Ezekiyeli 35:1-15
-
Profesiya yakutcunyuswa kwa mapiri a Seiri (1-15)
35 Yahova alonga pontho na ine, mbandipanga:
2 “Iwe mwana wa munthu, yangʼana kucisa ca mapiri a Seiri,+ pontho longa profesiya thangwi ya cisa ceneci.+
3 Panga cisa ceneci kuti: ‘Ipi ndi pidalonga Yahova, Mbuya Wankulu Kakamwe: “Ine ndine nyamalwa wako, iwe cisa ca mapiri a Seiri, ine ndinafuthula djanja yanga toera kukutcunyusa, pontho ndinadzakucitisa kuti ukhale thando yakusowa anthu.+
4 Ine ndinadzafudza mizinda yako mbisala madembe; pontho ndinadzacitisa kuti ukhale thando yakusowa anthu;+ natenepa, iwe unadzadziwa kuti ine ndine Yahova.
5 Thangwi iwe waida kakamwe Aizraeli,+ pontho waapha na supada pa ntsiku ya nyatwa yawo, pa ndzidzi wakutcunyuswa kwawo kwakumalisa.”’+
6 “‘Natenepa, ine ndiri kudumbira mu dzina yanga,’ alonga Yahova, Mbuya Wankulu Kakamwe. Ine ndinadzakuphesa, pontho kufa kunadzakutowera.+ Nakuti iwe waida anthu adapha iwe, kufa kunadzakutowera.+
7 Ine ndinadzacitisa kuti cisa ca ku mapiri a Seiri cikhale thando yakusowa anthu,+ pontho ine ndinadzapha kweneko anthu onsene anapita na mucisa ceneci, pakuenda peno pakubwerera.
8 Mapiri ako ndinadzaaphimbira na anthu akufa; anthu anafuna kuphiwa na supada, anadzagwa mʼmapiri ako, mʼmagowa ako na mʼmikulo yako yonsene.
9 Ine ndinadzakucitisa kuti ukhale mbuto yakusowa anthu kwenda na kwenda,+ mizinda yako cipo inadzakhala pontho na anthu. Natenepa, imwe munadzadziwa kuti ine ndine Yahova.’
10 “Maseze Yahova akhali kweneko, iwe walonga: ‘Madzindza awa mawiri na madziko awa mawiri anadzakhala anga, ife tinadzaakwata.’+
11 ‘Ine ndiri kudumbira mu dzina yanga kuti ndinadzakutcunyusani mwakubverana na ukali wanu, pontho na bibvu yanu idapangiza imwe pakuida mbumba yanga.+ Natenepa, ndingadzakutonga, ine ndinadzapangizika pakati pawo,’ alonga Yahova, Mbuya Wankulu Kakamwe.
12 ‘Natenepa, iwe unadzadziwa kuti ine Yahova, ndabva mafala onsene akutikana adalonga iwe thangwi ya mapiri a Izraeli, pidalonga iwe kuti: “Iwo asala madembe, pontho aperekwa mʼmanja mwathu toera tiafudze.”
13 Mwakudzikuza, imwe mwandilonga mwakuipa, pontho mwanjipisa mafala anu akunditikana.+ Ine ndabva pyonsene.’
14 “Ipi ndi pidalonga Yahova, Mbuya Wankulu Kakamwe: ‘Ine ndingadzakucitisa kukhala thando yakusowa anthu, dziko yonsene inadzakomerwa.
15 Nakuti iwe wakomerwa pidafudzwa unthaka wa Izraeli, ine ndinadzakucitirambo pibodzi pyene.+ Iwe cisa ca ku mapiri a Seiri, iwe unadzafudzwa, mbudzakhala madembe akusowa anthu; inde, dziko yonsene ya Edhomi,+ penepo iwo anadzadziwa kuti ine ndine Yahova.’”
