Misangani 30:1-33
30 Mafala a Aguri mwana wa Yake. Mphangwa zakufunika zidalonga iye kuna Itiyeli; kuna Itiyeli na Ukale.
2 Ndine munthu wakukhonda kudziwa pinthu kupiringana anthu onsene,+Pontho nee ndiri na luso yakubvesesa, yakuti munthu asafunika kukhala nayo.
3 Ine nee ndapfundza pya udziwisi,Pontho nee ndiri na cidziwiso ca Wakucena Kakamwe.
4 Mbani adakwira kudzulu, buluka penepo mbatcita?+
Mbani adagumanya mphepo mʼmanja mwace?
Mbani adambulunganya madzi mu nguwo yace?+
Mbani adakhazikisa madire a dziko yapantsi?+
Ndi ipi dzina yace na ya mwanace? Longa khala usaidziwa.
5 Mafala onsene a Mulungu ndi akucena.+
Iye ndi xango kuna ale anathawira kuna iye.+
6 Leka kuthimizira cinthu pa mafalace,+Gopa iye anakusandika,Mbapioneka pakweca kuti ndiwe nyauthambi.
7 Ine ndisaphemba pinthu piwiri kuna imwe.
Ndisafuna pinthu pyenepi basi mu umaso wanga.
8 Bulusani muna ine kunyengeza na uthambi.+
Lekani kundipasa utcerengi nee mpfuma.
Basi ene ndipaseni cakudya cakukwana,+
9 Gopa ndingakhuta, ndinakukhondani, mbandilonga: “Mbani Yahova?”+
Pontho ndikhonde kukhala ntcerengi, gopa ndinaba mbandipswipisa dzina yanu Mulungu wanga.
10 Leka kulonga mwakuipa ntumiki pamaso pa mbuyace,Gopa iye anakupasa dzedze, mbuoniwa kuti uli na mulando.+
11 Alipo anthu anapasa dzedze pai wawo,Mbakhonda kulemedza mai wawo.+
12 Alipo anthu ananyerezera okhene kuti ndi akucena,+Mbwenye iwo nee aceneswa ku makhaliro awo akunyanyasa.
13 Alipo anthu akuti ndi akudzikuza kakamwe,Akuti asayangʼana andzawo mwakupwaza kakamwe!+
14 Alipo anthu akuti mano awo ndi ninga masupada,Pontho ntsaya zawo ndi ninga mipeni;Iwo asafudza anthu akupwazika pa dziko yapantsi,Pontho asafudza anyakutcerenga pakati pa anthu.+
15 Misundu* iri na ana awiri akazi akuti asakhuwa: “Ndipase! Ndipase!”
Pana pinthu pitatu pyakuti nkhabe khuta,Pinthu pinai pyakuti cipo pisalonga: “Ndakwana!”
16 Nthumbi*+ na nkazi wakukhonda bala,Dziko yakusowa madzi,Na moto wakuti cipo usalonga: “Ndakwana!”
17 Munthu anasingirira pai wace, mbakhonda kubvera mai wace,+Maso ace anadzabuluswa na makhungubwe a nʼgowa,Pontho anadzadyiwa na ana a capungu.+
18 Pana pinthu pitatu pyakuti pisandinentsa kupibvesesa,Pinthu pinai pyakuti ine nkhabe kupibvesesa:
19 Njira ya capungu kudzulu,Njira ya nyoka pamwala,Njira ya bote mʼbara,Na njira ya mamuna angakhala pabodzi na ntsikana.
20 Ipi ndi pinacita nkazi waupombo:
Iye asadya, asapukuta mulomo,Mbalonga: “Nee ndacita cinthu cakuipa.”+
21 Pana pinthu pitatu pinatekenyesa dziko,Pinthu pinai pyakuti anthu nkhabe kwanisa kupipirira:
22 Bitcu angakhala mambo,+Dzemwa angakhuta mwakupiringana midida,
23 Nkazi wakukhonda funiwa angasembwa,Na nyabasa wankazi anakwata banja ya mbuyace wankazi.+
24 Pana pinyama pinai pyakuti ndi pingʼono kakamwe pa dziko yapantsi,Mbwenye ipyo piri na udziwisi wakubalwa nawo:+
25 Nyerere nee ndi pinyama pyamphambvu,Ngakhale tenepo, zisagumanya cakudya cawo mʼmalimwe.+
26 Prokaviya*+ nee ndi pinyama pyamphambvu,Mbwenye pisamanga nyumba zawo mʼmiyala mikulu.+
27 Nthete+ nkhabe mambo,Mbwenye izo zisamburuka mʼmikumbi.+
28 Nyankalibunyu+ asakwanisa kufamba pa pfufu mbakhonda kugwa,Iye asapita nʼnyumba ya mambo.
29 Pana pinthu pitatu pyakuti pisafamba mwakudzumatirisa,Pinai pyakuti pisadzumatirisa pingafamba:
30 Nkhalamu, yakuti ndi yamphambvu kupiringana pinyama pinango,Iyo nkhabe kugopa munthu mbibwerera nduli;+
31 Mwanambwa, bokho;Na mambo anaperekerwa na anyankhondo ace.
32 Khala wapangiza udzemwa mbukuzika wekhene,+Peno khala wanyerezera kucita pyenepi,Funga mulomo wako, mbumatama pyako.*+
33 Thangwi ninga nkaka ungabvundulwa usabwera mantega,Pontho mphuno ingapfinywa isabuluka ciropa,Munjira ibodzi ene, kupangiza ukali kusatomesa nthonga.+
Pidzindikiro Pyapantsi
^ Peno: “Usundu; Midundu.”
^ Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
^ Prokaviya ndi cinyama cidalandana na sulo cakuti cisakhala mʼmphako za miyala.
^ Fala na Fala: “Ikha manja ako pamulomo pako.”
