Ezekiyeli 22:1-31
22 Yahova alonga pontho na ine, mbandipanga:
2 “Iwe mwana wa munthu, uli dzololo toera kudziwisa mphangwa za kutongwa kwa nzinda wakuti uli na mulando wa ciropa,+ na kuudziwisa pinthu pyace pyonsene pyakunyanyasa?+
3 Usafunika kulonga kuti: ‘Ipi ndi pidalonga Yahova, Mbuya Wankulu Kakamwe: “Iwe nzinda wakuti usapha anthu ako,+ wakuti ndzidzi wakutongwa kwako uli kufika,+ iwe usacita madzimunthu akunyanyasa toera upswipisike wekhene;+
4 anthu adapha iwe akucitisa kukhala na mulando,+ madzimunthu ako akunyanyasa akucitisa kukhala wakukhonda cena.+ Iwe wacimbizisa kumala kwa ntsiku zako, pontho kumala kwa pyaka pyako kwafika. Na thangwi ineyi, ine ndinakucitisa kukhala wakuthema toera kutikanwa na anthu a madzindza anango, mbusingirirwa na anthu a madziko onsene.+
5 Madziko acifupi na akutali ene anadzakusingirira,+ iwo anadzalonga kuti iwe ndiwe nzinda wakuti uli na dzina yakukhonda cena, pontho wadzala na uviyaviya.
6 Akulu-akulu onsene a Izraeli akuti ali muna iwe, asaphatisira pidzo pyawo toera kupha anthu.+
7 Pakati pako, anthu asapwaza pai na mai,+ asadyera nkopekope munthu wa dziko inango, pontho asathabusa mwana waumphawi* na nzice.”’”*+
8 “‘Iwe usapwaza mbuto zanga zakucena, pontho usapswipisa masabudu anga.+
9 Pakati pako, pali na anthu anaipisa makhaliro a anango akuti ali akutonga kupha anthu.+ Pakati pako, anthu asadya ntsembe zinaperekwa mʼmapiri, pontho pakati pako anthu ali na makhaliro aulukwali.*+
10 Pakati pako, munthu asagona na nkazi wa pai wace,+ pontho asapita mʼmabonde na nkazi wakuti ali kumwezi.+
11 Pakati pako, munthu asacita pinthu pyakunyanyasa na nkazi wa ndzace,+ unango asapita mʼmabonde na nkwenyace, mbacita naye pinthu pyakupasa manyadzo;+ pontho unango asapita mʼmabonde na mʼbale wace wa nkazi, wakuti ndi mwana wa pai wace.+
12 Pakati pako, anthu asatawira kudyekerwa toera kupha munthu,+ iwe usaphemba juru, usafiyarisi toera kuwina pinthu,+ pontho usaba kobiri ya ndzako.+ Inde, iwe wandiduwaliratu,’ alonga Yahova, Mbuya Wankulu Kakamwe.
13 “‘Ona, ine ndiri kuimba manja toera kupangiza kuti ndisanyanyasirwa thangwi yakuwina kwako pinthu mwakukhonda kulungama, pontho thangwi yakuphiwa kwa anthu pakati pako.
14 Kodi iwe unapitiriza kukhala na cipapo, mbukhala wakuwanga pa ntsiku inafuna ine kukutcunyusa?+ Ine Yahova ndine adapilonga, pontho ndinadzapicita.
15 Ine ndinadzakubalalisani mʼmadzindza anango, pontho ndinadzakumwazani mʼmadziko anango;+ natenepa, ine ndinadzamalisa makhaliro anu akukhonda cena.+
16 Imwe munadzapaswa manyadzo pamaso pa anthu a madzindza anango; natenepa, imwe munadzadziwa kuti ine ndine Yahova.’”+
17 Yahova alonga pontho na ine, mbandipanga:
18 “Iwe mwana wa munthu, kuna ine mbumba ya Izraeli yadzakhala yakusowa basa ninga pirombo pinasalikira pakumala kucenesa utale. Onsene ndi ninga nkuwa, estanyo, utale na ntobve mu forno yakunyungulusa utale. Iwo adzakhala ninga pirombo pinasalikira pakumala kucenesa parata.+
19 “Natenepa ipi ndi pidalonga Yahova, Mbuya Wankulu Kakamwe: ‘Nakuti monsene mwadzakhala ninga pirombo pyakusowa basa+ pinasalikira pakumala kunyungulusa utale; ine ndinadzakugumanyani nkati mwa Yerusalemu.
20 Ninga munagumanywa parata, nkuwa, utale, ntobve na estanyo mu forno yakunyungulusa utale toera kupipepesera moto kuti pinyunguluke, inembo ndinadzakugumanyani mu ukali wanga na kuipirwa kwanga, ndinadzakupepeserani toera munyunguluke.+
21 Ine ndinadzakugumanyani, pontho ndinadzakupepeserani moto wa ukali wanga;+ imwe munadzanyunguluka nkati mwa nzinda wanu.+
22 Ninga parata yakuti isanyunguluka mu forno yakunyungulusa utale, imwembo munadzanyunguluka nkati mwa nzinda wanu; natenepa imwe munadzadziwa kuti ine Yahova ndapangiza ukali wanga kuna imwe.’”
23 Yahova alonga pontho na ine, mbandipanga:
24 “Iwe mwana wa munthu, panga Yerusalemu kuti: ‘Iwe ndiwe dziko yakuti nkhabe kudzaceneswa, nee kubvumbirwa na madzi pa ntsiku ya ukali wanga.
25 Aprofeta ako asasandukira anthu+ ninga nkhalamu inalira, mbiluma cinyama.+ Iwo asaluma anthu. Asakwata mpfuma na pinthu pya ntengo ukulu. Iwo asanjipisa azice pakati pako.
26 Anyantsembe ako nkhabe kutoweza mwambo wanga,+ pontho asapswipisa mbuto zanga zakucena.+ Iwo nkhabe kusiyanisa cinthu cakucena na cakukhonda cena;+ iwo nee asapfundzisa anthu kusiyana kwa cinthu cakukhonda cena na cinthu cakucena,+ iwo asakhonda kukoya masabudu anga, pontho ine ndisapswipiswa pakati pako.
27 Pakati pako, atsogoleri ako asakhala ninga mibindzi yakuti isaluma cinyama; iwo asaphekesa anthu, pontho asapha anthu toera kuwina pinthu mwakukhonda kulungama.+
28 Mbwenye aprofeta ako asaphimbira pinthu pyenepi pyonsene na ntoto. Iwo asaona masomphenya authambi, asalotera pinthu pyauthambi,+ mbalonga: “Ipi ndi pidalonga Yahova, Mbuya Wankulu Kakamwe,” maseze Yahova nee alonga cinthu.
29 Anthu a dziko ineyi asadyera ndzawo nkopekope, pontho asaba,+ asathabusa munthu anafuna ciphedzo na nyakutcerenga, asadyera nkopekope munthu wa dziko inango, mbakhonda kuntonga mwakulungama.’
30 “‘Ine ndasaka pakati pawo munthu wakuti mbadasasanyira mpanda wa miyala peno kulimira patsogolo panga pa mbuto idaswiwa mpanda toera kutsidzikiza dziko ineyi kuti ikhonde kufudzwa,+ mbwenye nee ndanʼgumana.
31 Na thangwi ineyi, ine ndinadzapangiza kuipirwa kwanga kuna iwo, pontho ndinadzaafudza onsene na moto wa ukali wanga. Ine ndinadzacitisa kuti iwo athabuke thangwi ya macitiro awo,’ alonga Yahova, Mbuya Wankulu Kakamwe.”
Pidzindikiro Pyapantsi
^ Peno: “nkazi adaferwa na mamunace.”
^ Peno: “mwana adaferwa na pai wace.”
^ Peno: “makhaliro akupasa manyadzo.”
