Yoswa 18:1-28
18 Buluka penepo, mbumba yonsene ya Izraeli yagumanyikana ku Silo,+ mbimanga nsasa toera kusonkhana kweneko,+ thangwi iwo akhadamala kukunda dziko.+
2 Mbwenye pakhali madzindza manomwe a Aizraeli akuti akhadzati kupaswa unthaka wawo.
3 Natenepa, Yoswa abvundza Aizraeli: “Munadikhira mpaka lini toera muende kakhala mu dziko idakupasani Yahova Mulungu wa ambuyanu?+
4 Mu dzindza ibodzi na ibodzi, sankhulani amuna atatu toera ndiatume; iwo asafunika kuenda kaona dziko yonsene, mbalemba kuti dziko ineyi iri tani mwakubverana na khundu inafuna kutambira dzindza ibodzi na ibodzi. Buluka penepo iwo asafunika kubwerera kuna ine.
5 Iwo asafunika kugawa dziko ineyi mʼmakhundu manomwe.+ Dzindza ya Yuda inapitiriza kukhala kukhundu yakunterero,+ pontho madzindza a Zuze anapitiriza kukhala kukhundu yakunkwiriro.+
6 Ndokoni mukalembe kuti dziko iri tani, mbamuigawa mʼmakhundu manomwe. Mungamala, ndibweresereni makhundu adalemba imwe. Ine ndinadzakucitirani pidzindikiro+ pamaso pa Yahova Mulungu wathu.
7 Mbwenye Alevi nee ali na khundu inafuna kupaswa iwo,+ thangwi unthaka wawo ndi kutumikira ninga anyantsembe a Yahova;+ dzindza ya Gadhi, ya Rubheni na hafu ya dzindza ya Manase,+ atambira kale unthaka wawo udapaswa iwo na Mose ntumiki wa Yahova kumabulukiro a dzuwa a Yordani.”
8 Natenepa amuna akhafuna kuenda kalemba kuti dziko iri tani, akhunganyika toera kuenda, pontho Yoswa aapanga: “Ndokoni mukaone dziko yonsene mbamulemba kuti dziko ineyi iri tani. Mungamala, bwererani kuna ine. Ine ndinadzakucitirani pidzindikiro pamaso pa Yahova kuno ku Silo.”+
9 Penepo amuna aenda kaona dziko yonsene, mbalemba kuti dziko ineyi iri tani. Iwo aigawa mʼmakhundu manomwe mwakubverana na mizinda yace, mbalemba mʼbukhu. Pidamala iwo abwerera kuna Yoswa ku nsasa wa ku Silo.
10 Buluka penepo, Yoswa aacitira pidzindikiro pamaso pa Yahova+ ku Silo. Kweneko, Yoswa apereka dziko kuna Aizraeli mwakubverana na khundu idapaswa dzindza ibodzi na ibodzi.+
11 Cidzindikiro cakutoma cagwa kuna dzindza ya Bhenjamini mwakubverana na mabanja awo, pontho khundu idapaswa iwo ikhali pakati, uku cisa ca Yuda,+ uku cisa ca Zuze.+
12 Kukhundu yakunkwiriro, madire awo atomera ku Yordani mbaenda mpaka ku materero a Yeriko,+ kunkwiriro. Madire anewa apita na padzulu paphiri kumadokero a dzuwa, mbafika mpaka kuthando ya Bheti-Aveni.+
13 Madire anewa apitiriza bulukira ku Luzi pa materero a kunkwiriro kwa Luzi, kwakuti ndi ku Bheteli;+ madire atcitira mpaka ku Ataroti-Adhari+ paphiri yakunterero kwa Bheti-Oroni wa Kunterero.+
14 Madire anewa apitiriza na kukhundu yakumadokero a dzuwa, mbazungunuka kuenda kunterero bulukira paphiri yakuti iri dhuzi na Bheti-Oroni; iwo adhromera ku Kiriyati-Bhaale, kwakuti ndi ku Kiriyati-Jearimu+ nzinda wa Yuda. Anewa akhali madire a cisa ca Bhenjamini kukhundu yakumadokero a dzuwa.
15 Madire a kunterero akhatomera kunkhomo kwa Kiriyati-Jearimu, iwo apitiriza na kumabulukiro a dzuwa, mbaenda mpaka ku mphuno za madzi a Nefitowa.+
16 Madire anewa atcitira mpaka kunkhomo kwa phiri yakuti iri dhuzi na Gowa ya Mwana wa Inoni,+ yakuti iri kunkwiriro kwa Gowa ya Refaimu,+ pontho atcitira ku Gowa ya Inoni, apita na ku materero a Ayebusi+ kunterero, mbatcitira mpaka ku Eni-Rojeli.+
17 Madire apitiriza na kunkwiriro mbaenda mpaka ku Eni-Semesi, buluka penepo abuluka ku Jeliloti, kwakuti ndi kutsogolo kwa nthunda ya Adhumi,+ pontho atcitira mpaka ku mwala+ wa Bhoani+ mwana wa Rubheni.
18 Apitiriza na ku materero a kunkwiriro kutsogolo kwa Arabha, mbatcitira mpaka ku Arabha.
19 Madire anewa apitiriza mpaka ku materero a kunkwiriro kwa Bheti-Ogla,+ mbadhroma kunkwiriro kwa gombe ya Bara ya Munyu*+ kunkhomo yakunterero kwa Yordani. Anewa akhali madire a kunterero.
20 Yordani akhali madire awo a kukhundu yakumabulukiro a dzuwa. Unoyu ukhali unthaka wa dzindza ya Bhenjamini mwakubverana na mabanja awo, kuphatanizambo madire awo mʼmakhundu onsene.
21 Mizinda ya dzindza ya Bhenjamini mwakubverana na mabanja awo ikhali: Yeriko, Bheti-Ogla, Emeki-Kezizi,
22 Bheti-Arabha,+ Zemaraimu, Bheteli,+
23 Avimu, Para, Ofra,
24 Kefari-Amoni, Ofini na Jebha.+ Mizinda 12 na midzi yace.
25 Jibheyoni,+ Rama, Bheroti,
26 Mispe, Kefira, Moza,
27 Rekemu, Iripeli, Tarala,
28 Zela,+ Aelefi, Yebuse, wakuti ndi Yerusalemu,+ Jibheya+ na Kiriyati. Mizinda 14 na midzi yace.
Unoyu ukhali unthaka wa dzindza ya Bhenjamini mwakubverana na mabanja awo.
Pidzindikiro Pyapantsi
^ Ineyi ndi Bara Yakufa.
