1. Ndi phembero ipi yakudziwika inafuna ife kudinga cincino?

ANTHU azinji asadziwa phembero yakudziwika inacemerwa Baba Wathu, peno Phembero ya Mbuya. Yezu aphatisira phembero ineyi toera kupfundzisa anyakupfundzace kucita phembero. Thangwi yanji iye acita phembero ineyi? Thangwi yanji phembero ineyi ndi yakufunika kakamwe kwa ife lero?

2. Ndi pinthu pipi pitatu pyakufunika kakamwe pidatipfundzisa Yezu toera kuphemba?

² Yezu alonga: ‘Imwe longani maphembero tenepa: Baba wathu muli kudzulu, dzina yanu mbiceneswe [peno kuicitisa kukhala yakucena]. Umambo wanu mbudze kuna ife. Pinafuna imwe mbapicitwe pantsi pano ninga kudzulu.’ (Lerini Mateo 6:9-13.) Thangwi yanji Yezu atipfundzisa toera kuphemba pinthu pyenepi pitatu?—Onani Cidzindikiro cakumalisa 20.

3. Ninji pinafuna ife kudziwa thangwi ya Umambo wa Mulungu?

³ Tapfundza kuti dzina ya Mulungu ndi Yahova. Pontho tadinga cifuniro ca Mulungu kuna anthu na dziko yapantsi. Mphapo, Yezu akhafuna kubvekesanji mudalonga iye: ‘Umambo wanu mbudze’? Tinadzapfundza kuti Umambo wa Mulungu ninji, unadzacitanji, pontho unadzacenesa tani dzina ya Mulungu.

4. Umambo wa Mulungu ninji, pontho mbani mambo wace?

⁴ Yahova akhazikisa utongi kudzulu mbasankhula Yezu toera kukhala Mambo wa utongi unoyu. Bhibhlya isacemera utongi unoyu Umambo wa Mulungu. Yezu ndi “Mambo wa amambo onsene na Mbuya wa ambuya onsene.” (1 Timoti 6:15) Yezu ali na luso yakucita pinthu  pyadidi kupiringana utongi wa anthu, pontho iye ali na mphambvu kakamwe yakupiringana atongi onsene a anthu.

5. Umambo wa Mulungu unadzatonga kubulukira kupi? Iwo unadzatonganji?

⁵ Pidamala ntsiku zinai kubulukira ntsiku idalamuswa iye, Yezu abwerera kudzulu. Mukupita kwa ndzidzi, Yahova ankhazikisa ninga Mambo wa Umambo. (Machitiro 2:33) Utongi wa Mulungu unadzatonga dziko yonsene yapantsi kubulukira kudzulu. (Apokalipse 11:15) Ndi thangwi yace Bhibhlya isaucemera Umambo wa Mulungu kuti ‘Umambo wakudzulu.’​—2 Timoti 4:18.

6, 7. Ninji cinacitisa Yezu kukhala Mambo wadidi kakamwe kupiringana anthu?

⁶ Bhibhlya isalonga kuti Yezu ndi nkulu kupiringana amambo onsene a anthu thangwi iye ndi ‘wakukhala na umaso wakukhonda mala.’ (1 Timoti 6:16) Atongi onsene a anthu mukupita kwa ndzidzi asafa, mbwenye Yezu cipo anafa. Pinthu pyonsene pyadidi pinafuna kuticitira Yezu pinakhala kwenda na kwenda.

⁷ Profesiya ya Bhibhlya isalonga kuti Yezu anadzakhala Mambo wadidi na wantsisi: ‘Nzimu wa Yahova uli na iye, nzimu waudziwisi na wakubvesesa, nzimu wa uphungu na mphambvu zikulu, nzimu wakugopa Yahova. Iye anakomerwa na kugopa Yahova. Iye nkhabe kudzatonga miseru mwakubverana na pinaona iye na maso ace, nkhabe kutonga thangwi ya pinabva iye na makutu ace. Iye anadzatonga anyakutcerenga mwakulungama.’ (Izaiya 11:2-4) Kodi musafuna kukhala na mambo ninga unoyu?

8. Tisadziwa tani kuti Yezu nee anadzatonga ekha?

⁸ Mulungu asankhula anthu anango toera kutonga pabodzi na Yezu mu utongi wakudzulu. Mwacitsandzo, mpostolo Paulu apanga Timoti: ‘Tingapirira mpaka  kunkhomo, tinadzatongambo anthu onsene pabodzi na iye.’ (2 Timoti 2:12) Ndi anthu angasi anafuna kudzatonga ninga amambo pabodzi na Yezu?

9. Kodi ndi anthu angasi anadzatonga na Yezu? Kodi Mulungu atoma lini kuasankhula?

⁹ Ninga tapfundza mu Nsolo 7, mpostolo Jwau aoneswa masomphenya mbaona Yezu ninga Mambo kudzulu pabodzi na amambo anango 144.000. Anthu anewa akukwana 144.000 mbani? Jwau afokotoza kuti iwo ana ‘dzina yace [Yezu] na dzinambo ya Babace, adalembiwa pa nkhope pawo.’ Pontho asathimiza: ‘Ndi ale anatowera Mwanabira konsene kunaenda iye. Iwo agulwa pakati pa anthu.’ (Lerini Apokalipse 14:1, 4.) Anthu akukwana 144.000 ndi Akristu akukhulupirika akuti Mulungu aasankhula toera ‘kutonga pantsi pano’ pabodzi na Yezu. Mu ndzidzi unafa iwo, iwo asalamuswa toera kukhala maso kudzulu. (Apokalipse 5:10) Kubulukira mu ntsiku za apostolo, Yahova asasankhula Akristu akukhulupirika toera kucita khundu ya nsoka unoyu wa amambo akukwana 144.000.

10. Thangwi yanji ndi ufuni wa Yahova kusankhula Yezu pabodzi na 144.000 toera kutonga anthu?

¹⁰ Yahova asatitsalakana kakamwe thangwi iye asankhula anthu pa dziko yapantsi toera kutonga pabodzi na Yezu. Yezu anadzakhala ntongi wadidi thangwi iye asatidziwa mwadidi. Iye asadziwa kuti ninji kukhala munthu waunyama na kunentseka. Paulu alonga kuti Yezu ali na mabvero ninga athu, iye anakwanisa ‘kubvera ntsisi kufewa kwathu’ pontho iye ‘ayeserwa mu pyonsene sawasawa ninga ife pano.’ (Ahebhere 4:15; 5:8) Anthu akukwana 144.000 asadziwambo kuti kukhala munthu waunyama kusabvekanji. Iwo athimbanambo na kusowa ungwiro na mautenda. Tinakwanisa kukhala na cinyindiro cakuti Yezu na anthu akukwana 144.000 anadzabvesesa mabvero athu na nyatwa zinatamba ife.

11. Thangwi yanji Yezu apfundzisa anyakupfundzace toera kuphembera kuti cifuniro ca Mulungu cicitwe kudzulu?

¹¹ Yezu apfundzisa anyakupfundzace toera kuphembera kuti cifuniro ca Mulungu cicitwe kudzulu. Thangwi yanji? Mu Nsolo 3 tapfundza kuti Sathani Dyabo akhonda bvera Yahova. Pidakhonda Sathani kubvera Mulungu, Yahova atawirisa Sathani pabodzi na aanju ace akukhonda khulupirika, peno mademonyo, toera kukhala kudzulu mu ndzidzi wakucepa. Natenepa, si onsene tayu akuti akhacita cifuno ca Mulungu kudzulu. Mu Nsolo 10, tinadzapfundza pizinji thangwi ya Sathani na mademonyo.

12. Ndi pyakucitika pipi piwiri pinafokotozwa pa Apokalipse 12:10?

¹² Bhibhlya isafokotoza kuti mwakukhonda dembuka Yezu akhazikiswa ninga Mambo wa Umambo wa Mulungu, iye akhafunika kumenya nkhondo na Sathani. (Lerini Apokalipse 12:7-10.) Vesi 10 isalonga pyakucitika piwiri pyakufunika kakamwe. Umambo wa Mulungu watoma kutonga kubulukira m’manja mwa Yezu Kristu ninga Mambo, pontho Sathani aponywa pa dziko yapantsi. Ninga tinadzapfundza, pyenepi pyacitika kale.

13. Ninji pidacitika kudzulu mu ndzidzi udathamangiswa Sathani?

¹³ Bhibhlya isalonga pya kukomerwa kwa aanju akukhulupirika pidathamangiswa Sathani na mademonyo ace kudzulu. Tisaleri: ‘Mphapo, komerwani, imwe a kudzulu na imwe monsene munakhalako!’ (Apokalipse 12:12) Cincino kudzulu kuli na ntendere na kubverana thangwi onsene kweneko asacita cifuno ca Mulungu.

14. Ninji pinacitika pa dziko yapantsi thangwi ya kuponywa kwa Sathani kubuluka kudzulu?

¹⁴ Mbwenye umaso pa dziko yapantsi ndi wakusiyana kakamwe. Pinthu pyakugopswa pisacitika kuna anthu ‘thangwi Dyabo atcita,’ pontho iye ali na ‘ukali  wakugopswa, mbadziwa kuti ndzidzi wace ndi wakucepa kakamwe.’ (Apokalipse 12:12) Sathani ali wakuipirwa. Iye athamangiswa kudzulu, pontho iye asadziwa kuti anadzafudzwa mwakucimbiza. Iye asacita pyonsene pinakwanisa iye toera kubweresa nyatwa, mautenda na kuthabuka pa dziko yonsene yapantsi.

15. Ndi cipi cifuniro ca Mulungu na dziko yapantsi?

¹⁵ Mbwenye cifuniro ca Mulungu na dziko yapantsi nee cacinja. Iye asapitiriza kufuna anthu aungwiro toera akhale kwenda na kwenda pa dziko yapantsi. (Masalmo 37:29) Mphapo, Umambo wa Mulungu unadzakwanirisa tani pyenepi?

16, 17. Kodi lemba ya Danyele 2:44 isatipanganji thangwi ya Umambo wa Mulungu?

¹⁶ Profesiya inagumanika pa Danyele 2:44 isalonga: ‘Mu ntsiku za amambo anewa, Mulungu wakudzulu anadzaikha umambo wakuti cipo unadzafudzwa. Pontho umambo unoyu nee unadzapaswa anthu anango tayu. Iwo unadzanyedza mbudzamalisa maumambo awa onsene, mbudzakhala kwenda na kwenda.’ Kodi profesiya ineyi isatipfundzisanji thangwi ya Umambo wa Mulungu?

¹⁷ Cakutoma, isatipanga kuti Umambo wa Mulungu mbudatoma kutonga ‘mu ntsiku za amambo anewa.’ Pyenepi pisabveka kuti mautongi anango mbadapitiriza kuoneka pa dziko yapantsi Umambo wa Mulungu ungatoma kutonga. Caciwiri, iyo isatipanga kuti Umambo wa Mulungu unadzakhala kwenda na kwenda, pontho cipo unadzapitirwa mbuto na mautongi anango. Cacitatu, panadzaoneka nkhondo pakati pa Umambo wa Mulungu na mautongi a dziko ino. Umambo wa Mulungu unadzawina mbudzakhala utongi ubodzi basi mbutonga dziko yonsene. Buluka penepo anthu anadzatsandzaya na utongi wadidi kakamwe wakuti cipo akhala nawo kale.

18. Kodi nkhondo yakumalisa pakati pa Umambo wa Mulungu na mautongi a anthu isacemerwa tani?

 ¹⁸ Kodi Umambo wa Mulungu unadzatonga lini pa dziko yapantsi? Nkhondo yakumalisa, inacemerwa Armagedhoni mbidzati citika, mademonyo anadzanyengeza ‘amambo a pantsi pano ponsene mbaagumanyiza pa nkhondo ya ntsiku ikulu ya Mulungu wamphambvu zonsene.’ Inde, mautongi a anthu anadzacita nkhondo na Umambo wa Mulungu.​—Apokalipse 16:14; onani Cidzindikiro cakumalisa 10.

19, 20. Thangwi yanji tisafuna kuti Umambo wa Mulungu utonge dziko yonsene yapantsi?

¹⁹ Thangwi yanji tisafuna Umambo wa Mulungu? Pana mathangwi matatu. Yakutoma, tonsene ndife akudawa, natenepa tisaduwala na kufa. Mbwenye Bhibhlya isalonga kuti pantsi pa Umambo wa Mulungu, tinadzakhala kwenda na kwenda. Mwandimomwene, Jwau 3:16 isalonga: ‘Mulungu afuna anthu a pantsi pano pikulu pyene, mbapereka Mwanace m’bodzi ekha toera munthu onsene anankhulupira, aleke kufudzwa, mbwenye akhale na umaso wa kwenda na kwenda.’

²⁰ Thangwi yaciwiri inaticitisa kufuna Umambo wa Mulungu ndi yakuti tazungulirwa na anthu akuipa. Azinji ndi authambi, akukhonda khulupirika na asacita ulukwali. Ife nkhabe cinakwanisa ife kucita toera kuamalisa, mbwenye Mulungu anakwanisa. Anthu anapitiriza kucita pinthu pyakuipa anadzafudzwa nkati mwa nkhondo ya Armagedhoni. (Lerini Masalmo 37:10.) Thangwi yacitatu inaticitisa kufuna Umambo wa Mulungu ndi yakuti mautongi a anthu ndi akufewa, akuuma ntima, peno akudyekerwa. Iwo nkhabe cifuno cakuphedza anthu toera abvere Mulungu. Bhibhlya isalonga kuti ‘munthu asaponderera munthu ndzace mpaka kunfudza.’​—Koelete 8:9.

21. Kodi Umambo wa Mulungu unadzapangiza tani kuti cifuniro ca Mulungu cikucitwa pa dziko yapantsi?

 ²¹ Nkhondo ya Armagedhoni ingamala, Umambo wa Mulungu unadzapangiza pakweca kuti cifuno ca Mulungu cikucitwa pa dziko yapantsi. Mwacitsandzo, iwo unadzabulusa Sathani na mademonyo ace. (Apokalipse 20:1-3) Mukupita kwa ndzidzi, nee munthu m’bodzi anadzaduwala peno kufa. Thangwi ya ciomboli, anthu onsene akukhulupirika anadzakhala na mwai wakukhala m’Paradhizu kwenda na kwenda. (Apokalipse 22:1-3) Umambo unadzacenesa dzina ya Mulungu. Kodi pyenepi pisabvekanji? Pyenepi pisabveka kuti utongi wa Mulungu ungatonga dziko yapantsi, anthu onsene anadzalemedza dzina ya Yahova.​—Onani Cidzindikiro cakumalisa 21.

22. Tisadziwa tani kuti Yezu nee akhazikiswa ninga Mambo pikhali iye pa dziko yapantsi peno pidalamuswa iye muli akufa?

²² Yezu apfundzisa anyakupfundzace kuphembera: ‘Umambo wanu mbudze kuna ife.’ Pyenepi pisapangiza kuti utongi wa Mulungu mbudatonga dziko yapantsi ntsogolo. Pakutoma Yahova mbadakhazikisa Umambo wace mbaikha Yezu ninga Mambo wace. Kodi Yezu akhazikiswa ninga Mambo mu ndzidzi udaenda iye kudzulu? Nkhabe, iye akhafunika kudikhira. Midzidzi  inango pidamala Yezu kulamuswa muli akufa, Pedhru na Paulu afokotoza mwadidi pyenepi mudaphatisira iwo profesiya inagumanika pa Masalmo 110:1 kuna Yezu. Mu profesiya ineyi, Yahova alonga: ‘Khala ku nkono wanga wa madyo mpaka ndingaikha anyamalwa ako pantsi pa manyalo ako.’ (Machitiro 2:32-35; Ahebhere 10:12, 13) Yezu mbadzati kukhazikiswa na Yahova toera kukhala Mambo, mbadafunika kudikhira mpaka lini?

23. (a) Kodi Yezu atoma lini kutonga ninga Mambo wa utongi wa Mulungu? (b) Tinadzapfundzanji mu nsolo unatowera?

²³ M’pyaka pizinji mbicidzati fika caka 1914, nsoka wa Akristu a ntima wadidi abvesesa kuti caka ceneci mbicidakhala cakufunika kakamwe mu profesiya ya Bhibhlya. Pyakucitika pa dziko yonsene mu caka 1914 pisapangiza kuti iwo akhadalonga undimomwene. Yezu atoma kutonga ninga Mambo mu caka ceneci. (Masalmo 110:2) Mwakukhonda dembuka pakumala pyenepi, Sathani aponywa pa dziko yapantsi, pontho lero ‘ndzidzi wace ndi ung’ono basi.’ (Apokalipse 12:12) Mu nsolo unatowera, tinadzaona pizinji pinapangiza kuti tikukhala mu ndzidzi unoyu. Tinadzapfundzambo kuti mwakukhonda dembuka Umambo wa Mulungu unadzacitisa cifuniro ca Mulungu pa dziko yapantsi.—Onani Cidzindikiro cakumalisa 22.