Yoswa 4:1-24
-
Miyala toera ikhale cidzindikiro (1-24)
4 Mbumba yonsene pidamala iyo kwene kuwambuka nkulo wa Yordani, Yahova apanga Yoswa:
2 “Sankhula amuna 12 pakati pa mbumba, mu dzindza ibodzi, mamuna mʼbodzi;+
3 pontho apange ntemo uyu: ‘Ndokoni pakati pa nkulo wa Yordani, pa mbuto idalimira anyantsembe,+ mukwate miyala 12, muende nayo pa mbuto inafuna kugona imwe masiku ano.’”+
4 Natenepa, Yoswa acemera amuna 12 adasankhula iye pakati pa Aizraeli, mu dzindza ibodzi, mamuna mʼbodzi;
5 pontho Yoswa aapanga: “Ndokoni pakati pa nkulo wa Yordani, kutsogolo kwa Bokosi ya Yahova Mulungu wanu. Mʼbodzi na mʼbodzi wa imwe athukule mwala ubodzi paphewa pace mwakubverana na numero ya madzindza a Izraeli,
6 toera ikhale ninga cidzindikiro kuna imwe. Ntsogolo, ananu angakubvundzani kuti: ‘Thangwi yanji miyala iyi iri pano?’+
7 Imwe musafunika kuatawira tenepa: ‘Miyala iyi ndi cidzindikiro* cakwenda na kwenda kuna Aizraeli,+ thangwi madzi a mu nkulo wa Yordani agawika patsogolo pa bokosi+ ya cibverano ca Yahova, mu ndzidzi udathukulwa iyo toera kuwambuka nkulo wa Yordani.’”
8 Natenepa, Aizraeli acita mwakubverana na pidapangwa iwo na Yoswa. Iwo aenda pakati pa nkulo wa Yordani, mbakwata miyala 12, mwakubverana na numero ya madzindza a Izraeli, ninga pidalonga Yahova kuna Yoswa. Iwo aikwata mbaenda kaiikha pa mbuto idagona iwo namasiku.
9 Yoswa aikhambo miyala 12 pakati pa nkulo wa Yordani, pa mbuto idalimira anyantsembe adathukula bokosi ya cibverano,+ pontho miyala ineyi iri penepo mpaka lero.
10 Anyantsembe adathukula Bokosi apitiriza dzololo pakati pa nkulo wa Yordani mpaka pidamala kucitwa pinthu pyonsene pidalonga Yahova kuna Yoswa toera apange mbumba, mwakubverana na pyonsene pidalonga Mose kuna Yoswa. Mu ndzidzi ukhacitwa pyenepi, mbumba ikhawambuka mwakucimbiza.
11 Mbumba yonsene pidamala iyo kwene kuwambuka, anyantsembe adathukula Bokosi ya Yahova awambukambo mbumba yonsene mbikaona.+
12 Dzindza ya Rubheni, ya Gadhi na hafu ya dzindza ya Manase awambuka patsogolo pa Aizraeli ninga nsoka wa anyankhondo,+ mwakubverana na pidaapanga Mose.+
13 Amuna cifupi na 40.000 akuti akhali na pida pya nkhondo, awambuka pamaso pa Yahova mbaenda kuthando ya Yeriko.
14 Pa ntsiku ineyi, Yahova akuza Yoswa pamaso pa Aizraeli onsene,+ pontho iwo akhamulemedza kakamwe mu umaso wace onsene, ninga pikhalemedza iwo Mose.+
15 Buluka penepo, Yahova apanga Yoswa:
16 “Panga anyantsembe adathukula bokosi+ ya Umboni* toera abuluke mu nkulo wa Yordani.”
17 Natenepa, Yoswa apanga anyantsembe: “Bulukani mu nkulo wa Yordani.”
18 Anyantsembe akhathukula bokosi+ ya cibverano ca Yahova pidabuluka iwo pakati pa nkulo wa Yordani, miyendo yawo mbiponda mataka akuuma, madzi a nkulo wa Yordani atoma pontho kufamba, mbatayikira+ mʼmakhundu onsene ninga pakutoma.
19 Mbumba yawambuka nkulo wa Yordani pa ntsiku khumi ya mwezi wakutoma, mbimanga misasa ku Jiligale,+ madire a kumabulukiro a dzuwa a Yeriko.
20 Mbwenye miyala 12 idakwata iwo mu nkulo wa Yordani, Yoswa aiikha ku Jiligale.+
21 Natenepa, iye apanga Aizraeli: “Ntsogolo, ana angabvundza anyakubalawo kuti: ‘Kodi miyala iyi isabvekanji?’+
22 Imwe munadzaatawira: ‘Aizraeli awambuka Yordani mbakaponda mataka akuuma.+
23 Pyenepi pyacitika mu ndzidzi udaumisa Yahova Mulungu wanu madzi a mu nkulo wa Yordani pamaso pawo mpaka onsene kuwambuka, pyacitika sawasawa ninga pidacita Yahova Mulungu wanu pa Bara Yakufuira pidaumisa iye madzi pamaso pathu mpaka ife tonsene kuwambuka.+
24 Natenepa, iye acita pyenepi toera anthu onsene pa dziko yapantsi adziwe kuti djanja ya Yahova ndi yamphambvu kakamwe,+ pontho toera ndzidzi onsene mugope Yahova Mulungu wanu.’”
Pidzindikiro Pyapantsi
^ Peno: “cikumbuso.”
^ Ineyi ndi bokosi ya cibverano. Onani Mabvekero a Mafala Anango.
