Ezekiyeli 24:1-27
24 Pa ntsiku yacikhumi ya mwezi wacikhumi wa caka cacipfemba,* Yahova alonga pontho na ine, mbandipanga:
2 “Iwe mwana wa munthu, lemba ntsiku ineyi, ntsiku ya lero. Thangwi ndi pa ntsiku ya lero+ yakuti mambo wa ku Bhabhilonya atoma kumenya nkhondo na Yerusalemu.
3 Pontho longa nsangani thangwi ya mbumba yakukhonda bvera, longa tenepa thangwi ya iwo:
“‘Ipi ndi pidalonga Yahova, Mbuya Wankulu Kakamwe:
“Ikha panela; ikha panela pa moto, pontho ikha madzi mwenemu.+
4 Ikha mwenemu mapindi a nyama,+ mapindi onsene adidi,Mwendo wanduli na wakutsogolo; dzadza mwenemu magogodo adidi kakamwe.
5 Kwata bira yadidi kakamwe pa nkumbi,+ ikha nkhuni pantsi pa panela.
Phika mwenemu mapindi a nyama na magogodo ene.”’
6 “Natenepa, ipi ndi pidalonga Yahova, Mbuya Wankulu Kakamwe:
‘Dzedze kuna nzinda unapha anthu,+ wakuti ndi ninga panela iri na furuju, pontho furuju yace nee yabuluswa!
Bulusa mwenemu mapindi onsene a nyama,+ ibodzi na ibodzi, leka kusankhula kuti unabulusa ipi.
7 Thangwi ciropa ca anthu adaphiwa mwenemu+ ciciri mwenemu; ciropa ceneci cabhomerwa pamwala wakuzwerera.
Nzinda unoyu nee wabhoma ciropa ceneci pa mataka toera ciphimbirwe na pfumbi.+
8 Toera kusosa kuipirwa kwanga, pontho toera ndintcunyuse,Ine ndasiya ciropa cace padzulu pamwala wakuzwerera,Toera cikhonde kuphimbirwa.’+
9 “Natenepa, ipi ndi pidalonga Yahova, Mbuya Wankulu Kakamwe:
‘Dzedze kuna nzinda unapha anthu!+
Ine ndinadzagumanya pabodzi pene nkhuni zizinji kakamwe.
10 Gumanyani nkhuni, mbamugasa moto,Phikani mwadidi nyama, tayani nsuzi, pontho siyani magogodo apye.
11 Ikhani panela yakusowa pinthu pa moto wakugaka toera ipise,Mpaka nkuwa ufuire.
Natenepa, pinthu pidaupswipisa pinanyunguluka,+ furuju yace mbimala kupya.
12 Mbwenye pyenepi pisamala mphambvu, pontho pisanetesa,Thangwi furuju yace yakuti ndi izinji kakamwe, nkhabe kubuluka.+
Ponyani panela ineyi pa moto na furuju yace ene!’
13 “‘Iwe wapswipisika thangwi ya makhaliro ako aulukwali.+ Ine ndayesera kukucenesa, mbwenye makhaliro ako akupswipa nee acena. Iwe nee unacena, mpaka kuipirwa kwanga na iwe kungamala.+
14 Ine Yahova, ndine adapilonga. Ipyo pinadzacitika. Mwakukhonda penula, ine ndinadzacita pyenepi, nee ndinadzakubvera ntsisi, nee kubwerera nduli.+ Iwo anadzakutonga mwakubverana na makhaliro ako, pontho na macitiro ako,’ alonga Yahova, Mbuya Wankulu Kakamwe.”
15 Yahova alonga pontho na ine, mbandipanga:
16 “Iwe mwana wa munthu, ine ndiri cifupi toera kukubulusira ule anafuna iwe,+ ndinacita pyenepi kabodzi na kabodzi. Iwe nee usafunika kutsukwala, nee kulira peno kugwisa misozi.
17 Bulira mwakukhonda bveka, leka kutsukwala ninga pinacita munthu angaferwa.+ Bvala nguwo yakuphimbira nayo nsolo,+ pontho bvala masandalya.+ Leka kuphimbira mulomo wako,+ pontho leka kudya cakudya cinakubweresera anthu anango.”+
18 Natenepa, ine ndalonga na mbumba namacibese, namasiku nkazanga afa. Mangwana mwace namacibese, ine ndacita pyonsene ninga mudapangwa ine.
19 Anthu akhandibvundza: “Kodi iwe nee unatipanga kuti pinthu pyenepi pinacita iwe pisabvekanji kuna ife?”
20 Ine ndaatawira: “Ine ndatambira mafala awa a Yahova:
21 ‘Panga mbumba ya Izraeli kuti: “Ipi ndi pidalonga Yahova, Mbuya Wankulu Kakamwe: ‘Ine ndiri dhuzi toera kupswipisa mbuto yanga yakucena,+ ire inakugayisani kakamwe, yakuti imwe musaifuna, pontho ndzidzi onsene, imwe musainyerezera muntima mwanu. Ananu amuna na akazi adasiya imwe nduli anadzaphiwa na supada.+
22 Penepo imwe munadzacita sawasawa na pidacita ine. Nee munadzaphimbira milomo yanu, pontho nee munadzadya pyakudya pinafuna kubwereserwa imwe na anthu anango.+
23 Imwe munadzabvala nguwo zakuphimbira nazo nsolo, pontho munadzabvala masandalya mʼmiyendo yanu. Imwe nee munadzatsukwala, nee kulira. Mbwenye imwe munadzathabuka thangwi ya madodo anu,+ pontho munadzabulira kuna unango na ndzace.
24 Ezekiyeli adzakhala cidzindikiro kuna imwe.+ Imwe munadzacita sawasawa na pidacita iye. Pyenepi pingacitika, imwe munadzadziwa kuti ine ndine Yahova, Mbuya Wankulu Kakamwe.’”’”
25 “Mbwenye iwe mwana wa munthu, pa ntsiku inafuna ine kuabulusira citsidzikizo cawo, cinthu cadidi cinaacitisa kutsandzaya, cakuti iwo asacifuna, pontho asacinyerezera ndzidzi onsene mʼmitima yawo, kuphatanizambo anawo amuna na akazi,+
26 iwe unadzadziwiswa pyenepi na munthu anafuna kupulumuka.+
27 Pa ntsiku ineyi, iwe unadzafungula mulomo wako, mbulonga na munthu anafuna kupulumuka, pontho nee unadzakhalabve bewewe.+ Iwe unadzakhala cidzindikiro kuna iwo; natenepa, iwo anadzadziwa kuti ine ndine Yahova.”
Pidzindikiro Pyapantsi
^ Ceneci ndi caka cacipfemba ca ubitcu wa mambo Yeowakimu, Ezekiyeli na Ayuda anango.
