Ezekiyeli 44:1-31
44 Iye andibweza ku nsuwo ukulu wakunja wa mbuto yakucena, wakuti ukhadayangʼanira kukhundu yakumabulukiro a dzuwa,+ pontho nsuwo unoyu ukhadafungwa.+
2 Penepo Yahova andipanga: “Nsuwo uyu unapitiriza kukhala wakufungwa, nee usafunika kufungulwa, pontho nee munthu mʼbodzi asafunika kupita na pansuwo unoyu; thangwi Yahova Mulungu wa Izraeli apita na pansuwo unoyu;+ na thangwi ineyi, iwo usafunika kupitiriza kukhala wakufungwa.
3 Mbwenye ntsogoleri anadzakhala pantsi penepo, toera kudya nkate pamaso pa Yahova,+ thangwi iye ndi ntsogoleri. Iye anabwera penepo na pakhonde ya nsuwo ukulu, angamala mbabuluka.”+
4 Buluka penepo, iye andipitisa na pansuwo ukulu wakunkwiriro, mbandiendesa pansuwo ukulu wakutsogolo kwa templo. Pidayangʼana ine, ndaona kuti mbiri ya Yahova ikhadadzala mu templo ya Yahova.+ Na thangwi ineyi, ine ndagodama, mbandikotamisa nkhope yanga mpaka pantsi.+
5 Penepo Yahova andipanga: “Iwe mwana wa munthu, bvesesa, pontho onesesa, bvesera mwadidi pyonsene pinakupanga ine, thangwi ya matongero na miyambo ya templo ya Yahova. Onesesa mwadidi mbuto yakupita nayo mu templo na mbuto zonsene zakubuluka nazo pa mbuto yakucena.+
6 Panga mbumba yakukhonda bvera ya Izraeli kuti: ‘Ipi ndi pidalonga Yahova, Mbuya Wankulu Kakamwe: “Imwe mbumba ya Izraeli, imwe mwacita pinthu pyakunyanyasa mwakupiringana midida.
7 Mungabweresa mu templo yanga anthu a madzindza anango akuti nee asidzwa, pontho mitima yawo ndi yakukhonda kulungama, iwo asapswipisa templo yanga. Imwe musapereka kuna ine, nkate, mafuta a pinyama na ciropa, mu ndzidzi wakuti imwe musafudza cibverano canga thangwi ya pinthu pyonsene pyakunyanyasa pinacita imwe.
8 Imwe nkhabe kutsalakana pinthu pyanga pyakucena,+ mbwenye musasankhula anthu anango toera aphate mabasa a pa mbuto yanga yakucena.”’
9 “Ipi ndi pidalonga Yahova, Mbuya Wankulu Kakamwe: “Munthu wa dziko inango anakhala mu Izraeli, wakuti nee asidzwa, pontho muntima mwace nee ndi wakulungama, nee asafunika kupita mu mbuto yanga yakucena.”’
10 “‘Mbwenye Alevi adandisiya+ mu ndzidzi udandisiya Aizraeli mbalambira madzimunthu awo akunyanyasa, anadzaona nyatwa thangwi ya madawo awo.
11 Iwo anadzakhala atumiki pa mbuto yanga yakucena toera aonere misuwo ya templo+ na kutumikira mu templo. Iwo anadzapha pinyama pinaperekwa ninga ntsembe zakupiswa na ntsembe za mbumba; pontho iwo anadzalimira patsogolo pa mbumba toera kuitumikira.
12 Nakuti iwo atumikira mbumba mu ndzidzi wakuti mbumba ikhalambira madzimunthu awo akunyanyasa, pontho iwo adzakhala ninga mwala wakugwegwedusa, mbacitisa mbumba ya Izraeli kudawa.+ Na thangwi ineyi, ine ndalamusa manja anga, mbandidumbira kuti iwo anadzaona nyatwa thangwi ya madawo awo,’ alonga Yahova, Mbuya Wankulu Kakamwe.
13 Iwo nee anadzandifendedzera toera kutumikira ninga anyantsembe anga, pontho iwo nee anadzafendedzera pinthu pyanga pidaceneswa, nee pinthu pyanga pyakucena kakamwe, iwo anadzapasika manyadzo thangwi ya pinthu pyakunyanyasa pidacita iwo.
14 Ine ndinadzaapasa mabasa anaphatwa mu templo, toera iwo aphate mabasa anacitwa mwenemu na pinthu pyonsene pinafunika kucitwa mwenemu.’+
15 “‘Mbwenye anyantsembe akuti ndi Alevi, ana a Zadhoke+ adapitiriza kuphata mabasa pa mbuto yanga yakucena mu ndzidzi udandisiya Aizraeli,+ iwo anadzandifendedzera toera kunditumikira, pontho anadzalimira patsogolo panga toera apereke kuna ine, mafuta a pinyama+ na ciropa,’+ alonga Yahova, Mbuya Wankulu Kakamwe.
16 ‘Iwo ndiwo anafuna kudzapita mu mbuto yanga yakucena, anadzafendedzera meza yanga toera anditumikire,+ mbaphata mabasa anafunika iwo kundiphatira.+
17 “‘Iwo angapita pa misuwo ya thando yankati, asafunika kubvala nguwo zakucitwa na usalu.+ Nee asafunika kubvala nguwo zakucitwa na maweya a mabira mu ndzidzi unatumikira iwo pa misuwo ya thando yankati peno angabuluka penepo toera kupita nkati.
18 Iwo asafunika kubvala nguwo yakuphimbira nayo nsolo yakucitwa na usalu, pontho asafunika kubvala makabudula akucitwa na usalu toera kuphimbira ntcafu zawo.+ Nee asafunika kubvala nguwo zakuti zinaacitisa kubuluka kaluma.
19 Mbadzati kubuluka toera kuenda pa thando yakunja, thando yakunja yakuti ndi panakhala mbumba; asafunika kudula nguwo zidabvala iwo toera kutumikira nazo,+ mbaziikha mʼmasala akudyera+ akuti ndi akucena. Penepo iwo anadzabvala nguwo zinango toera akhonde kucenesa mbumba na nguwo zawo.
20 Iwo nee asafunika kucinga mpala,+ pontho nee asafunika kusiya ntsisi yawo mpaka ilaphe. Iwo asafunika kukhala na tsisi yakubvira.
21 Anyantsembe nee asafunika kumwa vinyu angafuna kupita nʼthando yankati.+
22 Iwo nee asafunika kusemba nzice+ peno nkazi adakhondwa na mamunace; mbwenye anakwanisa kusemba mwali wa dzindza ya Izraeli peno nzice wakuti mamunace* akhali nyantsembe.’+
23 “‘Iwo asafunika kupfundzisa mbumba yanga kusiyana kwa cinthu cakucena na cinthu cakukhonda cena; anadzaapfundzisa kusiyana kwa cinthu cakukhonda cena na cinthu cakucena.+
24 Iwo anadzakhala anyakutonga miseru, mbatsogolera pakutonga miseru;+ asafunika kutonga miseru mwakubverana na matongero anga.+ Asafunika kukoya miyambo yanga na mitemo yanga inalonga pya maphwando anga onsene,+ pontho iwo asafunika kucenesa masabudu anga.
25 Anyantsembe nee asafunika kufendedzera munthu wakufa gopa anapswipisika,* mbwenye nyantsembe anakwanisa kupswipisika,* khala aferwa na pai wace, mai wace, mwanace wamamuna, mwanace wankazi, mʼbale wace wamamuna peno mʼbale wace wankazi wakuti nee asembwa.+
26 Nyantsembe angamala kuceneseka, asafunika adikhire ntsiku zinomwe.
27 Buluka penepo, pa ntsiku inafuna iye kupita mu mbuto yakucena, yakuti ndi thando yankati, toera atumikire pa mbuto yakucena, asafunika apereke ntsembe yace toera alekererwe madawo,’+ alonga Yahova, Mbuya Wankulu Kakamwe.
28 “‘Pontho, uyu unadzakhala unthaka wawo: Ine ndine unthaka wawo.+ Imwe nee musafunika kuapasa unthaka mu Izraeli, thangwi ine ndine unthaka wawo.
29 Iwo ndiwo anafuna kudzadya ntsembe za pyakudya,+ ntsembe zinaperekwa toera kulekererwa madawo, na ntsembe zinaperekwa thangwi ya mulando,+ pontho pinthu pyonsene pinakoyiwa toera kuperekwa kuna Mulungu mu Izraeli pinadzakhala pyawo.+
30 Misapo yonsene yadidi kakamwe yakutoma kutokota na pinthu pyonsene pinafuna imwe kupereka, pinadzakhala pya anyantsembe.+ Ufa* wanu wakutoma musafunika kuupereka kuna anyantsembe.+ Mungacita pyenepi, imwe munadzakhala na nkhombo mʼmanyumba mwanu.+
31 Anyantsembe nee asafunika kudya mbalame peno nyama ya cinyama cidagumaniwa cakufa peno cidalumwa na cikala.’+
Pidzindikiro Pyapantsi
^ Peno: “nkazi adaferwa na mamunace wakuti.”
^ Peno: “gopa anakhala akukhonda cena.”
^ Peno: “anakwanisa kukhala wakukhonda cena.”
^ Peno: “Ufa wakukhonda nerika.”
