Ezekiyeli 23:1-49
23 Yahova alonga pontho na ine, mbandipanga:
2 “Iwe mwana wa munthu, akhalipo akazi awiri akuti mai wawo akhali mʼbodzi ene.+
3 Iwo adzakhala maputa ku Ejitu;+ iwo acita uputa kutomera pikhali iwo atsikana. Kweneko, amuna apfinya-pfinya mabere awo, mbaaphata-phata mabere pikhali iwo amiyali.
4 Dzina ya wankulu ndi Ola,* dzina ya mʼbale wace ndi Olibha.* Iwo adzakhala anga, mbabala ana amuna na akazi. Mbwenye madzina awo, Ola isaimirira Samariya,+ Olibha isaimirira Yerusalemu.
5 “Ola acita uputa+ mu ndzidzi wakuti iye akhali wanga. Iye akhasirira kakamwe ale akuti akhafuna kupita mʼmabonde na iye,+ anewa ndi Asirya,+ akuti akakhala cifupi na iye.
6 Iwo akhali atongi akuti akhadabvala nguwo za bhurumu,* na akulu-akulu; onsene akhali aphale akubalika adakwira pa makavalo.
7 Iye apitiriza kucita uputa na anthu onsene akubvekera a ku Asirya, pontho apswipisika+ na madzimunthu akunyanyasa* a anthu akuti iye akhaasirira kakamwe.
8 Iye nee asiya uputa ukhacita iye ku Ejitu, thangwi iwo apita naye mʼmabonde mbali ntsikana. Iwo akhadaphata-phata mabere ace, mbapangiza kuna iye kunsirira kwawo kukulu kakamwe.+
9 Na thangwi ineyi, ine ndampereka mʼmanja mwa ale akhansirira, anewa ndi anthu a ku Asirya,+ akuti iye akhaasirira kakamwe.
10 Iwo anʼdula nguwo mbansiya cipezipezi,+ pontho akwata anace amuna na akazi,+ buluka penepo, amupha na supada. Iye adzabvekera na mbiri ya makhaliro akuipa pakati pa akazi andzace, natenepa, iwo adzantcunyusa.
11 “Mʼbale wace wankazi anacemerwa Olibha pidaona iye pyenepi, kusirira kwace amuna kwadzathimizirika mwakupiringana midida, pontho uputa wace wadzatekera kakamwe kupiringana wa mʼbale wace.+
12 Iye akhasirira kakamwe anthu a ku Asirya,+ akuti akakhala dhuzi na iye, atongi na atsogoleri akuti akhabvala nguwo zadidi kakamwe, mbafamba na makavalo, onsene akhali aphale akubalika kakamwe.
13 Pidapswipisika iye, ine ndaona kuti uwiri wawo ene akhacita pinthu pibodzi pyene.+
14 Mbwenye iye apitiriza kucita uputa mwakutekera kakamwe. Iye aona madzimunthu acimuna adalembwa pa pfufu, madzimunthu akusemwa a Akaldheya a kore yakufuira,
15 iwo akhadamanga masintu ncunu mwawo, pontho akhadabvala nguwo zakuphimbira nazo nsolo; iwo akhaoneka ninga anyankhondo, onsene akhaimirira anthu a ku Bhabhilonya, adabalwa mu dziko ya Akaldheya.
16 Pidaaona iye, atoma kuasirira kakamwe, pontho atuma anthu toera aende kapereke mphangwa kuna iwo ku Kaldheya.+
17 Natenepa, anthu a ku Bhabhilonya akhabwera kudzapita mʼmabonde na iye patalimba pace, iwo ampswipisa thangwi yakusirira kwace kakamwe amuna, pidamala iye kupswipiswa na iwo, iye atoma kunyanyasirwa nawo, mbaasiya.
18 “Pidapitiriza iye kucita uputa mwakusowa manyadzo, mbapangizika cipezipezi,+ ine ndanyanyasirwa naye mbandinsiya, ninga mudanyanyasirwa ine na mʼbale wace, mbandinsiya.+
19 Iye apitiriza kucita uputa+ mwakutekera kakamwe, mbakumbuka ndzidzi ukhali iye ntsikana, pikhacita iye uputa mu dziko ya Ejitu.+
20 Iye akhasirira kakamwe amuna akhanfuna ninga pinacita akazi apakhundu, akuti kumaso kwa amunawo ndi ninga kumaso kwa buru imuna peno kumaso kwa kavalo imuna.
21 Iwe watsuwa makhaliro ako aulukwali akhali na iwe pikhali iwe ntsikana ku Ejitu,+ pikhakuphata-phata iwo mabere mu ndzidzi ukhali iwe ntsikana.+
22 “Natenepa, iwe Olibha, ipi ndi pidalonga Yahova, Mbuya Wankulu Kakamwe: ‘Amuna akhafuna iwe,+ akuti wanyanyasirwa nawo mbuasiya, ine ndinacitisa kuti akusandukire, pontho iwo anabwera kuna iwe buluka mʼmakhundu onsene.+
23 Anthu a ku Bhabhilonya+ na Akaldheya onsene,+ amuna a ku Pekodhe,+ amuna a ku Sowa, amuna a ku Kowa, pabodzi na mbumba yonsene ya ku Asirya, onsene ndi aphale akubalika kakamwe, ndi atongi, atsogoleri, anyankhondo na amuna adasankhulwa, onsene asafamba na makavalo.
24 Iwo anabwera kudzamenyana na iwe; angabwera, inabveka dungu ya ngolo za nkhondo na ya maroda awo, iwo anabwera na anyankhondo azinji, maxango makulu na mangʼono na pyapeu pya utale. Iwo anadzakufungira mʼmakhundu onsene, ine ndinadzatawirisa kuti iwo akutonge, pontho iwo anadzakutonga ninga munafunira iwo.+
25 Ine ndinadzapangiza kuipirwa kwanga kuna iwe, pontho iwo anadzakutsalakana mwaukali. Iwo anadzagwanda mphuno yako na makutu ako, pontho ale anafuna kusalikira pakati pako anadzaphiwa na supada. Iwo anadzakwata anako amuna na akazi, pontho ale anafuna kusalikira pakati pako anadzapiswa na moto.+
26 Iwo anadzakudulisa nguwo zako,+ pontho anadzakukwatira pinthu pyako pyadidi kakamwe pyakubalikisa napyo manungo.+
27 Ndinadzamalisa makhaliro ako aulukwali na uputa wako,+ pidatoma iwe kucita mu dziko ya Ejitu.+ Iwe unadzasiya kuayangʼana, pontho nee unadzakumbukabve dziko ya Ejitu.’
28 “Thangwi ipi ndi pidalonga Yahova, Mbuya Wankulu Kakamwe: ‘Mwakukhonda dembuka, ine ndinakupereka mʼmanja mwa anthu anakuida, ale akuti iwe wanyanyasirwa nawo, mbuasiya.+
29 Iwo anadzakuida, anadzakukwatira pinthu pyako pyonsene pidaphatira iwe basa mwakuwanga,+ pontho anadzakusiya cipezipezi. Anthu onsene anadzakuona cipezipezi, anadzaona pinthu pyonsene pyakunyanyasa pikhacita iwe, pontho iwo anadzaona kuti iwe ndiwe puta.+
30 Iwe unadzaona nyatwa zenezi thangwi watowera anthu a madzindza anango ninga puta,+ pontho thangwi wapswipisika na madzimunthu awo akunyanyasa.+
31 Iwe wacita pinthu pibodzi pyene ninga pidacita mʼbale wako wankazi,+ pontho ine ndinadzakutcunyusa ninga mudantcunyusa ine.’*+
32 “Ipi ndi pidalonga Yahova, Mbuya Wankulu Kakamwe:
‘Iwe unadzathabuswa ninga pidacitwa* mʼbale wako wankazi,+Iwe unadzakhala cinthu cakusekesa, pontho unadzasingirirwa kakamwe, thangwi ndi pyenepi pidadzala mu ndiko.+
33 Iwe unadzakundwa na kuledzera, pontho unadzatsukwala kakamwe,Na ndiko ya nyatwa na kufudzwa,Na ndiko ya Samariya mʼbale wako wankazi.
34 Iwe unadzaimwera mpaka kumalisa piri mwenemu,+ mbunyenyena madzinga ace,Buluka penepo, iwe unadzacekeka-cekeka mabere thangwi yakutsukwala.
“Thangwi ine, ndine adapilonga,” alonga Yahova, Mbuya Wankulu Kakamwe.’
35 “Natenepa, ipi ndi pidalonga Yahova, Mbuya Wankulu Kakamwe: ‘Nakuti iwe wandiduwala mbukhonda kunditsalakana na pangʼono pene,*+ unathabuka thangwi ya makhaliro ako aulukwali na uputa wako.’”
36 Buluka penepo Yahova andipanga: “Iwe mwana wa munthu, unaenda kapanga Ola na Olibha+ pyakutongwa kwawo, mbuapangiza pinthu pyakunyanyasa pinacita iwo?
37 Iwo acita upombo,*+ pontho apha anthu; iwo nee acita upombo basi na madzimunthu awo akunyanyasa, mbwenye apisambo pa moto anawo adandibalira iwo, mbaapereka ninga pyakudya kuna madzimunthu awo.+
38 Kusiyapo pyenepi, iwo andicitirambo ipi: Apswipisa mbuto yanga yakucena pa ntsiku ineyi, pontho apswipisa masabudu anga.
39 Pa ntsiku ibodzi ene, pidamala iwo kupha anawo mbaapereka ninga ntsembe kuna madzimunthu awo akunyanyasa,+ iwo apita mu mbuto yanga yakucena toera kuipswipisa.+ Ndi pyenepi pidacita iwo nʼnyumba mwanga.
40 Iwo atuma anthu toera aende kacemere amuna akutali.+ Pikhafika iwo, iwe wasamba, wapintari maso ako, pontho wabvala pinthu pyakubalikisa napyo manungo.+
41 Iwe wakhala pa mpando wadidi+ wakuti ukhali patsogolo pameza,+ pontho waikha insenso yanga+ na mafuta anga+ pameza ineyi.
42 Kweneko kukhabveka kukhuwa kwa mwinji wa amuna akuti nee akhadzudzumika; pakati pawo pakhali anyamwera adacemereswa buluka kuthando. Iwo aikha mapulusera mʼmikono ya akazi, mbaikha nthimba zakubalika mʼmisolo ya akazi anewa.
43 “Penepo ine ndalonga thangwi ya ule wakuti akhadaneta na kucita upombo: ‘Cincino iye anapitiriza kucita uputa.’
44 Natenepa, iwo apitiriza kuenda kuna iye, ninga pinacita munthu anaenda kuna nkazi wauputa. Munjira ineyi, iwo aenda kuna Ola na Olibha akuti ndi akazi a makhaliro aulukwali.
45 Mbwenye anthu akulungama anadzantcunyusa ninga munatcunyuswa munthu anacita upombo+ peno anapha munthu;+ thangwi iwo ndi akazi aupombo, pontho apha anthu.+
46 “Thangwi ipi ndi pidalonga Yahova, Mbuya Wankulu Kakamwe: ‘Nsoka wa anyankhondo unadzabwereswa kuna iwo toera kuacitisa kukhala cinthu cakugopesa kuna anango, pontho pinthu pyawo pinadzatapatwa.+
47 Anyankhondo anewa anadzaaponyera miyala,+ mbaapha na masupada. Iwo anadzapha anawo amuna na akazi,+ pontho anadzapisa nyumba zawo na moto.+
48 Ine ndinadzamalisa makhaliro aulukwali mu dziko ino, pontho pyenepi pinadzapfundzisa akazi onsene; natenepa, iwo nee anadzatowezera makhaliro anu aulukwali.+
49 Iwo anadzakutcunyusani thangwi ya makhaliro anu aulukwali, pontho thangwi ya madawo adacita imwe na madzimunthu anu akunyanyasa, penepo imwe munadzadziwa kuti ine ndine Yahova, Mbuya Wankulu Kakamwe.’”+
Pidzindikiro Pyapantsi
^ Dzina ineyi isabveka “Nsasa Wanga Uli Muna Iye.”
^ Dzina ineyi isabveka “Nsasa Wace.”
^ Peno: “azuli.”
^ Fala ineyi Mucihebheri panango isaphatisirwa toera kulonga pya “matubzwi a pinyama,” pontho isapangiza kupwaza.
^ Fala na Fala: “ine ndinadzaikha ndiko yace mʼmanja mwako.”
^ Fala na Fala: “Iwe unadzamwera ndiko yakulapha na yakuzika ya.”
^ Fala na Fala: “mbundipasira nkhodolo.”
^ Unoyu ndi upombo wauzimu.
