenepi, iwo agasa moto ukulu kakamwe toera kumulemedza.
Pidzindikiro Pyapantsi
^ Peno: “kutsidzikiza; kumanga pontho.”
^ Peno: “kutsidzikiza; kumanga pontho.”
^ Peno: “kutsidzikiza; kumanga pontho.”
^ Peno: “nkaxau; pa makha.”
