Ezekiyeli 40:1-49
40 Mu caka 25 ca ubitcu wathu,+ pakutoma kwa caka, pa ntsiku khumi ya mwezi wakutoma wa caka 14, pidamala kufudzwa nzinda,+ pa ntsiku ibodzi ene djanja ya Yahova ikhali pana ine, pontho iye andikwata mbandiendesa ku nzinda.+
2 Mulungu andikwata mʼmasomphenya mpaka mu dziko ya Izraeli, pontho iye andiikha paphiri yakulapha kakamwe+ yakuti kukhundu yace yakunterero kukhali na cinthu cidalandana na nzinda.
3 Pidandiendesa iye kweneko, ine ndaona munthu wakuti akhayetimira ninga nkuwa.+ Mʼmanja mwace+ iye akhali na nkhambala na phindi ya ntete wakupima nawo, pontho iye akhali dzololo pansuwo ukulu.
4 Munthu unoyu andipanga: “Iwe mwana wa munthu, yangʼana mwadidi, bvesera mwadidi, pontho onesesa pinthu pyonsene pinafuna ine kukupangiza, thangwi iwe wabwereswa pano toera uoneswe pinthu pyenepi. Panga mbumba ya Izraeli pinthu pyonsene pinafuna iwe kuona.”+
5 Ine ndaona mpanda udazungulira kunja kwa templo.* Mʼmanja mwa munthu unoyu mukhali na phindi ya ntete wakupima nawo wa makhono matanthatu (khono ibodzi na ibodzi ikhadathimizirwa ugugumi wa djanja).* Iye atoma kupima mpanda; mphindza ya mpanda ikhali ya ntete ubodzi, pontho cengo ca mpanda unoyu cikhali ca ntete ubodzi.
6 Buluka penepo, iye aenda mpaka pansuwo wakumabulukiro a dzuwa+ mbakwira masikada. Pidapima iye kutomera kunkhomo ibodzi ya nsuwo mpaka kunkhomo inango, aona kuti ugugumi wace ukhali wa phindi ibodzi ya ntete; kutomera kunkhomo inango ya nsuwo mpaka kunkhomo inango, ugugumi wace ukhalimbo wa phindi ibodzi ya ntete.
7 Sala ibodzi na ibodzi ya anyakuonera ikhali ya ntete ubodzi wa ulaphi, pontho ikhali ya ntete ubodzi wa ugugumi; buluka pa sala ibodzi ya anyakuonera mpaka pa sala inango ya anyakuonera pakhali makhono maxanu.+ Mbuto ya nsuwo ukulu yakuti iri dhuzi na khonde ya nsuwo ukulu udayangʼanira kutsogolo kwa templo, ikhali ya phindi ibodzi ya ntete.
8 Iye apima khonde ya nsuwo ukulu yakuti ikhali kutsogolo kwa templo, nʼdida wace ukhali wa phindi ibodzi ya ntete.
9 Iye apima khonde ya nsuwo ukulu, mbaona kuti ikhali na makhono masere; pontho iye apima mizati yace ya nʼkhundu, iyo ikhali na makhono mawiri; khonde ya nsuwo ukulu ikhali kutsogolo kwa templo.
10 Pakhali masala matatu a anyakuonera kukhundu ibodzi na ibodzi ya nsuwo ukulu wakumabulukiro a dzuwa. Masala matatu ene akhali na midida ibodzi ene; mizati ya nʼkhundu, yakuti ikhali kukhundu ibodzi na ibodzi, ikhali na midida ibodzi ene.
11 Buluka penepo, iye apima ugugumi wa mbuto ya nsuwo ukulu, mbaona kuti ukhali wa makhono khumi; pontho apima ulaphi wa nsuwo ukulu, ukhali wa makhono 13.
12 Mbuto idazungulirwa na mpanda, yakuti ikhali kutsogolo kwa masala a anyakuonera, ikhali ya khono ibodzi. Makhundu mawiri ene akhali na mbuto ya khono ibodzi yakuti ikhadazungulirwa na mpanda, masala a anyakuonera akuti akhali mʼmakhundu mawiri ene akhali a makhono matanthatu.
13 Buluka penepo, iye apima nsuwo ukulu kutomera pantsoi ya sala ya anyakuonera mpaka pantsoi ya sala inango, akhali makhono 25 augugumi; nsuwo wa sala ibodzi ukhali kutsogolo kwa nsuwo wa sala inango.+
14 Penepo iye apima mizati ya nʼkhundu, yakuti ikhali na makhono 60 a cengo; iye apimambo mizati ya mʼmakhundu a misuwo, mʼmakhundu onsene a thando.
15 Kutomera kutsogolo kwa mbuto ya nsuwo ukulu mpaka kutsogolo kwa khonde, mbuto ya nsuwo ukulu ya kukhundu ya templo ikhali ya makhono 50.
16 Kukhundu yankati ya nsuwo ukulu, mʼmasala a anyakuonera na mʼmizati ya nʼkhundu, mʼmakhundu mawiri ene mukhali na majanela,+ akuti nkati akhali makulu mbwenye kunja akhali mangʼono. Nkati mwa makhonde, mʼmakhundu mawiri ene mukhalimbo na majanela, mʼmizati ya nʼkhundu mukhadalembwa miti ya midikhwa.+
17 Buluka penepo, iye andikwata mpaka pa thando yakunja, penepo ine ndaona masala akudyera,+ pontho thando yonsene ikhadatsindirwa na miyala. Pa thando ineyi pakhali masala 30 akudyera.
18 Thando ineyi idatsindirwa na miyala ikhali kukhundu ya misuwo mikulu, pontho ugugumi wace ukhali sawasawa na ulaphi wa misuwo mikulu, ineyi ikhali thando ingʼono idatsindirwa na miyala.
19 Buluka penepo, iye apima nsindzo kutomera pansuwo ukulu wa ku gowa mpaka padatoma thando yankati. Akhali makhono 100 kukhundu yakumabulukiro a dzuwa na kunkwiriro.
20 Thando yakunja ikhali na nsuwo ukulu kukhundu yakunkwiriro, pontho iye apima ulaphi na ugugumi wace.
21 Kukhundu ibodzi na ibodzi kukhali masala matatu a anyakuonera. Midida ya mizati ya nʼkhundu na ya khonde ikhali sawasawa na ya nsuwo ukulu wakutoma. Khonde ineyi ikhali na makhono 50 aulaphi na makhono 25 augugumi.
22 Majanela ace, khonde yace na miti yace ya midikhwa idalembwa penepo,+ midida yace ikhali ibodzi ene na ya nsuwo wakumabulukiro a dzuwa. Toera kupita mwenemu, anthu akhafunika kukwira masikada manomwe, pontho khonde yace ikhali kutsogolo kwa masikada.
23 Pa thando yankati pakhali na nsuwo ukulu kutsogolo kwa nsuwo ukulu wakunkwiriro, nsuwo ukulu unango ukhali kutsogolo kwa nsuwo ukulu wakumabulukiro a dzuwa. Iye apima nsindzo buluka pansuwo ukulu ubodzi mpaka pansuwo ukulu unango, mbaona kuti akhali makhono 100.
24 Buluka penepo, iye andiendesa kukhundu yakunterero, penepo ine ndaona nsuwo ukulu kukhundu yakunterero.+ Iye apima mizati yace ya nʼkhundu na khonde yace, mbaona kuti pikhali na midida ibodzi ene ninga inango.
25 Mʼmakhundu mawiri ene a nsuwo ukulu na a khonde, mukhali na majanela akuti akhali sawasawa na majanela anango. Nsuwo ukulu unoyu ukhali na makhono 50 aulaphi na makhono 25 augugumi.
26 Toera kufika penepo, pakhali na masikada manomwe, pontho khonde yace ikhali kutsogolo kwa masikada anewa.+ Pa mizati ya nʼkhundu mwace pakhadalembwa miti ya midikhwa, kukhundu ibodzi na ibodzi.
27 Thando yankati ikhalimbo na nsuwo ukulu kukhundu yakunterero; iye apima nsindzo pakati pa misuwo miwiri mikulu ya kukhundu yakunterero, mbaona kuti ukhali nsindzo wa makhono 100.
28 Buluka penepo, iye andipitisa na pansuwo ukulu wakunterero, mpaka pa thando ikulu yakunterero, mbapima nsuwo ukulu wakunterero; iwo ukhali na midida ibodzi ene na ya misuwo inango.
29 Masala ace a anyakuonera, mizati yace ya nʼkhundu na khonde yace, midida yace ikhali ibodzi ene na inango. Mʼmakhundu mawiri ene a nsuwo ukulu na khonde, mukhali na majanela. Nsuwo ukulu unoyu ukhali na makhono 50 aulaphi, ugugumi wace ukhali wa makhono 25.+
30 Nʼkhundu monsene mukhali na makhonde; iwo akhali na makhono 25 aulaphi, ugugumi ukhali wa makhono maxanu.
31 Khonde ya nsuwo ukulu wakunterero ikhali kukhundu ya thando yakunja, pa mizati+ yace ya nʼkhundu pakhadalembwa miti ya midikhwa, pontho pakhali na masikada masere toera kufika penepo.+
32 Iye andiendesa pa thando yankati buluka kukhundu yakumabulukiro a dzuwa, mbapima nsuwo ukulu, midida yace ikhali ibodzi ene na ya misuwo mikulu inango.
33 Masala ace a anyakuonera, mizati yace ya nʼkhundu na khonde yace, midida yace ikhali ibodzi ene na inango, mʼmakhundu mawiri ene a nsuwo ukulu na khonde mukhali na majanela. Nsuwo ukulu unoyu ukhali na makhono 50 aulaphi, ugugumi wace ukhali wa makhono 25.
34 Khonde ya nsuwo ukulu wakunterero ukhali kukhundu kwa thando yakunja, pa mizati yace ya nʼkhundu pakhadalembwa miti ya midikhwa, pontho pakhali na masikada masere toera kufika penepo.
35 Buluka penepo, iye andiendesa pansuwo ukulu wakunkwiriro+ mbaupima; iwo ukhali na midida ibodzi ene na inango.
36 Masala ace a anyakuonera, mizati yace ya nʼkhundu na khonde yace, midida yace ikhali ibodzi ene na inango. Mʼmakhundu mawiri ene a nsuwo ukulu na khonde, mukhali na majanela. Nsuwo ukulu unoyu ukhali na makhono 50 aulaphi, ugugumi wace ukhali wa makhono 25.
37 Mizati yace ya nʼkhundu ikhali kutsogolo kwa thando yakunja, pa mizati yace miwiri ene ya nʼkhundu pakhadalembwa miti ya midikhwa, pontho pakhali na masikada masere toera kufika penepo.
38 Dhuzi na mizati ya nʼkhundu mwa misuwo mikulu pakhali na sala ibodzi yakudyera yakuti ikhali na nsuwo ubodzi, ndi mwenemu mukhatsukwa ntsembe zakupiswa.+
39 Khundu ibodzi na ibodzi ya khonde ya nsuwo ukulu ikhali na meza ziwiri zikhapherwa pinyama toera kupereka ntsembe zakupiswa,+ ntsembe toera kulekererwa madawo+ na ntsembe thangwi ya mulando.+
40 Kunja kwa nsuwo ukhakwira na anthu kuenda ku nsuwo ukulu wakunkwiriro kukhali na meza ziwiri. Khundu yankati mwa khonde ya nsuwo ukulu mukhalimbo na meza ziwiri.
41 Kukhundu yankati ya nsuwo ukulu kukhali na meza zinai, pontho kunja kukhali na meza zinai, meza zonsene zikhali zisere, ndi pameza zenezi pakhapherwa pinyama toera kupereka ntsembe.
42 Meza zinai zikhaphatisirwa pakupereka ntsembe zakupiswa zikhali za miyala yakusemwa. Izo zikhali na khono ibodzi na hafu ya ulaphi, khono ibodzi na hafu ya ugugumi na khono ibodzi ya cengo. Pameza zenezi pakhakoyiwa pyombo pikhaphatisirwa toera kupha pinyama pikhaperekwa ninga ntsembe zakupiswa na ntsembe zinango.
43 Mʼmapfufu onsene a nkati mukhadaikhwa pyakumanikira pinthu pyakuti kukula kwapyo ndi ninga ugugumi wa manja, pontho padzulu pameza pakhaikhwa nyama zikhaperekwa ninga ntsembe.
44 Kukhundu yakunja ya nsuwo ukulu wankati kukhali masala akhadyera anyakuimba;+ masala anewa akhali pa thando yankati dhuzi na nsuwo ukulu wakunkwiriro, wakuti ukhadayangʼanira kunterero. Sala inango yakudyera ikhali dhuzi na nsuwo ukulu wakumabulukiro a dzuwa, mbuyangʼanira kukhundu yakunkwiriro.
45 Iye andipanga: “Sala iyi yakudyera idayangʼanira kunterero ndi ya anyantsembe anaphata basa mu templo.+
46 Sala yakudyera idayangʼanira kunkwiriro ndi ya anyantsembe anaphata basa pa guwa ya ntsembe.+ Anewa ndi ana a Zadoki+ akuti pakati pa Alevi, asapaswa basa yakufendedzera Yahova toera kuntumikira.”+
47 Buluka penepo, iye apima thando yankati. Iyo ikhali na makhundu manai a midida ibodzi ene, makhono 100 aulaphi na makhono 100 augugumi. Guwa ya ntsembe ikhali kutsogolo kwa templo.
48 Pontho, iye andiendesa pa khonde ya templo,+ mbapima mizati ya mʼmakhundu a khonde, nzati wa kukhundu ibodzi ukhali wa makhono maxanu, nzati wa kukhundu inango ukhali wa makhono maxanu. Ugugumi wa nsuwo ukulu, khundu ibodzi ukhali wa makhono matatu, khundu inango ukhali wa makhono matatu.
49 Khonde ikhali na makhono 20 aulaphi na makhono 11* augugumi. Toera kufika penepo anthu akhafunika kukwira masikada. Pakhundu pa mizati mikulu pakhali na mizati mingʼono, uku ubodzi, uku ubodzi.+
Pidzindikiro Pyapantsi
^ Fala na Fala: “kunja kwa nyumba.” Fala ineyi isathumburuzwa templo kutomera kapitulu 40 mpaka kapitulu 48, khala analongwa ndi makhundu anango a templo peno templo ene.
^ Fala na Fala: “phindi ya ntete wakupima nawo wa makhono matanthatu, khono ibodzi na ugugumi wa djanja.” Anewa asacemerwa makhono akulapha. Onani Apendise B14.
^ Munjira inango: “makhono 12.”
