Akulu a anyantsembe akwata Yezu mbaenda naye ku nyumba ya Pilato. Buluka penepo, Pilato abvundza: ‘Adawanji munthu uyu?’ Iwo alonga: ‘Iye asalonga kuti ndi mambo!’ Pilato abvundza Yezu: “Ndiwe Mambo wa Ayuda?” Yezu atawira: “Umambo wanga si wa pantsi pano tayu.”

Buluka penepo, Pilato atumiza Yezu kuna Herodhi, mambo wa Galileya toera kuona khala Yezu ali na mulando. Herodhi nee aona cinthu cakuipa kuna Yezu, na thangwi ineyi atumiza pontho Yezu kuna Pilato. Pilato apanga mbumba: ‘Ine na Herodhi nee taona mulando kuna mamuna unoyu, na thangwi ineyi ndinansudzula pyanga.’ Mbumba yakhuwa: ‘M’pheni! M’pheni!’ Anyankhondo amenya Yezu na ntcamu, amphulira mata mbam’menya. Iwo amuikha nkhata ya minga mu nsolo mwace mbansingirira mukulonga: ‘Uli tani, Mambo wa Ayuda.’ Pilato apanga pontho mbumba: ‘Nee ndagumana cinthu cakuipa thangwi ya munthu uyu.’ Mbwenye iwo akhuwa: ‘Mbaphiwe pamuti!’ Buluka penepo, Pilato apereka Yezu toera aphiwe.

Mbumba yakwata Yezu mbaenda naye ku mbuto inacemerwa Golgota. Iwo ankhomera pamuti mbaulamusa. Yezu aphembera: ‘Baba, alekerereni thangwi nee asadziwa pinacita iwo.’ Mbumba ikhapitiriza kusingirira Yezu, mbilonga: ‘Khala ndiwe Mwana wa Mulungu, tcita pamuti! Pulumusika wekha.’

M’bodzi wa mapanga akhadakhomerwa dhuzi na Yezu alonga: ‘Yezu, undikumbukirembo ungapita mu Umambo wako.’ Yezu antawira: ‘Unadzakhala na ine mu Paraizu.’ Pa ndzidzi wakumaulo, kudambo kwapswipa mu midzidzi mitatu. Anyakupfundza angasi a Yezu akhali dzololo cifupi na muti, kuphatanizambo Mariya mai wa Yezu. Yezu apanga Juwau toera atsalakane Mariya ninga mai wace.

Pakumalisa Yezu alonga: ‘Pyonsene pyamala!’ Yezu akotamisa nsolo wace mbafa. Pa ndzidzi unoyu, pacitika citeketeke camphambvu. Nguwo ya mu templo ikhagwanda mbuto Yakucena na  Yakucena Kakamwe yapanduka kati nakati. M’bodzi mwa anyankhondo alonga: ‘Mwandimomwene, uyu akhali Mwana wa Mulungu.’