Mamuna peno nkazi wakuti ndi wakukhulupirika kuna ndzace wa m’banja asaona banja yawo ninga ya kwenda na kwenda, pontho pyenepi pisaacitisa kukhala akutsidzikizika. Onsene asakhala na cinyindiro cakuti anapitiriza kukhala pabodzi m’midzidzi yadidi na ya nyatwa.

Anyakumanga banja anango asakakamizika toera kupitiriza kukhala pabodzi pene thangwi axamwali awo, acibale awo na anango nee asafuna kuti iwo amwalane. Khala mamuna na nkazi nkhabe funana, pontho nkhabe kulemedzana, pisakhala pyakunentsa kukhala wakukhulupirika kuna unango na ndzace.

PINALONGA BHIBHLYA: ‘Mamuna nee asafunika kusiya nkazace.’—1 Akorinto 7:11.

“Munthu ungaona mamunako peno nkazako ninga wakufunika kakamwe, nee usaipirwa kakamwe angakudawira. Mbwenye usalekerera mbuduwala mwakucimbiza pidacitika. Nyatwa zisakhala ninga cinthu cing’ono, tayu thangwi toera kumalisa nayo banja.”—Micah.

Pangaoneka nyatwa, mamuna peno nkazi wakuti nee ndi wakukhulupirika kuna ndzace wa m’banja asanyerezera: ‘Ife nee tabalwa toera tikhale pabodzi,’ buluka penepo asasaka mathangwi toera akhondane.

“Azinji asamanga banja na manyerezero akuti pinthu pinganentsa anakhondana. Munthu angamanga banja na manyerezero anewa, pisakhala pyakunentsa toera akhale wakukhulupirika kuna ndzace wa m’banja.”—Jean.

BVUNDZIKANI

Ndingatsukwalisana na ndzanga wa m’banja . . . 

• Kodi ine ndisanyerezera kuti ndikhadadodoma kumanga banja na iye?

• Kodi ndisanyerezera kuti ntsiku inango ndinadzamanga banja na munthu unango?

• Kodi midzidzi inango ndisalonga kuti “ndinakusiya” peno “ndinasaka munthu unango wakuti asandifuna”?

Khala imwe mwatawira kuti inde pa mbvundzo ubodzi peno yonsene, dziwani kuti musafunika kuwangisa banja yanu cincino.

CEDZANI THANGWI YA MIBVUNDZO INATOWERA NA NDZANU WA M’BANJA

• Kodi cincino kufunana kwathu kwapunguka? Khala ndi tenepo, thangwi yanji?

• Tinacitanji toera kuthimizira kufunana kwathu?

PINTHU PINAFUNA KUKUPHEDZANI

• M’midzidzi inango lemberani ndzanu wa m’banja mafala aufuni

• Ikhani foto ya mamunanu peno ya nkazanu pa mbuto inaphata imwe basa toera kupangiza kuti musanfuna

• Ntsiku zonsene menyerani mamunanu peno nkazanu ntokodzi mungakhala kubasa peno ku mbuto inango

PINALONGA BHIBHLYA: “Pidagumanya Mulungu, munthu mbaleke kupimwaza.”—Mateu 19:6.