YANG’ANANI Kayini na Abeli cincino. Onsene akula. Kayini adzakhala mulimi. Iye asalima mbeu, misapo na masamba.

Abeli adzakhala nkumbizi wa mabira. Iye akomerwa na kutsalakana ana a mabira. Anewa akula mbakhala mabira makulu, na m’nzidzi wakucepa Abeli akhala na nkumbi wa mabira towera kuwatsalakana.

Ntsiku inango Kayini na Abeli apereka muoni kwa Mulungu. Kayini apereka pyakudya pidalima iye. Mbwenye Abeli apereka bira yadidi kakamwe ikhali na iye. Yahova akomerwa na Abeli na muoni wace. Mbwenye hadakomerwa tayu na Kayini na muoni wace. Kodi musadziwa thangwi yanji?

Si thangwi yakuti muoni wa Abeli ukhali wadidi kupiringana wa Kayini basi tayu. Ndi thangwi yakuti Abeli akhali munthu wadidi. Akhafuna Yahova na mbale yace. Mbwenye Kayini akhali wakuipa; iye nee akhafuna mbale yace tayu.

Natenepa, Mulungu apanga Kayini kuti akhafunika kucinja makhaliro ace. Mbwenye Kayini hadabvesera tayu. Iye aipirwa kakamwe thangwi Mulungu akafuna kakamwe Abeli kupiringana iye. Natenepa Kayini apanga Abeli, ‘Tende kumunda.’ Mukakhala iwo kweneko okhene, Kayini amenya mbale yace Abeli. Ammenya kakamwe mpaka kumupha. Kodi si cakugopswa ceneci cidacita Kayini tayu?

Maseze Abeli afa, Mulungu ali kumkumbuka basi. Abeli akhali wadidi, na Yahova nkhabe duwala munthu watenepa tayu. Na thangwi ineyi, ntsiku yace Yahova Mulungu anadzabweresa pontho Abeli ku umaso. M’nzidzi unoyu Abeli nee anadzafunika kufa pontho. Anadzakwanisa kukhala na umaso pano pa dziko yapantsi kwenda na kwenda. Kodi nee pinadzakhala pyadidi kudziwa anthu ninga Abeli?

Mbwenye Mulungu nkhabe komerwa na anthu ninga Kayini. Na thangwi ineyi, pakumala Kayini kupha mbale yace, Mulungu amulanga m’kunthamangisa kutali na acibale ace. Mudaenda Kayini kakhala ku khundu inango ya dziko yapantsi, akwata mwanankazi yace mbodzi, unoyu adzakhala nkazace.

M’kupita kwa nzidzi Kayini na nkazace atoma kubala ana. Ana anango amuna na akazi a Adamu na Yeva akwatirana, iwombo abala ana. Mwakukhonda dembuka pa dziko yapantsi pakhala anthu azinji. Tendeni tipfundze pya anango a iwo.