Kronika Waciwiri 23:1-21
23 Mu caka cacinomwe, Yeoyadha apangiza cipapo mbacita cibverano na atsogoleri a misoka ya anyankhondo 100.+ Iwo akhali Azariya mwana wa Yeroamu, Ijimaeli mwana wa Yeowanani, Azariya mwana wa Obhedhi, Maseya mwana wa Adhaya na Elisafati mwana wa Zikri.
2 Buluka penepo, iwo afamba mu Yuda onsene, mbacemeresa Alevi+ m’mizinda yonsene ya Yuda kuphatanizambo atsogoleri a dzindza ya Izraeli. Pidafika iwo ku Yerusalemu,
3 mbumba yonsene yacita cibverano+ na mambo panyumba ya Mulungu wandimomwene, buluka penepo Yeoyadha aapanga:
“Onani! Mwana wa mambo anadzatonga ninga pidapikira Yahova kuna ana a Dhavidhi.+
4 Pinafunika imwe kucita ndi ipi: Khundu ibodzi mwa makhundu matatu a nsoka wa anyantsembe na Alevi anafuna kuphata basa+ pa ntsiku ya Sabudu anadzayang’anira pansuwo;+
5 khundu inango mwa makhundu matatu inadzakhala panyumba ya mambo,+ pontho khundu inango mwa makhundu matatu inadzakhala Pansuwo Ukulu unacemerwa Yesodhi,* mbumba yonsene inadzakhala pa thando ya nyumba ya Yahova.+
6 Lekani kutawirisa munthu kupita n’nyumba ya Yahova, kusiyapo anyantsembe na Alevi anagumanika pabasa.+ Iwo anapita thangwi ndi nsoka wa anthu akucena, pontho mbumba yonsene inadzacita mabasa anaphembwa iwo na Yahova.
7 Alevi asafunika kukhala n’khundu mwa mambo, pontho m’bodzi na m’bodzi asafunika kuphatirira pida pyace pya nkhondo. Ule anafuna kupita n’nyumba ineyi asafunika kuphiwa. Khalani na mambo konsene kwene kunaenda iye.”*
8 Alevi na Ayuda onsene acita pidapangwa iwo na nyantsembe Yeoyadha. Natenepa m’bodzi na m’bodzi wa iwo acemeresa anyankhondo ace akuti akhaphata basa pa ntsiku ya Sabudu+ na ale akuti akhapuma pa ntsiku ya Sabudu, thangwi nyantsembe Yeoyadha nee akhadapumisa misoka+ m’mabasa awo.
9 Nyantsembe Yeoyadha apasa atsogoleri a misoka ya anyankhondo 100,+ madipa, maxango mang’ono na maxango anango a Mambo Dhavidhi+ akuti akhali n’nyumba ya Mulungu wandimomwene.+
10 Iye aikha amuna onsene mu mbuto zawo, m’bodzi na m’bodzi akhadaphatirira cida cace ca nkhondo,* kutomera kukhundu yamadyo ya nyumba mpaka kukhundu yabzwere ya nyumba, anango akhali dhuzi na guwa ya ntsembe, anangombo akhali dhuzi na nyumba, pontho iwo akhadazungulira mambo.
11 Buluka penepo, iwo abulusa kunja mwana wa mambo,+ ambvazika nthimba na Umboni,*+ mban’khazikisa ninga mambo. Yeoyadha na anace an’dzodza. Buluka penepo iwo alonga: “Mbakuzwe Mambo!”*+
12 Ataliya pidabva iye anthu akhathamanga, mbakasimba mambo, mwakucimbiza iye aenda kuna anthu akhali panyumba ya Yahova.+
13 Penepo iye aona mambo ali dzololo dhuzi na nzati pansuwo. Atsogoleri+ na anyakuliza matuluka akhali pabodzi na mambo, pontho mbumba yonsene ya dziko ineyi ikhakomerwa,+ mbiliza matuluka; anyakuimba akuti akhali na pyakuimba napyo akhatsogolera nyimbo zakusimba nazo. Natenepa Ataliya apandula nguwo zace, mbakhuwa: “Mwandisandukira! Mwandisandukira!”
14 Mbwenye nyantsembe Yeoyadha atuma atsogoleri a misoka ya anyankhondo 100, ale adakhazikiswa toera kuyang’anira anyankhondo, mbaapanga: “M’buluseni pano, pontho ule anafuna kuntowera, mupheni na supada!” Thangwi nyantsembe akhadalonga: “Lekani kum’phera n’nyumba ya Yahova.”
15 Natenepa, iwo am’phata, mbaenda naye mpaka Pansuwo wa Makavalo panyumba ya mambo; pidafika iwo kweneko, amupha.
16 Yeoyadha acita cibverano, iye na mbumba yonsene pabodzi na mambo, cakuti iwo mbadapitiriza kukhala mbumba ya Yahova.+
17 Buluka penepo, anthu onsene a dziko ineyi abwera panyumba ya Bhaale, agomola maguwa ace,+ anyedza madzimunthu ace,+ pontho apha Matane nyantsembe wa Bhaale+ patsogolo pa maguwa.
18 Buluka penepo, Yeoyadha apereka nyumba ya Yahova m’manja mwa anyantsembe na Alevi toera aionere; Dhavidhi akhadaaikha m’misoka toera atumikire panyumba ya Yahova, apereke kuna Yahova ntsembe zakupiswa,+ mwakubverana na pidalembwa mu Mwambo wa Mose,+ acite pyenepi mwakutsandzaya, pontho aimbe nyimbo mwakubverana na pitsogolero pya Dhavidhi.
19 Iye aikhambo anyakuonera misuwo+ panyumba ya Yahova, toera munthu wakukhonda cena akhonde kupitamo.
20 Iye acemeresa atsogoleri a misoka ya anyankhondo 100,+ akulu na atsogoleri a mbumba na anthu onsene a dziko ineyi, iwo aperekera mambo buluka panyumba ya Yahova mpaka panyumba ya mambo. Iwo apita na pansuwo ukulu; mbakhazikisa mambo pa mpando+ wa umambo.+
21 Natenepa anthu onsene atsandzaya, pontho mu nzinda mukhali na ntendere, thangwi Ataliya akhadaphiwa na supada.
Pidzindikiro Pyapantsi
^ Yesodhi ndi fala Yacihebheri yakuti isabveka matomero a nyumba.
^ Fala na Fala: “iye angapita, peno angabuluka.”
^ Peno: “dipa.”
^ Fala na Fala: “Mambo mbakhale na umaso mu ntsiku zizinji.”
^ Panango ndi mpukutu wakuti ukhali na Mwambo wa Mulungu.
