Mukupita kwa ndzidzi, Aisraeli asiya kulambira Yahova mbatoma kulambira alungu authambi. Mu pyaka pinomwe, Amidhiani aba pinyama pya Aisraeli mbafudza maminda awo. Toera kukhonda kuthabuswa na Amidhiani, Aisraeli akhabisala mu mphako na m’mapiri. Iwo aphemba kuna Yahova toera aatsidzikize. Natenepa, Yahova atuma anju toera kuenda kalonga na m’phale akhacemerwa Gidheoni. Anju alonga: ‘Yahova akusankhula toera ukhale nyankhondo wamphambvu.’ Gidheoni abvundza: ‘Ndinapulumusa tani Aisraeli? Ndine ani ine?’

Gidheoni mbadadziwa tani kuti akhadasankhulwa na Yahova? Iye athasika nguwo ya uweya pantsi mbalonga kuna Yahova: ‘Mangwana namacibese, nguwo iyi ya uweya ingatota na bume, mataka mbakhala akuuma, ndinadzadziwa kuti musafuna ndipulumuse Aisraeli.’ Mudaca kunja, nguwo ya uweya ikhadatota kakamwe mbwenye mataka akhali akuuma! Buluka penepo, Gidheoni aphemba kuti mangwana mwace namacibese, nguwo ya uweya ikhale yakuuma mbwenye mataka atote na bume. Mudacitika pyenepi, Gidheoni akhala na cinyindiro cakuti akhadasankhulwa na Yahova. Iye agumanyiza anyankhondo ace toera kumenyana na Amidhiani.

 Yahova apanga Gidheoni: ‘Ndinaphedza Aisraeli toera akunde Amidhiani. Mbwenye nakuti uli na anyankhondo azinji, panango munadzanyerezera kuti mwaakunda na mphambvu zanu. Panga onsene anagopa toera abwerere kunyumba.’ Natenepa, anyankhondo 22.000 abwerera, mbasala anyankhondo 10.000. Buluka penepo Yahova alonga: ‘Uciri na anyankhondo azinji. Ndoko nawo ku nkulo, mbuapanga toera amwe madzi. Basi ene sankhula ale anamwa madzi mbakaonera anyamalwa awo.’ Amuna akukwana 300 ndiwo basi adakhala akucenjera mu ndzidzi ukhamwa iwo madzi. Yahova apikira kuti amuna anewa akucepa mbadakwanisa kukunda anyankhondo Amidhiani akukwana 135.000.

Masiku anewa, Yahova apanga Gidheoni: ‘Uno ndi ndzidzi toera kumenyana na Amidhiani!’ Gidheoni apasa anyankhondo ace nyanga na nyale zikhali nkati mwa nkhali. Iye aapanga: ‘Ndiyang’aneni, pontho citani pinacita ine.’ Gidheoni aliza nyanga, aswa nkhali, alamusa nyale mbakhuwa: ‘Supada ya Yahova na ya Gidheoni!’ Anyankhondo ace 300 acitambo pibodzi pyene. Amidhiani agopa kakamwe mbabalalika. Nakuti akhali akudzudzumika, iwo atoma kuphana okha-okha. Yahova aphedza pontho Aisraeli kukunda anyamalwa awo.