Ninga Mudazilembera Mateu 1:1-25
1 Bukhu inalonga pya umaso* wa Yezu Kristu,* mwana wa Dhavidhi,+ mwana wa Abhrahamu:+
2 Abhrahamu abala Izaki;+Izaki abala Yakobe;+Yakobe abala Yuda+ na abale ace;
3 Yuda na Tamara abala Peresi na Zara;+Peresi abala Ezironi;+Ezironi abala Ramu;+
4 Ramu abala Aminadhabhu;Aminadhabhu abala Nasoni;+Nasoni abala Salimoni;
5 Salimoni na Raabhe+ abala Bhoazi;Bhoazi na Rute+ abala Obhedhi;Obhedhi abala Yese;+
6 Yese abala mambo Dhavidhi.+
Dhavidhi na nkazi wakuti akhali wa Uriya abala Salomoni;+
7 Salomoni abala Robhoamu;+Robhoamu abala Abhiya;Abhiya abala Aza;+
8 Aza abala Yosafate;+Yosafate abala Yoramu;+Yoramu abala Uziya;
9 Uziya abala Yotamu;+Yotamu abala Ahazi;+Ahazi abala Ezekiya;+
10 Ezekiya abala Manase;+Manase abala Amoni;+Amoni abala Yosiya;+
11 Yosiya+ abala Yekoniya+ na abale ace mu ndzidzi udaendeswa Ayuda ku Bhabhilonya.+
12 Pikhali iwo ku Bhabhilonya, Yekoniya abala Salatiyeli;Salatiyeli abala Zorobhabhele;+
13 Zorobhabhele abala Abhiyudhi;Abhiyudhi abala Eliyakimu;Eliyakimu abala Azori;
14 Azori abala Zadhoke;Zadhoke abala Akimu;Akimu abala Eliyudhi;
15 Eliyudhi abala Eleazare;Eleazare abala Matani;Matani abala Yakobe;
16 Yakobe abala Zuze mamunace Mariya, Mariya abala Yezu+ anacemerwa Kristu.+
17 Natenepa, madzindza onsene akhali tenepa: Kubulukira Abhrahamu mpaka Dhavidhi akhalipo madzindza 14; kubulukira Dhavidhi mpaka mudaendeswa Ayuda ku Bhabhilonya akhalipo madzindza 14; kubulukira mudaendeswa Ayuda ku Bhabhilonya mpaka kubalwa kwa Kristu akhalipo madzindza 14.
18 Kubalwa kwa Yezu Kristu kwacitika tenepa: Mu ndzidzi ukhabanyirana Mariya na Zuze, mbadzati kumanga banja, Mariya akhala na mimba kubulukira mu mphambvu ya nzimu wakucena.+
19 Mbwenye nakuti Zuze mankhadzi wace* Mariya akhali munthu wakulungama, nee akhafuna kunserusa, natenepa, anyerezera kunsiya mwacibisobiso.+
20 Mbwenye pidamala iye kunyerezera pyenepi, agona, penepo anju wa Yahova* aonekera kuna iye mu ndoto mbampanga: “Zuze mwana wa Dhavidhi, leka gopa kukwata Mariya toera akhale nkazako,* thangwi mimba iri na iye yabulukira mu mphambvu ya nzimu wakucena.+
21 Iye anadzabala mwana wamamuna, iwe unadzampasa dzina yakuti Yezu,*+ thangwi iye anadzapulumusa anthu mʼmadawo awo.”+
22 Mwandimomwene, pyonsene ipi pyacitika toera akwanirisike mafala adalonga Yahova* kubulukira kuna mprofeta wace kuti:
23 “Onani! Mwali anadzakhala na mimba mbabala mwana wamamuna, anthu anadzampasa dzina yakuti Emanuwele.”+ Dzina ineyi isabveka “Mulungu Ali na Ife.”+
24 Buluka penepo, Zuze alamuka ncitulo, acita pidapangwa iye na anju wa Yahova,* mbakwata Mariya toera akhale nkazace.*
25 Mbwenye nee apita naye mʼmabonde mpaka mudabala iye mwana wamamuna;+ penepo Zuze ampasa dzina yakuti Yezu.+
Pidzindikiro Pyapantsi
^ Peno: “ndandanda ya ubalwi.”
^ Peno: “Mesiya; Wakudzodzwa.”
^ Fala na Fala: “mamunace.”
^ MʼMalemba Acigerego Acikristu, dzina ya Mulungu, Yahova, isagumanika mʼmaulendo 237. Apa ndi mbuto yakutoma inagumanika iyo mʼBhibhlya ino. Onani Apendise A5.
^ Fala na Fala: “leka gopa kukwata nkazako Mariya mbuenda naye kunyumba.”
^ Mucihebheri ndi Yoswa. Dzina ineyi isabveka “Yahova Ndi Cipulumuso.”
^ Onani Apendise A5.
^ Onani Apendise A5.
^ Fala na Fala: “akwata nkazace mbaenda naye kunyumba.”
