Ezekiyeli 41:1-26
41 Buluka penepo, iye andiendesa pa Mbuto Yakucena yakunja kwa templo,* mbapima mizati ya nʼkhundu; nzati wa kukhundu ibodzi ukhali na mphindza ya makhono* matanthatu, nzati wa kukhundu inango ukhali na mphindza ya makhono matanthatu.
2 Nsuwo ukhali na makhono khumi augugumi; pontho mapfufu a nʼkhundu mwa nsuwo, ya khundu ibodzi ikhali na makhono maxanu, ya khundu inango ikhali na makhono maxanu. Iye apima ulaphi wa mbuto yakucena,* ukhali wa makhono 40, ugugumi wace ukhali wa makhono 20.
3 Penepo iye apita mu mbuto* inango, mbapima mizati ya khundu ya ku nsuwo, mphindza yace ikhali ya makhono mawiri. Pontho, mbuto ya nsuwo ikhali na makhono matanthatu augugumi. Mapfufu a nʼkhundu mwa nsuwo akhali na* makhono manomwe.
4 Buluka penepo, iye apima kwartu idayangʼanira kutsogolo kwa templo,* iyo ikhali na makhono 20 aulaphi na makhono 20 augugumi.+ Pontho iye andipanga: “Iyi ndi Mbuto Yakucena Kakamwe.”+
5 Penepo iye apima pfufu ya templo, mphindza yace ikhali ya makhono matanthatu. Masala ace a nʼkhundu akuti akhali nʼkhundu mwa templo akhali na makhono manai augugumi.+
6 Nʼkhundu mwa templo mukhali na mizera ya masala akusandzikirana, ibodzi padzulu pa indzace; nzera ubodzi na ubodzi ukhali na masala 30, mʼmakhundu onsene a mapfufu a templo mukhali na pinthu pyakutsidzikiza mizati mingʼono ya masala a nʼkhundu. Natenepa, mizati ineyi nee ikhafunika kupitiswa mʼmapfufu a templo.+
7 Mʼmakhundu mawiri ene a templo mukhali na mbuto yakupita nayo, yakuti ikhatoma ingʼono pantsi, mbithimizirika mu ndzidzi unakwira iyo mʼmasala a ndzulu.+ Ugugumi wa mbuto ineyi, ukhathimizirika buluka mʼmasala a nzera wapantsi, kuenda mʼmasala a nzera wapadzulu, mu ndzidzi unakwira munthu buluka nzera wapantsi kuenda nzera wapadzulu, mbapita na nzera wa masala a pakati.
8 Ine ndaona kuti pakhali mbuto yapadzulu idazungulira templo; pontho, pantsi pa masala a nʼkhundu, nʼdida wace ukhali wa phindi ibodzi ya ntete wa makhono matanthatu kutomera pantsi mpaka pankhomo.
9 Mphindza ya pfufu yakunja ya masala a nʼkhundu ikhali ya makhono maxanu. Pakhali na mbuto yakukhonda fungwa nʼkhundu-nʼkhundu mwa masala a nʼkhundu, mbuto ineyi ikhadaphatana na templo.
10 Pakati pa templo na masala akudyera,+ pakhali na mbuto kukhundu ibodzi na ibodzi, yakuti ugugumi wace ukhali wa makhono 20.
11 Pakhali na nsuwo toera kuenda mʼmasala a nʼkhundu buluka pa mbuto idakhonda kufungwa, ya kukhundu yakunkwiriro; nsuwo unango ukhali kukhundu yakunterero. Mbuto yonsene idakhonda kufungwa, idazungulira templo, ugugumi wace ukhali wa makhono maxanu.
12 Nyumba ya kukhundu yakumadokero a dzuwa, yakuti ikhali kutsogolo kwa mbuto idakhonda kufungwa, ikhali na makhono 70 augugumi na makhono 90 aulaphi; mphindza ya mapfufu a nyumba ineyi ikhali ya makhono maxanu.
13 Iye apima templo, iyo ikhali na makhono 100 aulaphi. Mbuto idakhonda kufungwa, nyumba* na mapfufu ace pikhalimbo na makhono 100.
14 Ugugumi wa mbuto idakhonda kufungwa na kutsogolo kwa templo, kudayangʼanira kukhundu yakumabulukiro a dzuwa, pyonsene pikhali na makhono 100.
15 Iye apima ulaphi wa nyumba idayangʼanira kuntsi kwa mbuto idakhonda kufungwa, pabodzi na mbuto zinapita na anthu mʼmakhundu mawiri ene, midida yace ikhali makhono 100.
Iye apimambo mbuto yakucena, Mbuto Yakucena Kakamwe+ na makhonde a pa thando,
16 kuphatanizambo mbuto za pansuwo, majanela akuti nkati akhali makulu, mbwenye kunja akhali mangʼono+ na mbuto zinapita na anthu, zakuti zikhali mʼmakhundu anewa matatu. Cifupi na mbuto za pansuwo, mukhadakhomerwa matabwa+ buluka pantsi mpaka mʼmajanela; pontho, majanela akhadaphimbirwa.
17 Iye apima padzulu pansuwo, mbuto zankati na zakunja kwa templo, kuphatanizambo mpanda onsene.
18 Mʼmapfufu mukhadalembwa akerubhi+ na miti ya midikhwa,+ muti ubodzi na ubodzi wa nʼdikhwa ukhali pakati pa akerubhi awiri, pontho kerubhi mʼbodzi na mʼbodzi akhali na nkhope ziwiri.
19 Nkhope ya munthu ikhadayangʼanira kukhundu ikhali nʼdikhwa ubodzi, nkhope ya nkhalamu ikhadayangʼanira kukhali nʼdikhwa wa kukhundu inango.+ Akerubhi na midikhwa pikhadalembwa tenepo mu templo yonsene.
20 Kutomera pantsi mpaka padzulu pansuwo, pakhadalembwa akerubhi na midikhwa pa pfufu ya mbuto yakucena.
21 Makhundu manai a nsuwo wa mbuto yakucena akhali sawasawa.+ Kutsogolo kwa mbuto yakucena kukhali na cinthu cikhaoneka ninga
22 guwa ya matabwa+ yakuti ikhali na makhono matatu a cengo na makhono mawiri aulaphi. Pakhali na mizati ya nʼkhundu, pontho pantsi pace na nʼkhundu mwace mukhadacitwa na matabwa. Penepo, iye andipanga: “Iyi ndi meza yakuti iri pamaso pa Yahova.”+
23 Mbuto Yakucena na Mbuto Yakucena Kakamwe, zonsene zikhali na misuwo miwiri-miwiri.+
24 Misuwo ikhali na makhundu mawiri-mawiri, makhundu mawiri pansuwo ubodzi na ubodzi.
25 Pa misuwo ya mbuto yakucena pakhadalembwa akerubhi na miti ya midikhwa ninga pidalembwa pa mapfufu.+ Kutsogolo kwa khonde kukhadaikhwa nzera wa matabwa akuti akhadabulukira kunja.
26 Pakhalimbo na majanela akuti nkati akhali makulu, mbwenye kunja akhali mangʼono,+ kuphatanizambo miti ya midikhwa idalembwa mʼmakhundu mawiri ene a khonde, pabodzi na mʼmasala a templo na mʼmizera ya matabwa.
Pidzindikiro Pyapantsi
^ Mu kapitulu 41 na 42 fala Yacihebheri yakuti “templo,” isabveka mbuto yakucena yakunja (Mbuto Yakucena) yakuti isaphataniza Mbuto Yakucena na Mbuto Yakucena Kakamwe.
^ Anewa asacemerwa makhono akulapha. Onani Apendise B14.
^ Fala na Fala: “mbuto yakucena yakunja.”
^ Ineyi ndi mbuto yakucena yankati. Peno: “Mbuto Yakucena Kakamwe.”
^ Fala na Fala: “ugugumi wa mbuto ya nsuwo ukhali wa.”
^ Peno: “mbuto yakucena yakunja.”
^ Ineyi ndi nyumba yakuti ikhali kumadokero a dzuwa a mbuto yakucena.
