Yoswa 5:1-15
5 Amambo onsene a Aamori+ akakhala kumadokero a dzuwa a Yordani na amambo onsene a Akanani+ akakhala dhuzi na bara pidabva iwo kuti Yahova aumisa madzi a nkulo wa Yordani Aizraeli onsene mbamala kuwambuka, mʼmimba mwawo mwanyunguluka*+ mbasowa cipapo thangwi yakugopa Aizraeli.+
2 Pa ndzidzi unoyu Yahova apanga Yoswa: “Sasanya mipeni ya miyala toera usidze+ pontho amuna a Izraeli, kaciwiri.”
3 Natenepa, Yoswa asasanya mipeni ya miyala mbasidza amuna a Izraeli paphiri ya Jibheati-Araloti.+
4 Yoswa asidza Aizraeli anewa thangwi amuna onsene adabuluka ku Ejitu, amuna akuthema toera kuenda kunkhondo,* akhadamala kufa nʼthando paulendo wakubuluka ku Ejitu.+
5 Anthu onsene adabuluka ku Ejitu akhali akusidzwa, mbwenye anthu onsene adabalwa nʼthando paulendo wakubuluka ku Ejitu, nee akhadasidzwa.
6 Aizraeli afamba pyaka 40,+ mpaka kufa kwa amuna onsene akuthema kuenda kunkhondo adabuluka ku Ejitu, akuti nee abvera mafala a Yahova.+ Yahova akhadapikira kuna iwo kuti nee mbadaatawirisa kuona dziko+ idapikira Yahova kuna ambuyathu toera kutipasa,+ dziko ya nkaka na uci.+
7 Natenepa iye atawirisa anawo kupita mu dziko ineyi mʼmbuto mwa iwo.+ Yoswa asidza amuna anewa, thangwi iwo nee akhadasidzwa mu ndzidzi ukhacita iwo ulendo.
8 Pidamala amuna onsene kusidzwa, iwo apitiriza mʼmisasa yawo mpaka kupola kwa pironda.
9 Buluka penepo Yahova apanga Yoswa: “Lero ndamalisa kupwazwa kwanu na Aejitu.” Na thangwi ineyi, mbuto ineyi isacemerwa Jiligale*+ mpaka lero.
10 Aizraeli apitiriza kukhala ku Jiligale, nʼthando ya Yeriko. Pontho iwo acita Paskwa ncidodo pa ntsiku 14 ya mwezi+ wakutoma.
11 Mangwana mwace, iwo atoma kudya pinthu pidalimwa mu dziko ineyi, kuphatanizambo mikate yakusowa pyakutupisa+ na tirigu yakukazinga.
12 Kutomera ntsiku idatoma iwo kudya pinthu pidalimwa mu dziko ineyi, mana nee akhaonekabve; Aizraeli nee akhalibve na mana,+ mbwenye caka ceneci+ iwo atoma kudya pinthu pya mu dziko ya Kanani.
13 Pikhali Yoswa dhuzi na Yeriko, aona mamuna+ adalimira kutsogolo kwace na supada mʼmanja mwace.+ Yoswa anfendedzera dhuzi mbambvundza: “Kodi uli kukhundu yathu peno kukhundu ya anyamalwa athu?”
14 Penepo iye atawira: “Nkhabe, ine ndiri pano ninga nkulu* wa anyankhondo a Yahova.”+ Pidabva iye pyenepi Yoswa agodama, pontho akotamisa nsolo wace mpaka pantsi, mbambvundza: “Mbuyanga, ninji piri na imwe toera kupanga ntumiki wanu?”
15 Nkulu wa anyankhondo a Yahova atawira Yoswa: “Dula masandalya ako, thangwi mbuto idalimira iwe ndi yakucena.” Penepo pene Yoswa adula masandalya ace.+
Pidzindikiro Pyapantsi
^ Fala na Fala: “mitima yawo yanyunguluka.”
^ Peno: “amuna akuti akhali na thunga ya kuenda kunkhondo.”
^ Dzina ineyi isabveka “Kubulumundisa; Kubulumundisira Kutali.”
^ Peno: “ntsogoleri.”
