Ezekiyeli 31:1-18
-
Kufudzwa kwa Ejitu wakuti ndi ninga muti wakulapha wa sedhro (1-18)
31 Pa ntsiku yakutoma ya mwezi wacitatu wa caka 11, Yahova alonga pontho na ine, mbandipanga:
2 “Iwe mwana wa munthu, panga Farau mambo wa ku Ejitu pabodzi na misoka ya mbumba yace,+
‘Mbani unango wankulu ninga iwe?
3 Iwe walandana na munthu wa ku Asirya, ninga muti wa sedhro wa ku Libhano,Wakulapha kakamwe, wakuti uli na nthawi zakubalika, nthawi zakuti ziri na masamba mazinji anacitisa kuti pantsi pamuti unoyu pakhale na nʼthundzi;Ntsonga yace ikhadafika ku makole.
4 Madzi acitisa kuti muti unoyu ukule, madzi akuzika acitisa kuti ukhale wakulapha.
Mikulo ya madzi ikhadazungulira mbuto idatcekwa iwo;Madjenje a madzi akhathirira miti yonsene ya ntsanga.
5 Na thangwi ineyi, iwo wadzakhala wakulapha kakamwe kupiringana miti yonsene ya ntsanga.
Nthawi zace zikulu zikhathimizirika, nthawi zace zinango zikhalapha,Thangwi ya madzi ace akuwewa.
6 Mbalame zonsene zikhamanga ntsandza mu nthawi zace zikulu,Pinyama pyonsene pya ntsanga pikhabala ana pantsi pa nthawi zace,Mbumba zonsene zakuti ziri na anthu azinji zikakhala pa nʼthundzi wace.
7 Muti unoyu wadzakhala wakubalika kakamwe, pontho ukhali na nthawi zikulu,Thangwi mitcici yace yaenda mpaka pantsi kakamwe pa madzi mazinji.
8 Nee muti ubodzi wa sedhro wa mʼmunda wa Mulungu+ mbudakwanisa kulandaniswa na muti unoyu.
Nee muti ubodzi wa junipero ukhali na nthawi zikulu ninga zaceNee muti ubodzi wa platano ukhali na nthawi ninga zace.
Nee muti ubodzi wa mʼmunda wa Mulungu ukhali wakubalika ninga iwo.
9 Ine ndaucitisa kukhala muti wakubalika na wa masamba mazinji,Pontho miti inango yonsene ya mu Edheni, munda wa Mulungu wandimomwene, ikhaucitira bibvu.’
10 “Mbwenye ipi ndi pidalonga Yahova, Mbuya Wankulu Kakamwe: ‘Nakuti iwo wadzakhala muti wakulapha kakamwe, ntsonga yace mbifika ku makole, pontho nakuti ntima wace wadzakhala wakudzikuza thangwi yakulapha kwawo,
11 ine ndinadzampereka mʼmanja mwa ntongi wamphambvu wa madzindza a anthu.+ Mwakukhonda penula, iye anadzantcunyusa, pontho ine ndinadzanʼkhonda thangwi ya pinthu pyakuipa pidacita iye.
12 Anthu a dziko inango akuti ndi mbumba yakuipa ntima kakamwe kupiringana zonsene, anadzanʼgwisa pantsi, mbansiya ekhene mʼmapiri, masamba ace anadzagwa mʼmagowa onsene. Nthawi zace zidagwandika, zinadzagwa mʼmikulo yonsene ya dziko ineyi.+ Mbumba zonsene pa dziko yapantsi zinadzabuluka pa nʼthundzi wace, mbazinsiya ekhene.
13 Mbalame zonsene zinadzakhala pamuti unoyu udagwa, pontho pinyama pyonsene pya ntsanga pinadzakhala pa nthawi zace.+
14 Pyenepi pinacitika toera pakati pa miti yonsene iri cifupi na madzi, pakhonde kuoneka muti wakuti unalapha kakamwe, peno unafikisa ntsonga yace ku makole, pontho toera pakhonde kuoneka muti wakuthirirwa mwadidi wakuti unalapha mpaka ku makole. Thangwi miti yonsene inadzafudzwa, iyo inadzaenda pantsi pa dziko, pabodzi na anthu anatcitira munthumbi.’
15 “Ipi ndi pidalonga Yahova, Mbuya Wankulu Kakamwe: ‘Pa ntsiku inafuna iye kutcitira Munthumbi,* ine ndinadzacitisa kuti anthu akhale paciliro. Na thangwi ineyi, ine ndinadzaphimbira madzi akuzika, mbandifungira madzi ace akuwewa toera madzi mazinji afungirike. Ine ndinadzacitisa kuti ku Libhano kukhale cidima thangwi ya iye, pontho miti yonsene ya ntsanga inadzabunyala.
16 Ine ndinadzagopesa anthu a madzindza onsene na ntiti wakugwa kwace, ndingadzanʼgwisira Munthumbi* pabodzi na anthu onsene anafuna kutcitira munthumbi. Miti yonsene ya mu Edheni,+ miti yakubalika kakamwe na yadidi ya ku Libhano, miti yonsene inathirirwa mwadidi inadzabalangazwa pantsi pa mataka.
17 Iwo anadzatcitira Munthumbi* pabodzi na iye, kuna ale adaphiwa na supada,+ pabodzi na ale akhamʼphedzera akuti akakhala pa nʼthundzi wace pakati pa madzindza a anthu.’+
18 “‘Ndi muti upi wa mu Edheni wakuti ukhali wakubalika kakamwe na ukulu ninga iwe?+ Mbwenye iwe unadzagwisirwa pantsi pa mataka pabodzi na miti ya mu Edheni, mpaka pantsi pa mataka. Iwe unadzagona pakati pa anthu adakhonda kusidzwa, pabodzi na ale adaphiwa na supada. Pyenepi ndipyo pinafuna kucitikira Farau pabodzi na misoka ya mbumba yace,’ alonga Yahova, Mbuya Wankulu Kakamwe.”
Pidzindikiro Pyapantsi
^ Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
^ Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
^ Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
