Genesi 44:1-34
44 Buluka penepo, Zuze apanga mamuna akhayangʼanira nyumba yace: “Dzadza pyakudya pizinji mʼmasakha a amuna ninga munakwanisa iwo kukwata, pontho ikha kobiri ya mʼbodzi na mʼbodzi nsakha mwace.+
2 Mbwenye ikha ndiko yanga ya parata nsakha mwa mwana wangʼono pabodzi na kobiri yace ikhafuna kugula na iye pyakudya.” Natenepa iye acita ninga mudampangira Zuze.
3 Mangwana mwace namacibese mudaca kunja, iwo aasiya toera aende pabodzi na maburu awo.
4 Mu ndzidzi wakuti iwo nee akhali kutali na nzinda, Zuze apanga mamuna akhayangʼanira nyumba yace: “Cimbiza! Thamangira amuna anewa! Ungaagumana, apange: ‘Thangwi yanji mwabwezera pinthu pyakuipa pa pinthu pyadidi pidacitirwa imwe?
5 Kodi ineyi nee ndi ndiko inaphatisira mbuyanga toera kumwa nayo na kuona pinthu pya ntsogolo? Pidacita imwe ndi pyakuipa kakamwe.’”
6 Natenepa iye aagumana mbaapanga mafala anewa.
7 Mbwenye iwo alonga: “Mbuyanga, thangwi yanji mukulonga pyenepi? Nkhabe kwanisika kuti atumiki anu acite pinthu ninga pyenepi.
8 Onani basi, ife tabuluka ku dziko ya Kanani+ mbatibweresa kobiri idagumana ife mʼmasakha mwathu. Mphapo pinakwanisika tani kuti tibe parata peno ouro ya panyumba ya mbuyanu?
9 Ndiko ingagumanwa na mʼbodzi wa atumiki anu, iye asafunika kuphiwa, pontho tonsene tinadzakhala mabitcu anu.”
10 Penepo iye alonga: “Mbapicitike ninga mudalonga imwe: Ule anafuna kugumanwa na ndiko anadzakhala bitcu wanga, mbwenye anango anadzakhala akusowa mulando.”
11 Natenepa mʼbodzi na mʼbodzi wa iwo atcitisa sakha yace mwakucimbiza mbaifungula.
12 Iye asaka mwadidi, atoma na sakha ya nkulu mbamalisira na ya ngʼono wawo. Pakumalisa ndiko yagumanwa nsakha mwa Bhenjamini.+
13 Penepo iwo apandula nguwo zawo, mʼbodzi na mʼbodzi apakiza pontho ntolo wace pa buru mbabwerera ku nzinda.
14 Yuda+ na abale ace pidapita iwo nʼnyumba mwa Zuze, iye akhali mwenemu; penepo iwo agodama mbakotamisa misolo yawo mpaka pantsi.+
15 Zuze aabvundza: “Ninji pyenepi pidacita imwe? Imwe nee mukhapidziwa kuti munthu ninga ine mbadakwanisa kuona pyantsogolo?”+
16 Penepo Yuda atawira: “Tinalonganji pontho kuna imwe mbuyanga? Tinalonga tani? Pontho tinapangiza tani kuti ndife anthu akulungama? Mulungu wandimomwene aona kudawa kwa atumiki anu.+ Cincino ndife mabitcu anu mbuyanga, ife pabodzi na ule adagumanwa na khomitco!”
17 Mbwenye Zuze alonga: “Nkhabe kwanisika kuti ine ndicite pyenepi! Munthu adagumanwa na ndiko ndiye anafuna khala bitcu wanga.+ Mbwenye imwe bwererani muntendere kuna pai wanu.”
18 Yuda anfendedzera mbampanga: “Ndiri kukudembeterani mbuyanga, ndaphata miyendo, tawirisani kuti ntumiki wanu alonge na imwe, pontho lekani kuipirwa na ntumiki wanu, thangwi imwe ndimwe sawasawa na Farau.+
19 Mbuyanga mwabvundza atumiki anu: ‘Kodi imwe muli na pai peno mʼbale unango?’
20 Natenepa ife takupangani mbuyanga: ‘Tiri na pai wakugwesera na mʼbale wathu wangʼono,+ adabalirwa iye mu unkhalamba wace. Mbwenye mʼbale wace afa,+ adasala ndiye basi mwa ana a mai wace,+ pontho pai wace asanfuna kakamwe.’
21 Buluka penepo imwe mwapanga atumiki anu: ‘Mʼbwereseni kuna ine toera ndimuone.’+
22 Mbwenye ife takupangani mbuyanga: ‘Nkhabe kwanisika kuti mʼphale unoyu asiye pai wace. Angansiya, mwandimomwene pai wace anadzafa.’+
23 Buluka penepo mbuyanga mwapanga atumiki anu: ‘Mʼbale wanu angakhonda kubwera pabodzi na imwe, lekani kufika pana ine.’+
24 “Natenepa, taenda kuna pai wanga, ntumiki wanu, mbatimpanga mafala onsene a mbuyanga.
25 Mukupita kwa ndzidzi, pai wathu atipanga: ‘Bwererani toera mukatigulire pyakudya.’+
26 Mbwenye ife talonga: ‘Nee tinabwerera. Mʼbale wathu wangʼono angaenda na ife, tinabwerera, thangwi nee tinakwanisa kufika pana mamuna unoyu tingakhonda kuenda pabodzi na mʼbale wathu wangʼono.’+
27 Buluka penepo, pai wanga, ntumiki wanu, atipanga: ‘Imwe musapidziwa kuti nkazanga andibalira ana awiri basi.+
28 Mbwenye mʼbodzi wa iwo andisiya, ine mbandilonga: “Mwakukhonda penula, iye amala kudyiwa na cikala!”+ Natenepa mpaka lero cipo ndamuona pontho.
29 Mungakwata pontho uyu mbamuenda naye kutali na ine, angacitikirwa na cidengwa mbafa, munandicitisa kuenda Munthumbi*+ thangwi yakutsukwala.’+
30 “Natenepa ndingabwerera kuna pai wanga, ntumiki wanu, mbandikhonda kuenda pabodzi na mʼphale uyu, nakuti iye asanfuna kakamwe,
31 angaona kuti mʼphale nee ali pabodzi na ife, iye anadzafa, mwandimomwene atumiki anu anadzacitisa kuti pai wathu, ntumiki wanu, aende Munthumbi* thangwi yakutsukwala.
32 Ine ntumiki wanu ndapasa cinyindiro pai wanga thangwi ya mʼphale uyu, mbandilonga: ‘Ndingakhonda kubwerera naye kuna imwe, ndinakhala na mulando* kuna imwe kwenda na kwenda.’+
33 Cincino ndaphata miyendo, tawirisani kuti ine ntumiki wanu ndisale pa mbuto ya mʼphale uyu ninga bitcu wa mbuyanga toera mʼphale abwerere pabodzi na abale anga.
34 Ndinakwanisa tani kubwerera kuna pai wanga, mʼphale mbakhonda kuenda pabodzi na ine? Nee ndinakwanisa kuona pai wanga mbakanentseka na kutsukwala!”
Pidzindikiro Pyapantsi
^ Onani Mabvekero a Mafala Anango.
^ Onani Mabvekero a Mafala Anango.
^ Peno: “madawo.”
