Dhanyeli 6:1-28
6 Dhariyo aona kuti mphyadidi kusankhula aimiriri 120 toera atsogolere mu umambo wace onsene.+
2 Mambo akhazikisa atongi atatu kuti atsogolere basa ya aimiriri+ toera iye akhonde kuluza pinthu. Natenepa Dhanyeli+ akhali mʼbodzi wa iwo.
3 Mbwenye Dhanyeli akhadasiyana na atongi anango, pontho iye akhadasiyana na aimiriri anango thangwi iye akhali na luso yakudzumisa.+ Natenepa mambo akhafuna kumpasa cidzo mu umambo wace onsene.
4 Pa ndzidzi unoyu atongi na aimiriri asaka mathangwi toera kupambizira Dhanyeli thangwi ya njira ikhatsalakanira iye utongi, mbwenye iwo nee akhakwanisa kugumana cinthu cakuipa toera kumpambizira thangwi iye akhali wakunyindirika, pontho nee akhapwaza pinthu, peno kucita pinthu mwakusowa ulungami.
5 Buluka penepo amuna anewa alonga: “Ife nee tinakwanisa kugumana cinthu toera kupambizira naco Dhanyeli, kusiyapo tingampambizira na cinthu cakuti cisabverana na mwambo wa Mulungu wace.”+
6 Natenepa atongi na aimiriri anewa aenda ninga nsoka kuna mambo. Iwo ampanga: “Mambo Dhariyo, khalani na umaso kwenda na kwenda.
7 Atongi onsene, ayangʼaniri, aimiriri, akulu-akulu a mu utongi na atsogoleri abverana toera imwe mambo mukhazikise ntemo wakukhondesa munthu kucita phembero kuna mulungu unango peno kuna munthu unango kusiyapo imwe mu ntsiku 30. Ule anafuna kukhonda kubvera ntemo unoyu asafunika kuponywa nʼdjenje ya nkhalamu.+
8 Cincino mambo khazikisani ntemo mbamuusinari+ toera ukhonde kucinjwa mwakubverana na ntemo wa Amedhi na wa Apersya wakuti nkhabe kucinjwa.”+
9 Natenepa mambo Dhariyo asinari ntemo unoyu.
10 Dhanyeli pidadzindikira iye kuti ntemo wasinarwi, iye apita nʼnyumba mwace, yakuti majanela a kwartu yandzulu a kukhundu ya ku Yerusalemu akhali akufunguka.+ Pontho iye akhagodama katatu pa ntsiku toera kucita phembero na kusimba Mulungu wace ninga pikhacita iye kalene ntemo unoyu mbudzati kukhazikiswa.
11 Pa ndzidzi unoyu, amuna anewa afika ninga nsoka mbapita nʼnyumba mwa Dhanyeli mbanʼgumana ali kucita phembero yakudembetera Mulungu wace toera ambvere ntsisi.
12 Natenepa iwo aenda kuna mambo mbankumbusa thangwi ya ntemo udakhazikisa iye: “Mambo, kodi imwe nee mwakhazikisa ntemo kuti mu ntsiku 30 ule anacita phembero kuna mulungu unango kusiyapo imwe asafunika kuponywa nʼdjenje ya nkhalamu?” Mambo atawira: “Inde, ntemo unoyu wakhazikiswa mwakubverana na mwambo wa Amedhi na Apersya wakuti nkhabe kucinjwa.”+
13 Penepo pene iwo apanga mambo: “Dhanyeli, ule adakwatwa ninga bitcu ku Yuda+ nee asakubverani imwe mambo, pontho nee asabvera ntemo udasinari imwe. Iye asacita phembero katatu pa ntsiku.”+
14 Mambo pidabva iye pyenepi atsukwala kakamwe, pontho asaka njira toera kupulumusa Dhanyeli; iye acita pyonsene toera kumpulumusa mpaka dzuwa kudoka.
15 Pakumalisa, amuna anewa aenda ninga nsoka kuna mambo, iwo ampanga: “Mambo, kumbukani mwambo wa Amedhi na Apersya wakuti ntemo onsene unakhazikiswa na mambo nee usafunika kucinjwa.”+
16 Natenepa mambo apereka ntemo, iwo mbabweresa Dhanyeli mbamponya nʼdjenje ya nkhalamu.+ Mambo apanga Dhanyeli: “Mulungu wako, ule anatumikira iwe ndzidzi onsene anadzakupulumusa.”
17 Buluka penepo, abweresa mwala mbafunga djenje ineyi. Mambo aikha cidzindikiro pamwala unoyu na mphete yace, pontho akulu-akulu a mu utongi wace aikhambo cidzindikiro na mphete zawo toera akhonde kucinja pyonsene pidanyerezera iwo kucitira Dhanyeli.
18 Buluka penepo mambo aenda kunyumba kwace. Namasiku anewa mambo acita jejuu, nee atawira cinthu cakuti mbicidancitisa kukomerwa,* pontho nee akwanisa kugona.*
19 Pakumalisa, pikhaca kunja, mambo alamuka mbaenda mwakucimbiza pa djenje ya nkhalamu.
20 Pidafika iye dhuzi na djenje, mwakutsukwala mambo acemera Dhanyeli mbambvundza: “Dhanyeli, ntumiki wa Mulungu wa mʼmaso, kodi Mulungu wako anatumikira iwe ndzidzi onsene akwanisa kukupulumusa kuna nkhalamu?”
21 Penepo pene Dhanyeli atawira mambo: “Mambo, khalani na umaso kwenda na kwenda.
22 Mulungu wanga atumiza anju wace mbafunga milomo ya nkhalamu,+ pontho izo nee zandiphekesa+ thangwi iye andiona kuti ndine wakusowa mulando pamaso pace; pontho nee ndacita pyakuipa kuna imwe mambo.”
23 Mambo atsandzaya kakamwe, pontho iye apereka ntemo toera Dhanyeli abuluswe nʼdjenje. Pidabuluswa Dhanyeli nʼdjenje iwo aona kuti nee akhadaphekeswa thangwi iye akhanyindira Mulungu wace.+
24 Buluka penepo, mambo apereka ntemo toera abwereswe ale adapambizira Dhanyeli, pontho iwo aponywa nʼdjenje ya nkhalamu pabodzi na anawo na akazawo. Iwo mbadzati kufika pantsi, nkhalamu zaanumphira, mbiziatafuna na magogodo awo ene onsene.+
25 Buluka penepo, mambo Dhariyo alemba tsamba mbaitumiza kuna mbumba zonsene, madzindza onsene na misoka ya pilongero inakhala pa dziko yonsene yapantsi,+ mbalonga: “Ntendere ukulu mbukhale na imwe!
26 Pontho ndisapereka ntemo wakuti mu umambo wanga onsene anthu asafunika kugopa Mulungu wa Dhanyeli.+ Thangwi iye ndi Mulungu wa mʼmaso, pontho asakhala kwenda na kwenda. Umambo wace cipo unadzafudzwa, pontho utongi wace ndi wakukhonda mala.+
27 Iye asaombola,+ asapulumusa, asacita pyakudzumisa na pirengo kudzulu na pa dziko yapantsi,+ thangwi iye apulumusa Dhanyeli toera akhonde kuphiwa na nkhalamu.”
28 Natenepa, pinthu pyanfambira mwadidi Dhanyeli mu umambo wa Dhariyo+ na mu umambo wa Siro wa ku Persya.+
Pidzindikiro Pyapantsi
^ Munjira inango: “nee abwereserwa anyakuimba.”
^ Fala na Fala: “citulo canʼthawa.”
