Ezekiyeli 28:1-26
28 Yahova alonga pontho na ine, mbandipanga:
2 “Iwe mwana wa munthu, panga ntongi wa ku Tiro kuti: ‘Ipi ndi pidalonga Yahova, Mbuya Wankulu Kakamwe:
“Nakuti iwe wadzakhala wakudzikuza muntima mwako,+ iwe usapitiriza kulonga kuti: ‘Ine ndine mulungu.
Ndiri nawa pa mpando waumambo wa mulungu pakati pa bara.’+
Mbwenye iwe ndiwe munthu ene pyako, tayu mulungu,Maseze muntima mwako usanyerezera kuti ndiwe mulungu.
3 Iwe usanyerezera kuti ndiwe waudziwisi kakamwe kupiringana Dhanyeli.+
Kuti nkhabepo cinthu ciri ncibisobiso mbukhonda kucidziwa.
4 Iwe wapfuma thangwi ya udziwisi wako na luso yako yakubvesesa pinthu,Pontho usapitiriza kugumanya ouro na parata mu mbuto zako zakukoyera mpfuma.+
5 Luso yako yakucita malonda yakupfumisa kakamwe,+Pontho ntima wako wadzakhala wakudzikuza thangwi ya mpfuma yako.”’
6 “‘Mbwenye ipi ndi pidalonga Yahova, Mbuya Wankulu Kakamwe:
“Nakuti muntima mwako usanyerezera kuti iwe ndiwe mulungu,
7 Ine ndinakubweresera anthu a dziko inango, akuti ndi mbumba yakuipa ntima kakamwe kupiringana zonsene,+Iwo anadzabulusa masupada awo, mbafudza pinthu pyako pyadidi pidawina iwe thangwi ya udziwisi wako,Pontho iwo anadzaipisa mbiri yakubalika kwako.+
8 Iwo anadzakugwisira nʼdjenje,*Natenepa, iwe unadzafa mwakutsukwalisa kakamwe pakati pa bara.+
9 Kodi iwe unapitiriza kulonga kuna ule anafuna kukupha kuti: ‘Ine ndine mulungu’?
Mʼmanja mwa ale anafuna kukupha, iwe unadzakhala munthu ene pyako, tayu mulungu.”’
10 ‘Iwe unadzaphiwa na anthu a madziko anango, kufa kwako kunadzakhala kwakupwazika ninga anthu akukhonda sidzwa,Thangwi ine, ndine adapilonga,’ alonga Yahova, Mbuya Wankulu Kakamwe.”
11 Yahova alonga pontho na ine, mbandipanga:
12 “Iwe mwana wa munthu, imba nyimbo yaciliro thangwi ya mambo wa Tiro, mpange kuti: ‘Ipi ndi pidalonga Yahova, Mbuya Wankulu Kakamwe:
“Iwe ukhali wakulungama kakamwe,Ukhadadzala na udziwisi,+ pontho ukhali wakubalika kakamwe.+
13 Iwe ukhali mu Edheni, mʼmunda wa Mulungu.
Iwe ukhadabalikiswa na mitundu yonsene ya miyala ya ntengo ukulu:Rubhi, topazyo, jaspe; krizolito, oniksi, jadhe, safira, turkeza+ na ejimiradha;Pyakuikhira miyala ineyi pikhali pya ouro.
Pinthu pyenepi pyonsene pyakhunganywa pa ntsiku idacitwa iwe.
14 Ine ndakusankhula toera ukhale kerubhi wakutsidzikiza, wakudzodzwa.
Iwe ukhali paphiri yakucena ya Mulungu,+ pontho ukhafamba pa miyala ya moto.
15 Iwe ukhacita pinthu mwakukhulupirika kutomera pa ntsiku idacitwa iwe,Mpaka pidatoma iwe kucita pinthu pyakukhonda kulungama.+
16 Thangwi yakunjipa kwa malonda ako,+Iwe wadzala na uphanga, mbutoma kudawa.+
Na thangwi ineyi, iwe kerubhi wakutsidzikiza, wakuti uli pa miyala ya moto,Ine ndinadzakuthamangisa paphiri ya Mulungu, ninga munthu wakukhonda cena, pontho ndinadzakufudza.+
17 Ntima wako wadzakhala wakudzikuza thangwi yakubalika kwako.+
Thangwi yakubalika kwako kakamwe, iwe watoma kuphatisira mwakuipa udziwisi wako.+
Ine ndinadzakuponya pa dziko yapantsi.+
Ine ndinadzakucitisa kuti ukhale tsendzo pamaso pa amambo.
18 Thangwi ya mulando wako ukulu, pontho thangwi ya malonda ako anacita iwe mwakukhonda kulungama, iwe wapswipisa mbuto zako zakucena.
Ine ndinadzatomesa moto pakati pako wakuti unadzakupisa.+
Ine ndinadzakupisa, mbusala dotha pa dziko yapantsi, pamaso pa onsene anakuona.
19 Anthu onsene a mbumba zakuti zikhakudziwa, anadzakuyangʼana mwakudzumatirwa.+
Kufudzwa kwako kunadzakhala kwakututumusa na kwakutsukwalisa,Iwe unadzafudzwa, mbukhonda kuoneka pontho, kwenda na kwenda.”’”+
20 Yahova alonga pontho na ine, mbandipanga:
21 “Iwe mwana wa munthu, yangʼana kukhundu ya Sidhoni,+ mbulonga profesiya thangwi ya dziko ineyi.
22 Iwe usafunika kulonga kuti: ‘Ipi ndi pidalonga Yahova, Mbuya Wankulu Kakamwe:
“Ine ndine nyamalwa wako, iwe Sidhoni, pontho ine ndinadzapaswa mbiri pakati pako;Ine ndingadzakutonga, mbandiceneswa pakati pako, anthu anadzadziwa kuti ine ndine Yahova.
23 Ine ndinadzatumiza utenda kuna iwe, pontho ciropa cinadzawewa mʼmiseu yako.
Masupada angabwera buluka mʼmakhundu onsene, anthu akufa anadzagwa pakati pako;Penepo anthu anadzadziwa kuti ine ndine Yahova.+
24 “‘“Buluka penepo, mbumba ya Izraeli nee inadzazungulirwabve na ale anaapwaza, akuti ndi ninga minga yakugopswa na yakubvesa kupha;+ natenepa, anthu anadzadziwa kuti ine ndine Yahova, Mbuya Wankulu Kakamwe.”’
25 “‘Ipi ndi pidalonga Yahova, Mbuya Wankulu Kakamwe: “Ine ndingadzagumanya mbumba ya Izraeli buluka pakati pa mbumba zidabalaliswa iwo,+ ine ndinadzaceneswa pakati pawo pamaso pa mbumba zinango.+ Pontho iwo anadzakhala mu dziko yawo,+ dziko idapasa ine ntumiki wanga Yakobe.+
26 Iwo anadzakhala mu dziko ineyi mwakutsidzikizika,+ anadzamanga nyumba, mbabzwala miti ya mauva;+ inde, iwo anadzakhala akutsidzikizika ndingadzatonga anthu onsene ali nʼkhundu mwawo, akuti asaapwaza;+ natenepa, iwo anadzadziwa kuti ine ndine Yahova Mulungu wawo.”’”
Pidzindikiro Pyapantsi
^ Peno: “munthumbi.”
